Kur ra gripi i shpendëve, krahinat e ndryshme të Kinës vendos;n masa të rrepta dhe të shumëllojshme ndaj ndërmarrjeve të rritjes së shpendëve dhe tregut të shpendëve të gjalla, kështu që shumë prej këtyre ndërmarrjeve kanë rënë në gjendje të vështirë. Por në grupin Shengnong të distriktit Guangze në veri të provincës Fujiang, ndërmarrja më e madhe e rritjes së pulave në jug të Kinës, rritja, prodhimi, përpunimi dhe shitja po kryhen normalisht, nga porta e këtij grupi hyjnë dhe dalin pa pushim kamiona.

Kohët e fundit, ky grup ka përcaktuar 3 rregulla për punonjësit e tij: Ndalimi i punonjësve të dalin nga ferma, ndalimi i tyre të blejnë në treg produkte dhe ushqime prej shpendësh dhe ndalimi i pranimit të punonjësve nga zonat e prekura nga epidemia e gripit të shpendëve, dhe i dërgimit të punonjësve të grupit në zonat e sipërpërmendura për vizitë dhe studim, për blerjen e lëndëve të para dhe për shitjen e ushqimeve etj.. Madje edhe automjetet që hyjnë dhe dalin nga ferma sterilizohen më se një herë jashtë fermës.

Në fakt, qysh në fillim të viteve '90 të shekullit të kaluar, kur importoi nga jashtë linjën e përpunimit automatik të mishit të pulave, ky grup e ka konsideruar prodhimin shkencor dhe administrimin e rreptë si bazë të ekzistencës së ndërmarrjes. Në vitin 1994, kur Shoqëria amerikane e pulave të pjekura Kentucky (KFC) kërkonte treg në jug të Kinës, erdhi në këtë ndërmarrje dhe filloi bashkëpunimin me të. Për të zhvilluar mirë këtë bashkëpunim, në radhë të parë ndërmarrja "Shengnong" i ka ndërtuar të gjitha fermat e rritjes së pulave në zona malore me panorama të bukura dhe me ajër të pastër larg qytetit, burimi i ujit për rritjen dhe përpunimin e mishit të pulave vjen nga më shumë se 100 metra nën tokë. Në të njëjtën kohë, ky grup ka rindërtuar me 400 milionë juanë sipas standardit higjienik të mjedisit të vendeve evropiane dhe amerikane të gjitha fabrikat e përpunimit të mishit, fermën e pulave të racës, fermën e pulave për mish dhe repartin e inkubacionit, dhe ka importuar nga jashtë mbi 60 linja automatike të rritjes, përpunimit dhe prodhimit me përmbajtje të lartë tekniko-shkencore.

Në grupin Shengnong theren çdo ditë mbi 100 mijë pula, duke nxjerrë mbi 10 tonë zorra, pupla, gjak dhe mbeturina të tjera. Në vitin 2004, ky grup formoi me 20 milionë juanë qendrën e studimit bioteknik për shfrytëzimin e këtyre mbeturinave. Sot jashtqitjet e pulave bëhen pleh organik, puplat përdoren për pasurimin e ushqimeve të pulave, ndërsa të brendshmet e pulave në mjekësi.

"Pa mbështetjen e fuqishme të qeverisë dhe masave vendëse, nuk do të kishte sot grup Shengnong. Deri sa banorët e distriktit tonë të mos jenë pasuruar, ne nuk mund të flemë të qetë", kështu thonë punonjësit e grupit Shengnong. Vitet e fundit, ky grup nëpërmjet administrimit të industrializuar të bujqësisë, e ka kthyer epërsinë biologjike të zonave malore të pjesës veriore të provincës Fujian në epërsi ekonomike dhe i ka pajisur fshatarët tradicionalë me njohuri kulturore dhe teknike, duke hapur kurse për kualifikimin e tyre. Deri tani janë punësuar në grupin e tyre mbi 3500 fshatarë. Grupi Shengnong me 400 milionë juanë ka ngritur edhe 30 baza moderne të prodhimit dhe të përpunimit në qytetet dhe distriktet përreth, ku janë pranuar 13 mijë familje si aksionarë për zhvillim të përbashkët.

Sipas të dhënave jo të plota, në vitin 2004, vëllimi i prodhimit të grupit Shengnong zuri 43% të GDP-së të distriktit Guangze, duke u bërë kështu nxitje për shtimin e të ardhurave të fshatarëve në veri të provincës Fujian. Pina.