"Si ambasadori i Republikës së Shqipërisë në Republikën Popullore të Kinës, gjatë këtyre 6 viteve kam patur kënaqësinë e veçantë të jem dëshmitar nga afër i arritjeve madhështore të popullit mik kinez. Republika Popullore e Kinës është bërë një aktor me kontribut të rëndësishëm në arenën ndërkombëtare në ruajtjen e paqes dhe stabilitetit në rajonin e Azi-Paqësorit dhe në Botë."

"Edhe gjatë këtyre viteve, Republika Popullore e Kinës ka vazhduar rritjen e saj të vrullshme ekonomike, duke u radhitur e gjashta në botë përsa i përket prodhimit të përgjithshëm kombëtar. Pekini dhe qytetet e tjera që kam patur rastin t'i vizitoj kanë pësuar një zhvillim të fuqishëm. Niveli i jetesës së njerëzve ka ndryshuar në mënyrë të dukshme."

"Arritje madhështore janë realizuar dhe në fushën e shkencës dhe teknikës. Republika Popullore e Kinës tashmë është vendi i tretë që ka dërguar njeriun në kozmos dhe shumë shpejt do të realizojë edhe dërgimin e tij në hënë."

"Pekini, në një konkurrencë të fortë, fitoi me meritë të drejtën e organizimit të Lojërave Olimpike të vitit 2008. Përgatitjet e deritanishme për këtë ngjarje të rëndësishme jo vetëm për sportin, garantojnë një sukses tjetër që Pekini do të regjistrojë me përmasa ndërkombëtare."

Në fund të intervistës së tij për Radion e Jashtme të Kinës, ambasadori i Shqipërisë në Kinë Kujtim Xhani, i cili do të përfundojë së shpejti detyrën e tij në Kinë, tha plot emocion:

"Me rastin e përfundimit të detyrës së ambasadorit dëshiroj të shpreh vlerësimet më të mira dhe falenderimet për stafin e Seksionit të Shqipes së Radios Ndërkombëtare të Kinës për kontributin e tyre afro 37-vjeçar në zhvillimin e forcimin e miqësisë ndërmjet dy vendeve. Gjatë këtyre 6 viteve kam patur nderin t'i konsideroj bashkëpunëtorë të mirë në realizimin e objektivit tonë të përbashkët të zhvillimit të marrëdhënieve në mes dy vendeve. Edhe në të ardhmen emisionet e saj që tashmë dëgjohen shumë pastër në Tiranë, do të më mbajnë të informuar me zhvillimet dhe sukseset e Republikës Popullore të Kinës. Ju uroj suksese të mëtejshme.

Faleminderit."

Pas dhënies së intervistës për Radion e Jashtme të Kinës, ambasadori Kujtim pati një bisedë të lirë me mua, edhe unë i shpreha falenderimet për përpjekjet dhe kontributin, që ka dhënë gjatë mandatit të tij për forcimin e marrëdhënieve nëpërmjet Kinës dhe Shqipërisë. Ne do të punojmë më me zell për realizimin më së miri të emisioneve tona në gjuhën shqipe në shërbim të dëgjuesve shqiptarë.

Të dashur lexues, lexuat intervistën e ambasadorit shqiptar në Kinë z.Kujtim Xhani, dhënë për Radion e Jashtme të Kinës para përfundimit të detyrës së tij në Kinë. ( Daming )