Chen Danqing lindi në qytetin Shangai të Kinës lindore. Kur ishte i vogël, ai pati kontakte rastësore me pikturën perëndimore dhe filloi t'i pëlqejë ky art. Në vitin 1970, në Kinë po zhvillohej "Revolucioni i kulturës", 17-vjeçari Chen Danqing u largua nga vendlindja dhe shkoi në një fshat të provincës Jiangxi për punë. Në Jiangxi, Chen Danqing punonte çdo ditë në bujqësi dhe nuk e dinte se kur do të merrte fund një jetë e tillë. Për të lehtësuar vetminë e vet, në kohën e lirë, Chen Danqing vizatonte pa pushim. Më vonë, ai u bë një piktor profesional në një fabrikë fshatare të kutive të hirit. Chen Danqing kujton:

"Detyra ime ishte që të vizatoja diçka nëpër kuti, për shembull pemë, male etj. Vizatova mbi 600 kuti të tilla."

Kjo eksperiencë nxiti përparimin e aftësisë vizatuese të Chen Danqingut. Më vonë, ai vizatoi edhe piktura të reklamës, ilustrime etj. Megjithëse Chen Danqingu nuk ishte trajnuar profesionisht, pikturat e tij ishin bërë të famshme në fshatin ku banonte ai.

Në shtator të vitit 1976, Chen Danqing shkoi në Tibet për vizatime. Në atë kohë, vdiq ish-kryetari i Kinës Mao Cedong dhe populli kinez u zhyt në vuajtje. Rreth kësaj ngjarjeje, Chen Danqing krijoi një pikturë të madhe me bojra vaji "Lotë në tokë bujqësore" që portretizonte hidjërimin e disa fshatarëve tibetianë kur dëgjuan lajmin e vdekjes së kryetarit Mao. Kjo vepër mori pjesë në ekspozitën kombëtare të pikturave dhe fitoi vlerësim të lartë nga qarqe të ndryshme. Si rezultat, emri Chen Danqing u përhap shpejt në qarqet e artit figurativ, shumë të rinj që merreshin me krijimin e pikturës me bojra vaji e vizituan posaçërisht Chen Danqingun për mësim.

Piktura "Lotë në tokë bujqësore" i solli Chen Danqingut nderim të lartë, por ai nuk ishte i kënaqur me këtë sukses. Në fillim të vitit 1978, Chen Danqing mori pjesë në provimet e aspirantit të shkollës së lartë për mbarë vendin dhe u pranua nga Universiteti Qendror i Artit i Kinës.

Në këtë universitet, Chen Danqing mësoi sistematikisht teorinë e vizatimit perëndimor duke filluar jetën e tij profesionale si piktor. Pas dy vjetëve, Chen Danqing vizitoi përsëri Tibetin dhe krijoi veprën e shquar "Një sërë pikturash të Tibetit". Në tetor të vitit 1980, në ekspozitën e veprave të aspirantëve të diplomuar të Universitetit Qendror të Artit, vepra e Chen Danqingut bëri bujë të madhe dhe u bë një monument në historinë moderne të artit figurativ të Kinës.

Megjithëse pati sukses të madh, Chen Danqing ishte i mendimit se kishte edhe shumë të meta në veprat e tij dhe ai duhet të mësonte pandërprerje. Në vitin 1982, Chen Danqing shkoi në SHBA për studime sepse në SHBA ai mund të shihte shumë vepra të piktorëve të famshëm perëndimorë. Gjatë 18 vjetëve në SHBA, Chen Danqing krijoi shumë vepra duke grumbulluar përvojë dhe aftësia e tij u ngrit më tej.

Në vitin 2000, Chen Danqing u kthye në atdhe dhe u bë me ftesë profesor i Institutit të Artit të Universitetit Qinghua. Kthimi i tij në atdhe u solli qarqeve artistike vendëse më tepër freski. Pikëpamjet artistike dhe stili i veçantë i mësimdhënies të Chen Danqingut kanë pasur ndikim të madh në fushën e arsimit artistik të Kinës. Gajtë mësimdhënies, Chen Danqing thekson të zhvillohet plotësisht talenti i studentëve. Shumë propozime të tij janë pranuar nga specialistë të arsimit artistik duke tërhequr vëmendjen e organeve arsimore të Kinës.

Pas një viti, Chen Danqing dha dorëheqjen nga funksioni i profesorit dhe u bë një piktor i lirë. Krahas të qenit piktor, Chen Danqing është edhe një shkrimtar. Atij i pëlqen edhe shumë muzika. Në vitin 2002, Chen Danqing botoi librin "Shënimet muzikore të Chen Danqingut" ku shënohen përshtypjet e tij për muzikën kur ai banonte në SHBA. Në këtë libër, Chen Danqing diskuton me fjalë të thjeshta disa tema që tërheqin vëmendjen e adhuruesve të muzikës. Më vonë Chen Danqing botoi edhe disa libra që kanë fituar përshëndetjen e lexuesve. Chen Danqing u shpreh:

"Redaktori më tha se çdo libër imi shitet shumë mirë në treg. Jam i mendimit se librat e mi pasqyrojnë mendimet e shumë lexuesve." (Fani)