dëgjoni

Më 20 dhjetor Drejtoria Statistikore Shtetërore e Kinës njoftoi një shifër e GDP-je të vitit 2004 16.8% më të madhe dhe rregulloi në të njëjtën kohë peshën specifike të vlerës shtesë të industrisë dhe të sektorit të shërbimeve në GDP. Analistët janë të mendimit se pas këtij rregullimi, përmasat e ekonomisë kineze janë zgjeruar dhe struktura e rritjes së saj është më racionale dhe më e shëndetshme.

Rregullimi i shifrës së prodhimit të përgjithshëm të Kinës për vitin 2004 është bërë në bazë të regjistrimit ekonomik kombëtar që sapo u krye. Shifra e re tregon se prodhimi i përgjithshëm i Kinës për vitin 2004 ishte 15.9878 trilionë juanë, duke u shtuar 2.3 trilionë juanë në krahasim me llogaritjen e mëparshme. Kështu që prodhimi i përgjithshëm i Kinës e kaloi atë të Italisë, duke zënë vendin e 6-të në botë. Por, kjo shifër e re tregon gjithashtu se GDP-ja e Kinës për frymë radhitet përsëri pas vendit të 100-të.

Drejtori i Drejtorisë Statistikore Shtetërore të Kinës z. Li Deshui tha se 90% e shifrës së shtuar në GDP ka ardhur nga vlera shtesë e sektorit të shërbimeve, si të transportit, sektorit ushqimor, shitjes me pakicë etj. Pas rregullimit, pesha specifike e vlerës shtesë të sektorit të shërbimeve në GDP është ngritur në 40.7% nga 31.9% që ishte. Z. Li tha se në regjistrimin e ri ekonomik në Kinë janë përfshirë shumë degë të reja të shërbimeve të pallogaritura në të kaluarën, prandaj kjo shifër e re përputhet më shumë me realitetin kinez dhe tregon se struktura e rritjes ekonomike të Kinës është më racionale dhe më e shëndetshme. Ai tha:

"Në arenën ndërkombëtare ekziston mendimi se rritja ekonomike e Kinës mbështetet kryesisht tek industria dhe eksporti i fuqishëm. Nga regjistrimi ekonomik del se sektori i shërbimeve ka luajtur rol të pamohueshëm në rritjen ekonomike të Kinës. Kjo tregon se ne kemi përmirësuar njohjen për strukturën ekonomike të Kinës dhe kemi shtuar besimin për një zhvillim afatgjatë dhe relativisht të shpejtë të Kinës në të ardhmen."

Shifra e re statistikore nuk e ka ndryshuar gjendjen themelore të ekonomisë kineze. Në procesin e zhvillimit ekonomik të Kinës ekzistojnë ende probleme të mëdha të mungesës së vendburimeve dhe të ndotjes së mjedisit. Z. Li tha se në vitin 2004, konsumi i naftës bruto, qymyrgurit dhe i çelikut në Kinë përbëri përkatësisht 7.4%, 31% dhe 27% të konsumit të përgjithshëm botëror, kurse GDP-ja zuri vetëm 4.4% të prodhimit të përgjithshëm botëror. Në të njëjtën kohë, të ardhurat mesatare për frymë janë ende të ulta, dhe një e dhjeta e popullsisë jeton në varfëri dhe ka nevojë për ndihmë. Z. Li tha:

"Mund të themi në mënyrë të prerë se shifrat statistikore të mëparshme të Kinës nuk ndikuan mbi politikën e saj makroekonomike, dhe as ky regjistrim ekonomik nuk do ta ndryshojë politkën e tanishme makroekonomike."

Siç mësohet, në planin e zhvillimit për 5 vjetët e ardhshëm, Kina ka vendosur të ngrejë më tej efektivitetin e shfrytëzimit të energjisë dhe cilësinë e rritjes ekonomike, në përpjekje që deri në vitin 2010, konsumi i energjisë i GDP-së për njësi të ulet 20% në krahasim me tani. Për të siguruar zhvillimin e qëndrueshëm ekonomik, Kina nuk do të ndryshojë politikën e tanishme të kursit valutor. Drejtori i Drejtorisë Statistikore Shtetërore të Kinës z. Li tha se rezultatet e këtij regjistrimi ekonomik nuk kanë lidhje direkte me politikën e kursit valutor. Praktika ka vërtetuar se reforma e sistemit të kursit valutor e zbatuar qysh në korrik të këtij viti është e suksesshme dhe kjo politikë do të vazhdojë edhe në të ardhmen.

Z. Li tha se për të nxitur zhvillimin e shëndetshëm të ekonomisë së saj, Kina do të shpejtojë më tej hapat e zhvillimit të sektorit të shërbimeve.

Ekonomisti i Akademisë së Shkencave Shoqërore të Kinës z. Juan Minggang e mbështet mendimin e këtij funksionari kinez. Ky ekonomist vuri në dukje se zhvillimi i mëtejshëm i sektorit të shërbimeve do ta pakësojë mbështetjen e zhvillimit ekonomik tek industria dhe energjia. Kjo është shumë e domosdoshme për rritjen e shëndetshme të ekonomisë kineze.

Siç mësohet, vitin që vjen, në Kinë do të bëhet regjistrimi bujqësor. Analistët shprehën mendimin se tani pesha specifike e bujqësisë në ekonominë kineze është shumë e ulët, kështu që rezultatet e regjistrimit bujqësor nuk do të ushtrojnë ndikim të dukshëm mbi prodhimin e përgjithshëm të ekonomisë kineze. (Pina)