dëgjoni

Që nga viti 1981, kur njerëzimi zbuloi për herë të parë virusin e Sidës, ka kaluar vetëm një çerek shekulli, që është një kohë relativisht e shkurtër, por Sida është bërë me një shpejtësi të tmerrshme një sëmundje që rrezikon seriozisht shëndetin e njerëzimit. Shkencëtarët e vendeve të ndryshme të botës kanë bërë përpjekje këmbëngulëse për të gjetur mëyra të mjekimit të sëmundjes së Sidës, mirëpo deri tani ende nuk kemi ndonjë metodë të tillë. Në vitin 2005, 3 milionë e 100 mijë veta në të gjithë botën vdiqën nga Sida. Përballë kësaj gjendjeje, mënyra më efikase për frenimin e përhapjes së Sidës është që të rritet ndërgjegja e masave popullore për parandalimin e kësaj sëmundjeje. Në Kinë, i kushtohet një vëmendje e veçantë popullarizimit të njohurive për parandalimin e sidës në gjirin e fshatarëve që kanë shkuar në qytet për të punuar përkohësisht.

Numri i fshatarëve kinezë, që punojnë përkohësisht në qytet, ka arritur sot në 120 milionë. Për shkak të pamjaftueshmërisë së shkollimit të tyre në kohën e rinisë, ata nuk kanë njohuri elementare për parandalimin e Sidës. 65% e këtyre fshatarëve janë të moshës 20-40 vjeçare dhe pjesa më e madhe e tyre janë beqarë ose jetojnë të ndarë nga i shoqi a e shoqja. Duke jetuar në një  mjedis krejt të ri dhe për shkak të nevojave psikologjike dhe fizike, ata e ndryshojnë shpejt konceptin për sjelljen seksuale. Meqenëse këta fshatarë ndërrojnë dendur vendin e punës, po të infektohen nga virusi HIV, ata e çojnë këtë virus edhe në qytete të tjera.

Për këtë arsye, dikasteret përkatëse qeveritare dhe organizatat shoqërore të Kinës zhvillojnë aktivitete për popullarizimin e njohurive për parandalimin dhe mjekimin e Sidës, duke i konsideruar njerëzit e sipërpërmendur si objektivin kryesor, dhe bëjnë propagandë në trena dhe stacione hekurudhor, që janë vendet me më shumë njerëz.

Në Kinë, trenat janë mjetet kryesore të transportit, me të cilat fshatarët shkojnë për të punuar përkohësisht në qytet, prandaj i kushtohet një vëmendje gjithnjë e më e madhe propagandës në trena, për të përhapur njohuritë e parandalimit të Sidës. Pak kohë më parë, korrespondenti ynë bëri një vizitë në trenat që shkonin nga Pekini për në Mongolinë e Brendshme dhe vuri re se disa punonjës vullnetarë të Shoqatës Kineze të Kryqit të Kuq punonin intensivisht për të shpërndarë materiale propagandistike të cilat ndërta dhe pasagjerët fillonin t'i lexonin, me t'i marrë në dorë. Gjatë bisedës me korrespondentin tonë, turisti spanjoll Iglisias foli për përshtypjet që i lanë këto aktivitete propagandistike.

Zoti Iglisias tha: "Aktivitete të tilla zhvillohen edhe në vendin tim. Jam i mendimit se këto janë aktivitete të vlefshme dhe specifike. Është një mendim i mirë që të zhvillohen këto aktivitete, sepse janë të dobishme për shumë njerëz."

Aktivitete të tilla zhvillohen edhe në trenat e linjave kryesore hekurudhore të Kinës. Zonja Jiang Yiman, nënkryetare e Shoqatës Kineze të Kryqit të Kuq, që është organizata kryesore drejtuese e këtyre aktiviteteve, tha: "Jemi të mendimit se, në lëvizjen për parandalimin e Sidës, popullsia e lëvizshme, këtu e kam fjalën kryesisht për fshatarët që kanë shkuar në qytet për të punuar përkohësisht, janë njerëzit që kanë më shumë nevojë për kujdesje. Për këtë arsye, bëjmë provë propagande nëpër hekurudha dhe në stacionet kryesore të hekurudhave, me qëllim që të marrim përvojë për të zgjeruar më tej këto aktivitete."

Edhe Ministria e Shëndetësisë e Kinës dhe disa dikastere të tjera kanë filluar aktivitete propagandistike për parandalimin e Sidës në fshat. Sot në çdo fshat të Kinës, gjen të ngjitura në mure piktura propagande me figura dhe shpjegime të kuptueshme, në mënyrë që fshatarët, që punojnë përkohësisht në qytet, dhe të afërmit e tyre të kenë njohuri elementare për sëmundjen e sidës. Kurse në kantieret e ndërtimit të qyteteve, sektorët përkatës shfaqin vazhdimisht filma për të dhënë njohuri të përkatëse. (Zheng)