Muajin e kaluar, një autobus i ri dhe luksoz u nis nga porti i Kinës verior Tiancin për në SHBA, në vitin 2006 do të çohen atje edhe 100 autobusë të tillë të prodhuar nga Shoqëria me përgjegjesi të kufizuar e autobusëve Yutong e qytetit Zhengzhou. Si ka arritur Shoqëria Yutong të eksportojë autobusët e vet në vende të tjera ?

Para 10 vjetëve, kjo shoqëri ka qenë një uzinë e vogël e panjohur, që podhonte vetëm disa automjete të thjeshta. Pas përpjekjeve këmbëngulëse, autobusët e saj janë eksportuar në mbi 30 vende dhe rajone të botës, si në Evropë, Japoni, Korenë e Jugut, bile edhe në SHBA. Hyrja e shoqërisë Yutong në tregun amerikan është një objekt i madh për të.

Kur morën listën e porosisë të SHBA-së, puna e parë e punonjësve të seksionit të shitjes dhe e teknikës të kësaj shoqërie ishte studimi i rregullave përkatëse dhe standardit teknik të Departamentit të komunikacionit të SHBA-së. Përgjegjesi i Shoqërisë Yutong për zonën amerikane z.Zhang Yaowu tha:

"Në radhë të parë duhet të dimë kërkesat e amerikanëve, në mënyrë që gjatë projektimit, të mbajmë parasysh këto standarde."

Në fakt presioni për hyrje në tregun amerikan vjen jo vetëm nga ana ligjore, por edhe nga koncepti kulturor, zakonet e konsumit, kostoja e lartë etj. Inxhinjeri 28 vjeçar Zhu Yongsheng që mori pjesë në këtë punë i tha korrespondentit se në tregun e autobusëve, projektimi është një nga punët kryesore, ndërsa fortësia, rezistenca, siguria dhe pajisjet e përparuara ndikojnë direkt mbi sasinë e shitjes së autobusëve.

"SHBA-ja është e rreptë për sigurimin, p.sh. ata kërkojnë që dritaret në të dyja anët e autobusit të hapen lirisht, që korridori dhe ndenjëset të jenë më të gjëra etj."

Pas përpjekjeve 16 mujore, ata prodhuan autobusët në përputhje me kërkesat e tregut amerikan. Jo vetëm kaq, shoqëria Yutong eksportoi edhe 400 autobusë në Kubë. Në gjashtëmujorin e parë të vitit 2005, të ardhurat nga shitja e autobusëve në vende të tjera arritën në 37 milionë dollarë amerikanë, duke u rritur 8 herë në krahasim me të njëjtën periudhë të vitit 2004. Sot Shoqëria Yutong është bërë baza më e madhe e prodhimit të autobusëve në Azi. Sekretari i Përgjithshëm i Shoqatës së Industrisë së Automobilave të Provincës Henan z.Liu Xiaoming i tha korrespondentit se suksesi i Shoqërisë Yutong në tregun e huaj është arritur në sajë të zbatimit të teknologjisë së përparuar:

"Shoqëria Yutong jo vetëm ka mësuar dhe thithur teknologjinë e përparuar dhe përvojën e administrimit të Shoqërisë me përgjegjesi të kufizuar të automjeteve tregtare Man të Gjermanisë, shumë të njohur në botë, por ka ruajtur me sukses edhe pavarësinë e markës dhe të teknologjisë së vetë, duke u ngritur si një shembull i suksesshëm në mbarë vendin."

Në vitin 2002, Shoqëria Yutong dhe Shoqëria Gjermane Man me 320 milionë juanë formuan një shoqëri me investime të përbashkëta dhe një qendër teknike në Mynih. Kjo shoqëri merret kryesisht me prodhimin dhe shitjen e balestrave dhe pjesëve të këmbimit të autobusëve të mëdhenj dhe të mesëm, duke shfrytëzuar këtë rast, Shoqëria Yutong ka hyrë në tregun e autobusëve të kategorisë së lartë.

Duke mësuar teknologjinë e përparuar të Evropës, Shoqëria Yutong i kushton rëndësi të madhe edhe studimit dhe zhvillimit të teknologjisë së vet. Ajo ka krijuar të vetmen qendër teknike shtetërore dhe qendrën e studimeve shkencore pasuniversitare, investon çdo vit 4% të të ardhurave nga shitja e produkteve në zhvillimin dhe studimin e produkteve.

Autobusët e prodhuar nga Shoqëria Yutong janë shumë rezistentë. Përgjegjësi i kësaj shoqërie për zonën e Lindjes së Mesme, z. Li Shuwei i tha korrespondentit se autobusët e tyre kanë hyrë në tregun e Lindjes së Mesme, sepse ato mund të përshtaten me klimën e thatë dhe të nxehtë me erë të madhe dhe me rrugët ranore të atjeshme.

Në të njëjtën kohë, Shoqëria Yutong i kushton vëmendje të madhe edhe shërbimeve pas shitjes. Shefi i seksionit të vendeve të huaja pranë kësaj shoqërie Van Venjun tha:

"Automobilat, duke përfshirë edhe autobusët ndryshojnë shumë nga produktet e tjera, ato kërkojnë shërbime të rrepta pas shitjes. Ne i kushtojmë vëmendje të madhe kësaj pune, kemi vendosur agjenci në vende të tjera dhe magazina të pjesëve të këmbimit, kemi dërguar edhe punonjës për hapjen e tregut, për shërbimet pas shitjes dhe për administrimin e pjesëve të këmbimit."

Sot, Shoqëria e automobilave me përgjegjesi të kufizuar Yutong mund të prodhojë në vit 18 mijë autobusë dhe 8 mijë balestra të autobusëve. Objekti kryesor i kësaj shoqërie është që pas përpjekjeve të 5 deri 7 vjetëve, të ardhurat nga shitja e autobusëve do të arrijnë në 30 miliardë juanë dhe ajo të radhitet në vendin e 5-të të sektorit të autobusëve në botë. (Pina)