Presidenti i Arsenalit, Piter Hill-Ud, ka thënë se i druhet largimit të francezit Tierri Henri në fund të këtij sezoni. Sulmuesi 28-vjeçar ka një kontratë deri në vitin 2007 me "Topçinjtë" dhe i joshur nga Barcelona, duket se nuk ka ndër mend të rinovojë bashkëpunimin. Numri 1 i Arsenalit tha për shtypin anglez: "Kur mendohem për këtë çështje, i druhem largimit të Tierrisë. Kam biseduar me futbollistin, por nuk mund t'ju siguroj se do të qëndrojë tek Arsenali. Largimi i tij do të ishte një humbje e madhe për skuadrën. Ekonomikisht jemi gati të plotësojmë çdo kërkesë të tijën, por druhem se do të jenë faktorë të tjerë ato që do të ndikojnë te zgjedhja e Henrisë. Në rast se Henri do të rinovojë, atëherë i gjithë ambienti në "Hajbëri" do të fitonte entuziazmin që nevojitet për t'u ringjitur në majë." Henri, i cili kaloi në vitin 1999 nga Juventusi tek Arsenali, në këtë sezon synon të kalojë Ian Rajtin, duke u bërë shënuesi më i mirë në historinë e ekipit londinez.(Nga Shekulli)