dëgjoni

Pak kohë më parë, zv-rektori i Universitetit Oxford të Anglisë Graham Upton erdhi posaçërisht në Pekin dhe i dha botuesit kinez Li Pengyi gradën e doktorit botues. Kjo është hera e parë që një universitet i huaj i jep botuesit kinez gradën e doktorit.

Li Pengyi është shumë i famshëm në qarqet e botimit të Kinës. Gjatë mbi 10 vjetëve, vëllimi i shtijes dhe fitimet e Shtëpisë Botuese të Gjuhëve të Huaja drejtuar nga ai janë shtuar mbi 100 herë. Në Kinë shumica e shtëpive botuese janë organe shtetërore dhe efektiviteti ekonomik është në përgjithësi jo i mirë. Prandaj Shtëpia Botuese e Gjuhëve të Huaja konsiderohet një shembull që përshtatet me ekonominë e tregut.

Duke folur për eksperiencën e vet, Li Pengyi tha:

"Eksperienca ime është shumë e thjeshtë. Para moshës 18-vjeçare, jetoja në fshat. Nga mosha 18 deri 21-vjeçare isha në ushtri, pastaj shkova në Universitetin e Gjuhëve të Huaja të Pekinit për studime. Pas diplomimit, hyra në Shtëpinë Botuese të Gjuhëve të Huaja për punë ku vazhdoj deri më sot."

Në vitin 1954, Li Pengyi lindi në një familje të varfër fshatare në provincën Hebei. Kur ishte i vogël, ideali i tij ishte që të bëhej një gazetar i radios. Pas diplomimit nga shkolla e mesme, Li Pengyi u pranua nga ushtria dhe u bë një ushtarak. Në vitin 1976, ushtria e dërgoi Li Pengyi në fakultetin e gjuhës angleze të Universitetit të Gjuhëve të Huaja të Pekinit për studime. Pas diplomimit, Li Pengyi hyri në Shtëpinë Botuese të Gjuhëve të Huaja dhe u bë një redaktor dhe qysh nga ajo kohë, fati i tij ndryshoi rrënjësisht.

Në vitin 1993, Li Pengyi u bë drejtor i Shtëpisë Botuese të Gjuhëve të Huaja. Nën drejtimin e Li Pengyit, tani Shtëpia Botuese e Gjuhëve të Huaja është bërë një nga shtëpitë botuese më të sukseshme të Kinës. Shtëpia Botuese e Gjuhëve të Huaja boton kryesisht libra akademikë e arsimorë, në vitin 2004, vëllimi i shitjes i shtëpisë botuese arriti në 1.2 miliardë juanë, shifër kjo që u shtua mbi 100 herë në krahasim me vitet' 90 duke krijuar kështu një mrekulli në fushën e botimit. Edhe Li Pengyi konsiderohet një botues i shquar. Li Pengyi tha:

"Kam njohje të thella për sektorin botues dhe e dua shumë këtë sektor. E konsideroj Shtëpinë Botuese të Gjuhëve të Huaja si familjen time."

Li Pengyi e falënderon shumë qeverinë kineze për politikën e reformës dhe të hapjes ndaj botës së jashtme. Nëpërmjet kësaj politike, ai mund të ushtrojë plotësisht talentin e vet. Pasi u bë drejtori i shtëpisë botuese, Li Pengyi ka zbatuar reformën e sistemit të administrimit dhe të përgatitjes së talenteve duke pasur efektivitet të mirë ekonomik dhe i ka hedhur një bazë të fortë zhvillimit të ardhshëm të shtëpisë botuese.

Njëkohësisht Li Pengyi është i mendimit se në krahasim me shtëpitë botuese të vendeve të zhvilluara, sektori botues i Kinës është ende i prapambetur. Për shembull, fitimet e shtëpisë botuese të tij janë shumë të pakta në krahasim me kompani të mëdha botuese ndërkombëtare. Në shtëpitë botuese të Kinës ka shumë dijetarë dhe specialistë, por në fakt një shtëpie moderne botuese i duhen edhe ekonomistë, avokatë, inxhinierë etj. Prandaj Li Pengyi dhe kolegët hartuan planin e zhvillimit të shtëpisë botuese dhe sipas këtij plani, në dhjetra vjetët e ardhshëm, Shtëpia Botuese e Gjuhëve të Huaja do të bëhet një grup i famshëm botues i komunitetit ndërkombëtar. Li Pengyi tha:

"Me zhvillimin e ekonomisë kineze dhe me ngritjen e pandërprerë të prestigjit ndërkombëtar të Kinës, në 20 vjetët e ardhshëm, Shtëpia Botuese e Gjuhëve të Huaja do të botojë shumë libra të kulturës, letërsisë dhe gjuhës kineze duke përfshirë këtu tekste e fjalorë dhe do të krijojë një vebsait për të ndihmuar të huajt të njohin Kinën e sotme dhe për të mësuar gjuhën kineze."

Përveç funksionit të drejtorit të Shtëpisë Botuese të Gjuhëve të Huaja, Li Pengyi është edhe nënkryetar i Shoqatës Botuese të Librave, Gazetave dhe Revistave të Kinës, nënkryetari i Shoqatës së Fjalorëve të Kinës etj. Pak kohë më parë, ai u bë edhe zv-rektor i Universitetit të Gjuhëve të Huaja të Pekinit që përgjigjet për ardhmëninë dhe zhvillimin e universitetit. (Fani)