Në shtator të vitit të kaluar, i dërguar nga drejtuesi shumë i pritur televiziv kinez Cui Yongyuan, një grup i CCTV-së shkoi në Shqipëri dhe intervistoi për rubrikën e CCTV-së "Magjia e filmave artistikë" dhjetra kineastë veteranë shqiptarë të filmave të vjetër shqiptarë. Intervista e grupit televiziv kinez gjeti ndihmën dhe përkrahjen e madhe të kineastëve veteranë shqiptarë, veçanërisht të regjisorëve Viktor Gjika dhe Hysen Hakani etj. Para se të vinte grupi në Shqipëri, ata i kishin lajmëruar aktorët e filmave të drejtuar dikur prej tyre duke rregulluar edhe orën dhe datën e pjesëmarrjes në intervistë, duke i krijuar kështu shumë lehtësira grupit televiziv kinez për marrjen e intervistave të veta.

Ndër filmat e vjetër shqiptarë të zgjedhur nga CCTV për t'i intervistuar, dy janë drejtuar nga regjisori i njohur shqiptar Hysen Hakani, ato janë "Njësiti Guerril " dhe " Oshëtimë në bregdet ".

Duke filluar intervistën për grupin televiziv kinez, z. Hysen Hakani tha : "Është nder për mua të ftohem nga kolegë që vijnë nga një vend me tradita të lashta artistike e kulturore. Dëshiroj të them se ky nder nuk më bëhet vetëm mua, sepse filmat për të cilët do të flas nuk janë vetëm të mitë, janë vepër e kolektivit që kontribuoi për realizimin e tyre. Nuk mund të lë pa përmendur këtu gjithashtu ata që nuk ekzistojnë më, që ju i keni ftuar, por që fatkeqësisht nuk janë më në mesin tonë, që kanë vdekur, por janë të gjallë në zemrat tona, të nderuar, të përjetshëm. Në emër të të gjithë atyre ju falënderoj.

Sado të përpiqem të tregohem modest, nuk e përmbaj dot veten. Është kënaqësi e madhe të dëgjosh që filmat, edhe pse kanë gjysmë shekulli që janë bërë, gëzojnë atë popullaritet në Kinë, në atë Kinën e madhe, shtetin kolos, për të cilin unë ushqej dashuri dhe respekt të thellë. Këto më mbushin me gëzim dhe jam i gatshëm të përgjigjem për të gjitha pyetjet."

Pastaj ai foli për jetën e tij kinematografike duke i treguar grupit televiziv kinez se si e ka filluar rrugën e tij të kinematografisë shqiptare, ai tha : "Fillimi i krijimtarisë sime është në liceun artistik "Jordan Misja", ku kam studiuar për art dramatik, me pikësynimin për t'u bërë aktor, sepse në atë kohë nuk ekzistonte kinematografia shqiptare. Gjatë kohës që unë studioja në atë shkollë, nisën të xhirohen filma dokumentarë, por me kineastë të huaj, që xhironin për Shqipërinë. Pikërisht gjatë asaj kohe dëgjova për artin kinematografik. Por artin kinematografik e kam dashur me zemër që fëmijë, kur luanim me copa filmash, duke marrë portretet e artistëve të dëgjuar, duke i shkëmbyer me njëri-tjetrin. Më vonë mbarova liceun artistik e m'u dha bursa për studime të larta në Çekosllovaki, në Fakultetin e Filmit në Pragë, të quajtur 'Famu'." (Zhai)