Në vitin 1905, punonjësi më i herëshëm i filmit i Kinës Ren Qingtai xhiroi në studion fotografike Fengtai të Pekinit filmin e operës së Pekinit "Mali Dingjun". Ky është filmi i parë i Kinës dhe viti 1905 konsiderohet viti i lindjes së filmit kinez.

"Mali Dingjun" është një vepër e famshme e operës së Pekinit. Filmi "Mali Dingjun" është 10 minuta i gjatë dhe përfshin disa episode të shkëlqyeshme të operës.

Pas këtij filmi, studioja fotografike Fengtai xhiroi me radhë 7 filma të tjerë të operës së Pekinit ku kinoaktorë kryesorë ishin aktorë të famshëm të operës së Pekinit. Për fat të keq, më vonë studioja fotografike Fengtai pësoi fatkeqësinë e rënies së zjarrit dhe u detyrua të ndalonte veprimtarinë filmike.

Në vitet '20 të shekullit të kaluar, gradualisht filmi kinez ishte pjekur dhe dolën në dritë disa filma të shquar. Zoti Li Suyuan që studion historinë e filmit kinez tha:

"Jam i mendimit se vitet '20 të shekullit të kaluar ishin një periudhë e lulëzimit të filmave të hershëm të Kinës. Në atë kohë, sektori i prodhimit të filmave xhiroi shumë filma sipas kërkesave të shikuesve. Këta filma ishin të llojeve të ndryshme, si filma me temën e dashurisë, filma historik, filma artistikë, filma familjare etj."

Nga viti 1922 deri në vitin 1926, në krahina të ndryshme të Kinës u krijuan 175 shoqëri filmi e vetëm në qytetin e Shangait kishte 145 shoqëri të tilla. Shumë shoqëri bënë kërkime të guximshme në fushën e artit duke nxitur zhvillimin e artit filmik. Në vitin 1923, shoqëria "Ylli" xhiroi filmin artistik "Nipi shpëton gjyshin" dhe pati sukses të madh si në fushën e artit ashtu edhe në fushën e tregtisë. Skenaristi i këtij filmi Zheng Zhengqiu është një nga krijuesit e filmit të Kinës. Ai mbante përgjegjësi të lartë shoqërore dhe ishte i mendimit se filmi duhet t'i kushtojë vëmendje jetës reale duhet të mbajë përgjegjësi për nxitjen e progresit shoqëror. Kjo është pikërisht tradita e mirë e filmit kinez.

Në vitet '30 të shekullit të kaluar, me shpërthimin e luftës agresive japoneze ndaj Kinës, në Kinë dolën një sërë filmash që pasqyronin jetën reale. Në atë kohë, filmat kinezë u kushtonin më shumë vëmendje të varfërve dhe njerëzve të zakonshëm e njëkohësisht niveli artistik i tyre u ngrit më tej.

Në vitin 1934, filmi "Këngët e peshkatarëve" pati jehonë të madhe shoqërore. Ky ishte një film tragjik që përshkruante jetën e mjerueshme të një familjeje peshkatarësh në atë kohë. Në vitin 1935, ky film fitoi çmimin e nderit në festivalin ndërkombëtar të filmit të Moskës. Kjo ishte hera e parë që një film kinez fitonte çmim në një festival ndërkombëtar filmi.

Në vitet '30 e '40 të shekullit të kaluar, me zhvillimin e pandërprerë të filmit kinez, lindën edhe shumë yje filmi. Në vitin 1934, aktorja Zhou Xuan interpretoi në filmin "Engjëlli në rrugë" rolin e një këngëtareje të bukur. Në këtë film ajo këndoi motivin bazë dhe u bë e famshme për shkak të kësaj kënge të këndshme. Gjatë gjithë jetës së saj Zhou Xuan ka interpretuar role në mbi 40 filma dhe ka kënduar mbi 100 këngë filmi. Fytyra e bukur dhe zëri i këndshëm i Zhou Xuanit i kanë prekur thellë shikuesit dhe njerëzit e kanë quajtur atë "Gryka e artë".

Edhe Ruan Lingyu ishte një yll filmi me magji të përhershme në zemrat e shikuesve kinezë. Në filmin "Vajza e shenjtë", ajo interpreton një prostitutë. Interpretimi i saj është i natyrshëm dhe i vërtetë. Ky film konsiderohet si kulmi i filmave të hershëm kinezë.

Filmat e hershëm kinezë nga viti 1905 deri në vitin 1949 jo vetëm zënë një vend të rëndësishëm në historinë e filmit të Kinës, por edhe kanë pasur ndikim të gjerë në vende të ndryshme të botës. Profesori Cheng Jihua që studion historinë e filmit të Kinës u shpreh:

"Kam qenë 3 herë në SHBA për mësimdhënie. Studentët e ardhur nga vende të ndryshme të botës kanë interes të madh për filmat e hershëm të Kinës dhe vlerësojnë se këta filma mund të krahasohen me çdo film të shquar të atëkohshëm botëror." (Fani)