Kur sheh "8147" dhe "886", një plak i moshuar mund të thotë se janë dy numra të zakonshëm; kur sheh "MM" dhe "PMP", ai mund të thotë se janë shkurtimi i dy fjalëve të anglishtes; kur sheh "karkeleci i madh" dhe "zogu i lakrës", ai mund të thotë se janë emërtimet e dy lloje gjellësh.

Por të rinjtë, që adhurojnë dialogun në internet, do të gajaseshin së qeshuri, po të dëgjojnin shpjegimet e sipërpërmendura. Togfjalëshat e "gjuhës së internetit", që përdorin të rinjtë, kanë domethënie krejt të ndryshme. Për shembull, "8147" do të thotë "Mos u zemëroni"; "886" do të thotë "Mirupafshim"; "MM" do të thotë "vajza" dhe "PMP" do të thotë "Flet me lajka". Me togfjalëshat "da xia", që do të thotë "karkaleci i madh", dhe "cai niao", që do të thotë "zogu i lakrës", ata i quajnë ekspertët dhe fillestarët në përdorimin e internetit.

Gjatë kohës së dialogut në internet, të rinjtë përpiqen të shprehin mendimet dhe ndjenjat me fraza sa më të shkurtra dhe të kuptueshme për ta, prandaj kanë krijuar gradualisht "gjuhën e internetit". Fang Yan, një student i Universitetit Politeknik Jiaotong të Pekinit, përdor shpesh herë "gjuhën e internetit", kur bisedon në internet me miqtë e tij. Ai tha: "Gjuha e internetit është shumë praktike për të bërë dialog në internet, sepse ne përdorim vetëm dy ose disa shkronja për të shprehur një mendim me përmbajtje të pasur dhe merremi vesh mirë me njëri tjetrin. Atëherë, pse të mos e përdorim atë?"

Sot në Kinë, ka shumë të rinj që veprojnë kështu siç thotë studenti Fang Yan. Nga të dhënat statistikore të Qendrës Kineze të Informacioneve të Internetit del se, deri më 30 qershor të vitit 2005, numri i përdoruesve të internetit në Kinë kishte arritur në 103 milionë veta dhe, në këtë drejtim, Kina zë vendine dytë, pas SHBA-së, dhe një e treta e tyre bëjnë rregullisht bisedë në internet. Pak nga pak, ata e kanë futur këtë "gjuhë të inernetit" edhe në jetën e përditshme.

Zonjusha Li Yan, që punon në një kompani të Pekinit dhe që bën shpesh dialog në internet, është e mendimit se "gjuha e internetit" mund të përdoret për të shprehur më qartë dhe më shpejt një mendim që shprehet zakonisht me fraza të gjata të gjuhës së zakonshme. Ajo u shpreh se për të vlerësuar një person, që flet gjithmonë në mënyrë të tërthortë, ajo thotë se "ky është një njeri me S" dhe ky nocion është shumë i qartë.

Por përhapja gjerësisht e "gjuhës së internetit" ka ngjallur shqetësim në shoqëri. Zonja Du, mësuese e një shkolle fillore të Pekinit, tha se nxënësit e saj i përdorin këto shprehje edhe në hartimet e tyre. Ajo shprehu mendimin se një gjë e tillë do të ndikojë negativisht te nxënësit, të cilët ende nuk e kanë përvetësuar mirë gjuhën tonë normative.

Aq më tepër, shumë prindër nuk duan që fëmijët e tyre t'i përdorin aq shumë shprehjet e së ashtuquajturës "gjuhë e internetit". Ata janë të mendimit se shpërdorimi i këtyre shprehjeve do t'i pengojë të rinjtë në të kuptuarit dhe përdorimin e drejtë të gjuhës normative kineze. Ç'është e vërteta, shumë prej prindërve nuk kuptojnë fare këto shprehje. Shumë të tjerë shqetësohen se përdorimi në masë të madhe i këtyre shprehjeve do të ndikojë negativisht në zhvillimin e gjuhës kineze.

Zoti Guo Longsheng, përgjegjës i Komisionit Shtetëror Kinez të Gjuhës dhe Drejtshkrimit, tha: "Ne kemi besim të plotë se gjuha kineze, e cila ka një histori mijëra vjeçare dhe që ka një vitalitet të fortë, mund të pranojë çdo element të vlefshëm dhe mund të mbrohet nga ndotja gjuhësore."

Qeveria kineze tregon preokupim për këtë çështje dhe po bën anketa dhe studime për të marrë masa për shmangien e përhapjes "pa fre" të "gjuhës së internetit". (Zheng)