dëgjoni

Kina është një vend i madh bujqësor dhe ka 800 milionë fshatarë. Xiao Dongpo është një paraqitës programesh televizive. Programi i tij "Takim në fshat" përshëndetet nga shumë fshatarë, prandaj Xiao Dongpo quhet "Miku i fshatarëve".

Në vitin 2003, kanali i 7-të bujqësor i Televizionit Qendror të Kinës nisi një program të ri bisede. Në krahasim me programet e tjera televizive, ky program ka karakteristikën e vet, sepse regjistrohet gjithmonë në fshat. Ky program quhet "Takim në fshat". 37-vjeçari Xiao Dongpo është paraqitësi dhe drejtori i programit.

Në fakt, Xiao Dongpo nuk studionte për prodhim programesh televizive në universitet, ai studionte ndërtim industrial. Xiao Dongpo tha:

"Vendlindja ime është qyteti Harbin. Pas diplomimit në shkollën e mesme, u pranova në Universitetin e Rrugëve të Xianit për të studiuar specialitetin e ndërtimit industrial."

Në vitin 1991, Xiao Dongpo mbaroi studimet në universitet dhe nisi punën në një spital në Jinan të provincës Shandong. Për shkak se i pëlqen shumë arti, pak kohë më vonë Xiao Dongpo u bë një paraqitës amator në radio. Gjatë 2 vjetëve, Xiao Dongpo shkonte çdo ditë në radio për të drejtuar një program bisede. Në vitin 1994, Xiao Dongposë i doli një rast i mirë dhe ai u bë paraqitës i një programi artistik të Televizionit të Shandongut duke filluar zyrtarisht jetën e paraqitësit të programeve televizive. Në fillim, Xiao Dongpo drejtonte një program rreth jetës në qytet dhe modës, ndërsa më vonë filloi të drejtonte një program që pasqyron jetesën në fshat. Xiao Dongpo tha:

"Në vitin 1997, fillova të drejtoja programin 'Fshati'. Mjedisi i punës ndryshoi shumë, çdo ditë përballesha me probleme bujqësore."

Ky ndryshim i punës ishte shumë i rëndësishëm për Xiao Dongponë. Programi "Fshati" me fjalë të thjeshta dhe humor u mirëprit nga fshatarët. Xiao Dongpo u bë i famshëm për shkak të këtij programi dhe u bë miku i fshatarëve të provincës Shandong. Pas 5 vjetëve, Xiao Dongpo u pranua në Televizionin Qendror të Kinës dhe krijoi programin "Takim në fshat" që ka tërhequr shumë shikues fshatarë.

Si një punonjës i medias që merret me prodhimin e programeve për fshatin, Xiao Dongpo shpesh preket nga tregimet e shumë fshatarëve. Zona Yimeng e provincës Shandong është shumë e varfër. Fshatari vendës Gong Maotian mori me qira disa male për pyllëzim. Nëpërmjet punës mbi 10 vjeçare të palodhshme, malet vendëse janë gjelbëruar dhe Gong Maotian është shkëputur nga varfëria. Xiao Dongpo tha:

"Gjatë mbi 10 vjetëve, Gong Maotian ka punuar pa pushim. Tani në vendlindjen e tij kudo ka male të gjelbëruara me pemë. Ai rrit edhe pula e derra."

Xiao Dongpo tha se në Kinë ka 800 milionë fshatarë e çdo ditë në fshat ndesh tregime që i prekin njerëzit. Ndoshta disa qytetarë janë të mendimit se tregimet e fshatarëve janë shumë të thjeshta dhe nuk kanë vlerë, por pikërisht fshatarët ia kanë ndryshuar pamjen Kinës. Pa pasurimin e fshatarëve dhe të fshatrave, nuk do të realizohej modernizimi i Kinës.

Xiao Dongpo ka lindur dhe jeton në qytet. Pasi nisi drejtimin e programit të bujqësisë, ai ka shkuar në fshatra të largëta dhe të varfra e ka qenë gjithashtu edhe në fshatra të pasura. Gjatë punës, ai ka ndier më tej sinqeritetin, bujarinë dhe aftësinë krijuese të fshatarëve. Xiao Dongpo tha:

"Jam fatmirë sepse jam mik i fshatarëve. Kam qejf të bëhem miku i tyre."

Xiao Dongpo tha se tani ai nuk mund të largohet nga miqtë fshatarë. Gjërat e ndryshme që shfaqen çdo ditë në fshatra i kanë dhënë atij tema të ndryshme për program. Ai shpreh shpresën se programi i tij do të tërheqë vëmendje më të madhe dhe se jetesa e fshatarëve do të përmirësohet pandërprerë. (Fani)