Pasi ka fituar gjithsej 106 medalje të arta në karrierën sportive, ai ka krijuar vërtet një magji botërore në gjimnastikë. Bashkë me mbretin e futbollit Pele, mbretin e boksit Muhamed Ali, Majkëll Jordanin, etj. ai është cilësuar si një nga 25 sportistët më të famshëm të botës për shekullin e 20-të. Ai quhet Li Ning, princi i gjimnastikës.

Për të gjithë sportdashësit e Kinës, emri i tij është simbol i nderit dhe i suksesit. Gjatë karrierës së tij 17 vjeçare sportive, Li Ning ka fituar gjithsej 106 medalje të arta, 14 ndër të cilat janë fituar në kampionate botërore dhe në Lojërat Olimpike. Deri tani, arritjet e tij në gjimnastikë janë të pashoqe në mbarë botën.

Li Ning ka lindur në vitin 1963 në qytetin Liu Zhou të Kinës jugore. I ati ishte mësues muzike. Kur ishte i vogël, Li Ning ishte shumë i gjallë dhe kishte më shumë interes për sportin. Prandaj, i ati e dërgoi në shkollë sportive për stërvitje profesioniste. Në vitin 1973, kur ishte vetëm 10 vjeçar, ai fitoi titullin kampion në gjimnastikën e lirë në kampionatin kombëtar të gjimnastikës për të rinj. Ky është titulli i parë kampion i tij.

Në vitin 1980, Li Ning hyri në kombëtaren kineze të gjimnastikës dhe pas stërvitjes së rreptë 2 vjeçare, ai kishte përvetësuar një sërë lëvizjesh të vështira. Në vitin 1982 në kampionatin e 6-të botëror të gjimnastikës, Li Ning fitoi gjithsej 6 medalje të arta, duke shënuar një rekord të ri botëror në gjimnastikën për meshkuj. Agjencia e lajmeve Reuter komentoi: "Sonte filloi periudha e re e dominimit nga kinezët të gjimnastikës botërore."

Në vitin 1983 në kampionatin e 22-të botëror të gjimnastikës, ekipi kinez i gjimnastikës i kryesuar nga Li Ning fitoi ndaj ekipit të ish-Bashkimit Sovjetik, duke fituar për herë të parë titullin kampion si ekip.

Në vitin 1984 në Lojërat Olimpike të Los Anxhelosit, Li Ning fitoi gjithsej 3 medalje të arta, 2 të argjendta dhe 1 të bronztë dhe u bë olimpisti që ka fituar medaljet më të shumta olimpike, gjë që u quajt legjendë sportive. Të gjithë botën e bënë për vete 6 medaljet olimpike të Li Ningut dhe ai u shndërrua në nderin e të gjithë kinezëve. Ky ishte kulmi i karrierës së tij sportive.

Në vitin 1988, Li Ning mori pjesë në Lojërat Olimpike të Seulit, por për shkak të lëndimeve të shumta dhe presionit të madh psikologjik, ai nuk pati sukses. Në fund të vitit 1988, ai e mbylli karrierën e tij si sportist.

Pasi u largua nga gjimnastika, Li Ning tha: "Megjithëse jam larguar nga gjimnastika, unë nuk do të largohem nga sporti dhe do të bëj diçka lidhur me sportin..." Më pas, me ftesën e një biznesmeni, Li Ning hyri në fushën e tregtisë dhe filloi punën si tregtar.

Në vitin 1990, u formua zyrtarisht kompania e sendeve sportive "Li Ning" dhe Li Ning u bë kryemenaxheri i kësaj kompanie. Produktet e kompanisë, si këpucë sportive, veshje sportive, kanë fituar shumë çmime në Kinë. Tani, marka e produkteve të kompanisë është më e njohur se ky princ i gjimnastikës.

Pas përpjekjeve 10 vjeçare, Li Ning arriti përsëri sukses. Kompania e tij ka mbi 300 dyqane të firmave të njohura në tërë Kinën. Kompania "Li Ning" u bë kompania më e madhe sportive në Kinë dhe vëllimi i përgjithshëm vjetor i shitjes së mallrave arriti 700 milionë juanë.

Krahas arritjeve të mëdha tregtare, kompania e tij i ka dhënë edhe ndihmë të madhe zhvillimit të Kinës në sport. Pas formimit të kompanisë, Li Ning ka investuar mbi 80 milionë juanë për zhvillimin e sportit të Kinës.

Li Ning tha se ai dëshiron që e gjithë bota të shohë nëpërmjet arritjeve të tij zhvillimin e shpejtë të Kinës dhe ai do të ndihet shumë krenar për këtë. (Jiang Lei)