Agjencia kineze e lajmeve Zhongxin njoftoi se nga 2 deri më 8 shkurt, do të zhvillohet në qytetin Shenzhen të Kinës Festivali i dytë artistik botëror i të rinjve kinezë. Deri tani më se 10 mijë të rinj të ardhur nga 47 qytete, Hongkongu, Makao, Tajvani të Kinës dhe mbi 20 vende të tjera janë regjistruar për të marrë pjesë në këtë festival.

Festivali i dytë artistik botëror i të rinjve kinezë organizohet bashkërisht nga Ministria e Kulturës e Kinës, Lidhja e Përgjithshme e Kinezëve dhe Emigrantëve Kinezë në Botë, Shoqata e Miqësisë e Popullit Kinez me Botën e Jashtme etj. Qëllimi i festivalit është që të nxitet bashkimi dhe miqësia midis të rinjve kinezë të mbarë botës.

Në Tianjin zhvillohet ekspozita e veprave artistike me rastin e 30-vjetorit të vdekjes së ish-kryeministrit Zhou Enlai

Agjencia kineze e lajmeve Zhongxin njoftoi se më 8 janar, filloi në Muzeun e Zhou Enlait në Tianjin ekspozita e veprave artistike me rastin e 30-vjetorit të vdekjes së ish-kryeministrit Zhou Enlai.

Kjo ekspozitë përmban afro 100 vepra të çmuara artistike duke përfshirë piktura, fotografi, skulptura etj. Nëpërmjet këtyre veprave, autorët shprehin kujtimet e tyre për Zhou Enlain.

Ekspozita do të qëndrojë e hapur një muaj, pastaj do të zhvillohet në mbarë vendin.

Orkestra simfonike e Rusisë zhvilloi koncertin e vitit të ri në Pekin

Më 5 janar, Orkestra Simfonike e Rusisë zhvilloi në Universitetin e Pekinit një koncert për vitin e ri ku u interpretuan opera e Pekinit "Dainuo" dhe muzikë tradicionale ruse.

Orkestra Simfonike e Rusisë u krijua në vitin 1992 në Moskë. Pas krijimit, kjo orkestër ka qenë në dhjetëra vende për shfaqje. Kjo është hera e 9-të që Orkestra Simfonike e Rusisë jep shfaqje në Kinë.

U botua libri "Kultura e lumturisë kineze dhe shoqëria harmonike"

Ditët e fundit, u botua në Pekin libri i parë që studion kulturën tradicionale të lumturisë të Kinës "Kultura e lumturisë kineze dhe shoqëria harmonike". Ky libër shtjellon rëndësinë e kulturës së lumturisë në shoqërinë moderne dhe u tregon lexuesve një perspektivë të bukur harmonike shoqërore.

Kryeredaktori i këtij libri është anëtari i Këshillit të Përhershëm të Shoqatës së Miqësisë me Jashtë të Provincës Fujian dhe specialisti i historisë së kulturës kineze Zhao Huaming. Parathënien e librit e ka shkruar kryetari i Federatës së Letërsisë dhe Artit të Kinës Zhou Weishi. (Fani)