Z.Chiao Wei që punon në një agjenci turistike të Pekinit shkon shpesh me shërbim në vende të tjera, duke marrë me vete shumë para të huaja ose kineze. Por kjo mënyrë nuk është praktike dhe nuk është e sigurt. Lidhur me këtë z.Chiao tha:

"Ka shumë raste kur shkoj në vende të tjera me shërbim dhe për turizëm, por mbajtja e të hollave në dorë është një telash i madh. Prandaj dëshiroj të kem një kartë krediti që mund të përdoret jashtë vendit."

Në përputhje me kërkesat e njerëzve si z.Chiao, shumë banka me investime kineze kanë filluar shërbimet e kartës së kreditit, dhe ky shërben si një hap i rëndësishëm i këtyre bankave për përmirësimin e mënyrës dhe për shtimin e llojeve të shërbimeve të tyre pas hyrjes në Kinë të shumë bankave me investime të huaja. Për të përballuar konkurrencën me këto të fundit, bankat kineze ndryshuan mendimin e dikurshëm të administrimit që i kushtonte vëmendje të madhe dhënies së kredisë ndërmarrjeve të mëdha, dhe filluan të hyjnë në tregun e shërbimeve monetare personale. Administratori i seksionit të shërbimeve monetare personale të Bankës së Komunikacionit të Kinës z. Liang Shuang i tha korrespondentit se banka e tij u ka dhënë klientëve kartë krediti me dy lloj monedhash që mund të përdoren jashtë vendit:

"Kjo kartë krediti mund përdoret brenda dhe jashtë Kinës."

Jo vetëm kaq, bankat kineze kanë filluar edhe shërbimet e administrimit të pasurive personale, kjo tregon kthesën e zhvillimit strategjik të degës bankare të Kinës.

Bankat e mëdha shtetërore ose qytetare kineze kanë hapur zyrat e administrimit të pasurive personale, të cilat u japin klientëve këshilla të ndryshme, si mbi shit-blerjen e valutave, të aksioneve etj. Z. Liang i tha korrespondentit:

"Kur një klient ka në dorë një shumë të hollash, ne i tregojmë se kur dhe cilin aksion duhet të blejë, ç'lloj sigurimesh duhet të blejë etj."

Pasurimi i pandërprerë i shërbimeve monetare ka ndryshuar gradualisht figurën e bankës si makinë e depozitimit dhe e tërheqjes së parave dhe ka bërë që ajo të jetë një platformë e ngritjes së cilësisë së jetesës së banorëve, e ruajtjes dhe e shtimit të vlerës së pasurive personale. Profesori i Institutit kërkimor të monedhave dhe letrave me vlerë pranë Universitetit të Popullit kinez z. Zhao Xijun vuri në dukje se me zhvillimin e degës bankare, vetëm me dhënien e kredive ndërmarrjeve bankat nuk mund të plotësojnë nevojat e ekzistencës së vet. Sot vëllimi i shërbimeve monetare personale të grupeve monetare shumëkombëshe si banka City, banka e Hongkongut etj. përbën mbi 40% të vëllimit të përgjithshëm, kurse ai i bankave kineze përbën vetëm 10%. Profesor Zhao tha se tregu i madh dhe konkurrenca e ashpër i nxitën bankat kineze të fillojnë shërbimet monetare personale.

Sipas të dhënave statistikore, depozitat e banorëve kinezë i kanë kaluar 1,3 trilionë juanët, duke krijuar një shans të madh për zhvillimin e shërbimeve monetare personale. Tani llojet e administrimit të pasurive personale kufizohen vetëm në dhënien e propozimeve, ndërsa klientët e zgjedhin vetë mënyrën e trajtimit të pasurive të tyre. Specialistët janë të mendimit se në të ardhmen bankat kineze duhet të bëhen "administratore" të pasurive të klientëve.

Krahas zhvillimit të shërbimeve monetare personale me forcat e veta, bankat kineze bëjnë gjithashtu përpjekje që të mësojnë konceptin dhe përvojën e përparuar të institucioneve monetare ndërkombëtare, për të ngritur aftësinë e vet. Në qershor të vitit 2005, kur u nënshkrua një marrëveshje e investimeve strategjike midis Bankës së Ndërtimit të Kinës dhe Bankës së Amerikës, drejtori i përgjithshëm i Bankës së ndërtimit të Kinës z. Guo Shuqing u shpreh se një nga qëllimet kryesore të bashkëpunimit me Bankën e Amerikës është shtimi i potencialit të shërbimeve monetare personale të bankës së tij. Ndërsa Banka e Komunikacionit e Kinës, si një nga bankat e para të mëdha tregtare shtetërore kineze që tërhoqën investues të huaj, ka filluar prej kohësh bashkëpunimin thelbësor me Bankën Angleze në Hongkong. Shefi i degës së shërbimeve monetare personale të Bankës së komunikacionit të Kinës në Pekin z. Liang Shaung tha:

"Pas bashkimit të investimeve me Bankën e Hongkongut, Banka e Komunikacionit e Kinës përfundoi kthesën e saj strategjike, duke u bërë një bankë që merret kryesisht me shërbimet e shitjes me pakicë. Duke zhvilluar bashkëpunimin, këto dy banka u japin klientëve shërbimet monetare më të përparuara dhe më të shpejta."

Bashkëpunimi midis bankave me investime kineze dhe atyre me investime të huaja konsiderohet si një bashkëpunim me leverdi reciproke, bankat kineze përfitojnë prej tij teknologjinë dhe përvojën e përparuar, kurse bankat e huaja grumbullojnë përvojën e zhvillimit të Kinës. Sipas premtimeve të saj përkatëse kur u pranua në Organizatën Botërore të Tregtisë, në fund të vitit 2006, Kina do të hapë shërbimet personale me monedhën kineze Renminbi. Atëherë, bankat kineze dhe bankat e huaja do të konkurrojnë në kushte të barabarta, dhe ata që do të pëtfitojnë nga kjo do të jenë klientët kinezë. (Pina)