Zonja Y Minyin është një fshatare në provincën Sëçuan të Kinës. Para 5 vjetëve ajo u sëmur nga kolesistitisi. Gjatë këtyre vjetëve, ajo ka pirë gjithmonë ilaçe të mjekësisë kineze për mjekimin e kësaj sëmundjeje. Shpenzimet janë vetëm 100 juanë në vit, por efekti është i mirë. Para disa ditëve, ajo u sëmur përsëri nga gripi dhe shkoi në spital. Pasi piu ilaçe të mjekësisë kineze për dy ditë me radhë, ajo u shërua. Kësaj here ajo shpenzoi vetëm 12 juanë ( afro l.5 dollar amerikanë ).

Gjatë vizitës në ambulancën e fshatit Y Tan të provincës Sëçuan, korrespondenti i radios sonë vuri re se shumë fshatarë vinin te doktorët e mjekësisë kineze. Një fshatare i tha korrespondentit se ilaçet e mjekësisë kineze janë me pak efekte negative dhe çmimet janë të lira. Kur sëmuremi, ne dëshirojmë të pimë ilaçe të mjekësisë kineze.

Sipas një hetimi, shpenzimet në ambulancat e mjekësisë kineze janë 20 deri 30% më të ulëta se në ato të mjekësisë moderne.

Për arsye se ilaçet e mjekësisë kineze mirëpriten nga fshatarët, vitet e fundit në fshatrat e provincës Sëçuan është krijuar rrjeti i shërbimeve të mjekësisë kineze dhe në 80% të distrikteve të kësaj province janë ngritur spitale të posaçme të mjekësisë kineze, të cilat u japin fshatarëve shërbime të sigurta e efektive mjekësore.

Krahas kësaj, provinca Sëçuan ka bërë përpjekje të mëdha për përgatitjen e punonjësve të mjekësisë kineze, Që nga viti 1998 e deri tani ajo ka përgatitur 1200 punonjës të tillë për spitalet dhe ambulancat, të shpërndara në fshatrat e kësaj province.

Drejtori i Drejtorisë Administrative të Ilaçeve të Mjekësisë Kineze të provincës Sëçuan, z. Yan Tianxing u shpreh se nëpërmjet forcimit të shërbimeve me ilaçet e mjekësisë kineze, është zgjidhur në një farë shkalle problemi i mjekimit dhe është garantuar shëndeti i fshatarëve.

Provinca Sëçuan është një nga provincat me popullsinë më të madhe në Kinë, ndërsa fshatarët përbëjnë pjesën dërmuese të saj. Në këto provinca me popullsi të madhe fshatare ilaçet e mjekësisë kineze luajnë një rol gjithnjë e më të madh në mjekimin e sëmundjeve të fshatarëve.

Për të përkrahur zhvillimin e mjekësisë kineze në fshat, sivjet qeveria kineze dha 100 milionë juanë në ndihmë të provincave të varfra, të distrikteve me pakica kombëtare dhe të rajoneve të largëta, dhe në 5 vjetët e ardhshëm ajo do të vazhdojë të investojë në përmirësimin e mëtejshëm të infrastrukturës së spitaleve të mjekësisë kineze në rajonet e sipërpërmendura. ( Zhang )