Të gjithë e kishin nuhatur, por prishja mes Antonio Kasanos dhe Françesko Totit është bërë zyrtare në ditën e prezantimit të barezit te Reali. "Galaktiku i ri" nuk ka dashur ta përmendë për asnjë çast ish-kapitenin, që sipas tij është "fajtor" që s'i ka dalë në krah as te Roma dhe as në kombëtare. Nëse Kasano do të thirret në botëror, Lipi s'do ta ketë aspak të lehtë të kontrollojë marrëdhëniet mes tyre. Lojtari i ri i Real Madridit ndihet i tradhtuar nga Toti, ndaj gjatë prezantimit të tij në Spanjë nuk deshi t'ia përmendte emrin. Një shenjë e dukshme e një marrëdhënieje të prishur nga ngjarjet e fundit të Kasanos te Roma. Ky i fundit ndihet i tradhtuar nga Toti që nuk i doli në krah kur u braktis nga të gjithë. Kasano, edhe pse u kritikua nga të gjithë për sjelljet tij, nuk e ka kuptuar zgjedhjen e Françeskos për të qenë në një mendje me klubin, çka u bë e detyrueshme nga rinovimi i kontratës dhe nga fakti se është njeriu-imazh i Romës. Me pak fjalë, s'kishte si të vepronte ndryshe. Megjithatë, nuk mund të harrohen gjërat e mira që ka bërë Toti për Kasanon. Kapiteni e ka mbajtur në shtëpi, e ka mbrojtur dhe e ka ndihmuar të rritet; këtë talenti nga Bari s'mund ta harrojë. Aq më tepër tani që ndodhet larg nga Roma, çka mund të ndihmonte që gjakërat të qetësoheshin dhe të rregullohej kjo marrëdhënie që u prish për shkak të problemeve të Kasanos me klubin. E gjithë kjo, duke menduar për të mirën e Italisë në botëror, ku Toti dhe Kasano mund të jenë përcaktues.(Nga Shekulli)