Sejgeni 70-vjeçar tha i emocionuar: "Ditën, gjeneratori prodhon dhe akumulon rrymë elektrike, kurse në mbrëmje, ne e përdorim atë për ndriçim dhe për të parë televizor. Që kur nisëm të përdorim gjeneratorin elektrik, jeta jonë është bërë e larmishme." Dhe ai ka të drejtë. Më parë, meqë nuk kishte energji elektrike në stepë, blegtorët bënin një jetë monotone, siç thoshnin ata vetë, "kur lind dielli, çojmë bagëtitë në kullotë; kur perëndon, kthehemi dhe flemë". Kurse sot, energjia diellore dhe rryma elektrike e prodhuar me fuqinë e erës, që quhen "energjia e blertë", kanë hyrë në shtëpi të blegtorëve, si rezultat, ka ndryshuar krejt jeta e tyre.

Kushtet specifike gjeografike dhe klimatike në rajonin autonom Sinkiang-ujgur kanë krijuar vendburime të pasura energjie: energji diellore dhe energji të erës. Qysh para 5 a 6 vjetëve, blegtorët në disa stepa të mëdha të Sinkiangut filluan të shfrytëzojnë energjinë diellore dhe të prodhojnë energji elektrike me fuqinë e erës.

Blegtori Sejgen tha: "Në vitin 2000, djali im pa se fqinji ynë kishte blerë një gjenerator elektrik me fuqi të erës, që punonte shumë mirë, prandaj ai deshi që edhe ne të blinim një nga ato. Unë shita një lopë, një viç dhe një dash dhe bleva një gjenerator të lehtë elektrik me fuqi të erës." Ai tha se antenën e televizorit e kishte bërë djali i tij me duart e veta. Me televizorin e tij, ata mund të kapin dy programe televizive në gjuhën kazake dhe dy të tjera në gjuhën hane. Në përgjithësi, energjia elektrike, që gjeneratori i tyre prodhon dhe akumulon në ditë, mjafton për t'u përdorur 4 a 5 orë në mbrëmje.

Më parë, blegtorët e Sinkiangut bënin një jete endacake, kurse tani, pjesa më e madhe e tyre kanë filluar të jetojnë në banesa fikse. Megjithatë, në pranverë dhe verë, ata ende kanë nevojë të jetojnë 6 muaj në kullotat e stinëve të beharit. Për arsye se stepat janë shumë të gjera dhe kanë pak banorë, rrjeti elektrik nuk ka arritur te shtëpitë e këtyre blegtorëve. Siç thonë blegtorët, në fillim, përdorimi i energjisë diellore dhe i energjisë elektrike me fuqinë e erës ishte alternativë e detyrueshme për ta. Blegtorja Anarhan, që jeton në stepën Narati të Sinkiangut, tha: "Në fillim, shumë prej nesh e kishin të vështirë të pranonin përdorimin e energjisë diellore dhe energjisë elektrike me fuqinë e erës, kurse më vonë, të gjithë i kuptuan të mirat e këtij varianti dhe tani nuk mund të jetojmë pa të." Me qëllim që e bija të lexojë mirë, Anarhani bleu posaçërisht një abazhur tryeze dhe, sa herë që e bija fillon të lexojë, ajo mbyll menjëherë televizorin, që të sigurohet energjia elektrike për ndriçim.

Energjia e blertë jo vetëm u ka sjellë familjeve të blegtorëve të stepave shumë gëzime në jetën e përditshme, por edhe u ka krijuar atyre kushte për të marrë informacione dhe për të vendosur lidhje me jashtë.

Familja e blegtorit Ge Liangjin të kombësisë Hui, që jeton në stepën Narati, është relativisht e pasur. 5 vjet më parë, ai shpenzoi 6000 juanë dhe bleu një gjenerator elektrik me energji diellore. Më vonë, ai bleu edhe një gjenerator elektrik me fuqi të erës. "Me energjinë elektrike të prodhuar me gjeneratorin e energjisë dillore nuk ngarkohet dot akumulatori i një televizori 25 inch, sepse ka tension të ulët", tha ai. "Prandaj bleva edhe një gjenerator elektrik me fuqi të erës, që përdoret posaçërisht për të parë televizor. Kështu, gjeneratori elektrik me energji diellore prodhon rrymë elektrike për ndriçim dhe për të ngarkuar bateritë e celularit." Ge Liangjin e përdor celularin për të komunikuar me jashtë dhe për të marrë vesh gjendjen e tregut të mallrave bujqësore dhe blegtorale.

Lidhur me koston e energjisë së blertë, Ge Liangjin tha: "Një pajisje e ngarkimit të akumulatorit të energjisë diellore kushton 2000 juanë dhe një gjenerator elektrik me fuqi të erës kushton 3000 juanë. Ky çmim duket i lartë, por në fakt, është i ulët në krahasim me atë të rrjetit elektrik."

Kina ka vendburime të pasura të energjisë së erës dhe të energjisë diellore. Vendburimet e këtyre energjive në rajonet e Sinkiangut dhe të Mongolisë së Brendshme përbëjnë 70% të mbarë vendit. Shfrytëzimi i energjisë së erës dhe energjisë diellore për prodhimin e energjisë elektrike do të jetë një rrugëdalje e rëndësishme për zgjidhjen e problemit të energjisë në Kinë, e cila është një vend i madh në botë përsa i përket konsumit të energjisë. (Zheng)