Në një dyqan të posaçëm të mallrave olimpike, korrespondenti pa shumë konsumatorë që po blinin maskotët Fuwa. Z. Lu Lin fatmirë bleu serinë e fundit të maskotëve Fuwa:

"Kam blerë një seri, këto i kam blerë për një mikun tim që jeton në një qytet tjetër."

Ndërsa zonjusha Jiang Jin nuk ishte kaq me fat, ajo i tha e dëshpëruar korrespondentit se nuk mundi të blejë dot një seri maskotësh Fuwa, ndaj u detyrua të blejë një shami të mëndafshtë me figurat e këtyre maskotëve:

"Dëshiroj shumë të blej një seri maskotësh Fuwa për kujtim, kam ardhur 2-3 herë, por gjithmonë shitësja më tha se ishin mbaruar."

Maskotët Fuwa të Lojërave Olimpike të Pekinit janë 5 figura të dashura dhe simpatike Beibei, Jingjing, Huanhuan,Yingying dhe Nini. Në figurat e tyre janë futur elementet figurative të peshkut, pandës, flakës olimpike, antilopës së Tibetit dhe të dallëndyshes. Emrat e 5 maskotëve Fuwa të lidhur bashkë do të thonë: Pekini të mirëpret.

Me të dalë në dritë maskotët Fuwa janë mirëpritur nga të gjithë. Jo vetëm kinezët i parapëlqejnë figurat e tyre të gjalla, por ato tërheqin edhe vëmendjen e të huajve. Zj. Anna Allabert nga Rusia tha:

"Më pëlqejnë shumë maskotët Fuwa, sepse ata kanë karakteristika kineze. Do të blej patjetër disa për t'ua dhuruar miqve të mi për kujtim."

Edhe zj. Suenaga Yuki nga Japonia shprehu gëzimin e saj:

"Këta maskotë janë më simpatikë se sa e përfytyroja, do të përpiqem të blej një seri."

Ndërsa zj. Samantha Sowassey dëshiroi t'i çojë në shtëpi këta maskotë si dhuratë:

"Maskotët e Lojërave Olimpike të Pekinit janë 5, janë shumë interesantë. Mua më pëlqen më shumë figura e pandës Jingjing. Do të blej një seri dhe do t'ua dhuroj nipave të mi."

Përgjegjësja e dyqanit të posaçëm të mallrave olimpike të Pekinit, zj. Wang Xiaoyan u shpreh se llojet e mallrave me figurat e maskotëve Fuwa janë mbi 300, si shami të mëndafshta, bluza sportive, sende për të shkruar, stema etj. Por blerësit kinezë dhe të huaj parapëlqejnë më shumë maskotët Fuwa. Ajo i tha korrespondentit se kohët e fundit mallrat olimpike janë shitur shumë mirë.

" Në të kaluarën vëllimi ditor i shitjes ishte 10 ose 20 mijë juanë. Gjatë një muaji pas publikimit të maskotëve Fuwa, vëllimi i shitjes ka arritur në 10 milionë juanë, ndërsa vëllimi më i lartë ditor i shitjes arriti në një milion juanë. "

Tani në Kinë ka 28 dyqane të posaçme të mallrave olimpike dhe 160 pika të përkohshme shitjeje. Mallrat me figurat e maskotëve Fuwa mund të blehen në qytetet kryesore Pekin, Shanghai, Shenzhen, Qindao, Nanjing, Chengdu etj.

Anëtari i Komitetit të ekonomistëve të Lojërave Olimpike, profesor i Institutit të Tregtisë pranë Universitetit të Popullit Kinez, z. Lu Dongbin parashikon se vlera e tregut të maskotëve Fuwa do t'i kalojë të 300 milionë dollarët amerikanë.

Lidhur me këtë, korrespondenti shkoi për vizitë në një fabrikë të prodhimit të maskotëve Fuwa. Ai pa se punëtorët punonin me të gjitha forcat, por çdo punëtor prodhonte vetëm 18 copë në ditë, kështu që nuk mund të plotësojnë me produkte kërkesat e tregut.

Korrespondenti mësoi se me publikimin e maskotëve Fuwa, në tregun kinez të letrave me vlerë jo vetëm shoqëritë për ndërtimin e infrastrukturës sportive dhe të prodhimit të materialeve të ndërtimit që kanë të bëjnë me Lojërat Olimpike, por edhe shoqëritë që janë autorizuar të prodhojnë dhe të shesin mallrat me figurat e maskotëve Fuwa kanë tërhequr vëmendjen e të gjithëve.

Për të shfrytëzuar më mirë tregun e maskotëve Fuwa, Komiteti Organizativ i Lojërave Olimpike ka marrë masa ligjore për të mbrojtur të drejtën intelektuale. (Pina)