Një shpirt i hareshëm mbi akull

Historia e hokejit në akull, e këtij sporti mjaft të njohur në Evropë e në Shtetet e Bashkuara, në Kinën kontinentale është deri diku e shkurtër. Tradicionalisht, në Kinë banorët e veriut të saj janë dashamirës të sporteve "të ftohta". Çdo dimër, kur liqenet nëpër parqe ngrijnë, qytetarë të pajisur me mjetet e duhura, të rinj e të moshuar, burra e gra, dalin për zbavitjet e tyre dimërore. Edhe në ditët me erën që të pret dashamirët e sporteve në akull nuk e lënë pas dore veprimtarinë e tyre të parapëlqyer. Kjo pjesëmarrje masive ka hedhur bazat për popullaritetin e hokejit në akull ndërmjet studentëve pekinas. Hokeji në akull njëherë e një kohë ka qenë një garë shumë e përhapur ndërmjet universiteteve të Pekinit. Gjatë viteve '50 të shekullit të kaluar madje skuadra e hokejit në akull e Universitetit të Pekinit kishte dy pjesëtarë nga ish-Çekosllovakia. Ende edhe sot shumë ish-studentë të Universitetit të Pekinit flasin me krenari për teknikat e tyre të shkëlqyera të rrëshqitjes dhe për pasimet e tyre të mrekullueshme.

Në ditët e sotme, gjithnjë e më shumë fëmijë në Pekin po interesohen për hokejin në akull. Çdo mbrëmje, sidomos gjatë fundjavëve, stadiumet e akullit shndërrohen në parajsën e fëmijëve. Disa syresh i befasojnë shikuesit me teknikat e tyre, teksa nga ana tjetër shërbejnë si shembuj për të tërhequr në këtë sport moshatarë të tjerë të tyre. Ashtu si fushat e tenisit dhe klasat e pianos, stadiumet e akullit janë bërë një vend tjetër ku prindërit i dërgojnë fëmijët për të ushtruar aftësitë e tyre.

Ndonëse disi topolak, Zhou Youliang, vetëm 8 vjeç, ka dy vjet që merret me hokejin në akull. Dy vjet më parë, djaloshi i vogël u njoh me hokejin në akull dhe ra në dashuri me të. Një javë më vonë e ëma e regjistroi në një kurs stërvitjeje të hokejit në akull. Dashuria e Zhou-t për këtë sport mbështetet si financiarisht, ashtu edhe mendërisht nga e ëma. Ndonëse Zhou shkon për t'u stërvitur dy herë në javë, e ëma e shoqëron gjithnjë. Ajo i ka blerë gjithashtu edhe të gjitha pajisjet që duhen.

Kur vjen fjala për fizikun e Zhou-t, e ëma e tij flet çiltër se, ndonëse është e vërtetë së Zhou-ja vjen ca topolak, pesha e tij kontrollohet mirë nga ushtrimi i tij dyvjeçar në hokejin në akull. Dhe ai është më i gjatë se bashkëmoshatarët e tij. Ajo shton gjithashtu se qëllimi i saj kryesor nuk është që Zhou-ja në të ardhmen të bëhet një sportist profesionist, por që të nxitë vetëdisiplinën tek ai. Dy vjet stërvitje e kanë forcuar djaloshin. Edhe pse ndonjëherë këmbët e tij lëndohen gjatë ushtrimeve, Zhou e vazhdon stërvitjen si zakonisht. Nëpërmjet hokejit në akull, djalosh i vogël ka mësuar shumë për këmbënguljen. Gjatë këtyre dy vjet stërvitjeje, ai nuk ka lënë pa shkuar qoftë edhe një orë të vetme në kurs dhe shfaqet përpara trajnerit të tij plot shpirt.

Popullarizimi i hokejit në akull në Kinë

Nëse stërvitja e Zhou-t është një arritje vetjake, atëherë programi i shkëmbimit të një skuadre nxënësish 7-10 vjeçarë kinezë, që vizituan ShBA-në, është një "ngjarje zyrtare" tipike. Këta lojtarë të vegjël zhvilluan tri ndeshje miqësore me skuadrën e hokejit në akull të të rinjve të Baltimores dhe mësuan teknika të reja të shumta.

Për të tejkaluar mungesën e arenave të lira sportive e për të nxitur hokejin në akull, Pekini po zhvillon tani hokejin me rrota. Hokeji me rrota është shumë i ngjashëm me hokejin në akull, por këtu lojtarët veshin patina me rrota, duke i dhënë ndeshjes një efekt të këndshëm pamor, pa pasur nevojë për akull.

Fan Guozhu, drejtor i Departamentit të Hokejit në Akull të Qendrës së Menaxhimit të Sporteve Dimërore të Administratës së Përgjithshme Shtetërore të Sporteve të Kinës shprehet se hokeji me rrota luan një rol të rëndësishëm në procesin e popullarizimit të sporteve dimërore në Kinë. Si Turneu Kombëtar i Hokejit me Rrota, ashtu edhe vizita e skuadrës së fëmijëve në Shtetet e Bashkuara për shkëmbim sportiv këtë vit do të nxitin më tej njohjen e këtij sporti prej të rinjve.

Të tjera sporte të parapëlqyera prej studentëve të Pekinit

Përveç hokejit në akull, fleg futbolli dhe bejsbolli nuk duhen lënë mënjanë kur flitet për sportet më të reja të përhapura ndër studentët e Pekinit. Me fleg futbollin mund të merren si djemtë, ashtu edhe vajzat e moshës 8-14 vjeçare. Ky sport u shfaq në Kinë në vitin 2003. Programi u zhvillua shkallë-shkallë në 60 shkolla të mesme në Pekin, Shangai e Guangzhou, e tani bëhen kampionate ndërmjet shkollave. Pekini, qyteti i parë në Kinën kontinentale që përqafoi fleg futbollin, është gjithashtu i vetmi qytet ndër tre të sipërpërmendurit që ka lojtare femra që marrin pjesë në ndeshjet e kampionatit.

Sa për bejsbollin, për studentët pekinas ai është diçka shumë e njohur. Që kur shkolla e parë e bejsbollit në Kinën kontinentale u krijua në Pekin në prill 1988, programi, i miratuar nga Shoqata Kineze e Bejsbollit, ndihmoi që sporti në fjalë të bëhej gjithnjë e më i njohur në universitete, shkolla të mesme e madje edhe në shkolla fillore në Pekin. Sot shumë universitete të Pekinit, si Universiteti Tsinghua, Universiteti i Pekinit, Universiteti Teknoligjik i Kinës Veriore, Universiteti Normal i Pekinit dhe Universiteti i Ekonomisë dhe Biznesit Ndërkombëtar e kanë futur bejsbollin në kurset e tyre të edukimit fizik. (Artani)