Vatrat ekologjike u kanë sjellë fshatarëve leverdi të madhe

Familja e fshatarit Çang Guoxian të fshatit Xivuçakou të distriktit Linzhang të provincës Hëbei është bërë një familje shembullore e këtij fshati në ndërtimin e vatrave ekologjike. Në vitin 1999, familja e tij ndërtoi një hauz të gazit metan dhe bëri transformimin e kuzhinës, nevojtores dhe stallave të kafshëve shtëpiake. Për këtë punë, bashkëfshatarët e quajtën familjen e tij "familjen e hauzit të metanit dhe reformës së tri instalimeve bazë të fshatarëve".

Hauzi i gazit metan i familjes së Çang Guoxianit është plotësisht i mbyllur me një kapak dhe ndodhet nën tokë, prandaj nuk zë aspak tokë. Ndërsa sipër hauzit, janë stallat dhe nevojtorja. Kashta dhe mbeturinat shkojnë në hauz dhe, pas fermetimit, nxirret gaz metan, i cili shfrytëzohet si lëndë djegëse për gatuarje dhe për ndriçim. Kurse disa materiale të lëngëta shfrytëzohen si plehra të mira organike.

Çang Guoxian tha se çdo familje duhet të shpenzojë në përgjithësi 2500 juanë për të ndërtuar një hauz të gazit metan dhe për të transformuar kuzhinën, nevojtoren dhe stallat, por meqenëse shteti u jep atyre subvencion për këtë punë, vetë familjet nuk paguajnë shumë.

Ata jetojnë njësoj si qytetarët

Fshatarët e Xivuçakous kënaqen jo vetëm për rritjen e efektivitetit ekonomik, por edhe për përmirësimin e mjedisit të banimit dhe për ndryshimin e mënyrës së jetesës në fshatin e tyre.

E shoqja e Çang Guoxianit e ndien veten veçanërisht të gëzuar për përmirësimin e kushteve të kuzhinës së saj. Ajo tha: "Më parë, disa thoshin se kudo në fshat shiheshin ndyrësira, sepse muret e kuzhinave të fshatarëve ishin të nxira nga tymi, kurse nevojtoret dhe stallat lëshonin erë të qelbur. Ndërsa, me ndërtimin e hauzeve të metanit, fshatrat kanë marrë një pamje krejt të re." Dhe ka të drejtë kjo grua shtëpiake. Sot furra e kuzhinës së saj është ndërtuar me pllaka porcelani dhe duket shumë e pastër. Ajo vazhdoi: "Më parë, mua më duhej një orë për të gatuar dhe vuaja nga tymi. Kurse tani, më duhen vetëm 20 minuta për të gatuar. Unë them me dy fjalë: shpejt dhe pastër." Ajo tha se gazi metan e "çliroi" atë.

Fshati Xivuçakou ka 200 familje dhe 162 prej tyre kanë sot hauz të metanit. Ky fshat ka edhe 30 serra perimesh dhe disa kopshte pemësh frutore me një sipërfaqe prej 14 hektarësh. Megjithëse të gjitha familjet e këtij fshati vazhdojnë të mbajnë kafshë shtëpiake, mjedisi është i pastër në tërësi. Ky fshat ka sot edhe qendra argëtimi dhe sportive, ka fusha volejbolli, pingpongu, badmintoni dhe basketbolli.

Çang Guoxian tha: "Sot ne mund të kalitemi në kohën e lirë." Ai shkon shpesh herë edhe në "Bibliotekën e librave të shkencës dhe teknikës" të fshatit të tij. Lidhur me këtë, ai u shpreh: "Sot edhe ne kemi kushte të lexojmë libra dhe gazeta, të mësojmë shkencën dhe teknikën. Prandaj themi se ne jetojmë gjithnjë e më shumë si qytetarët."

Vatrat harmonike u kanë pëlqyer fshatarëve

Lidhur me zbatimin në këtë fshat të "Planit të mirëqenies së fshatarëve me ndërtimin e vatrave të tyre ekologjike", foli gjatë zoti Bai Jinming, kryetari i degës së arsimit të Ministrisë së Bujqësisë të Kinës. Ai tha: "Plani i mirëqenies së fshatarëve me ndërtimin e vatrave të tyre ekologjike" zbatohet me nismën e ministrisë sonë. E kemi hartuar këtë plan duke u nisur nga kushtet energjetike, klimatike dhe gjeografike të krahinave të ndryshme dhe në bazë të ligjit natyror dhe ligjit të ekonomisë së tregut. Me zbatimin e këtij plani, do të arrihet objektivi i "pastërtisë së mjedisit të banimit, efektivitetit të lartë ekonomik dhe mosndotjes së mjedisit të prodhimit bujqësor".

Zoti Bai Jinming tha gjithashtu: "Pika më e rëndësishme e këtij plani është shfrytëzimi i gazit metan, energjisë biologjike dhe energjisë diellore. Uji dhe gazi i përdorur si dhe mbeturinat e tjera, pas përpunimit, shndërrohen në lëndë djegëse, plehra organike dhe silazh për kafshët, gjë që jep efektivitet të mirë ekonomik, shoqëror dhe ekologjik. Kur çdo familje dhe çdo fshat të arrijë pastërtinë e shtëpive të banimit, të kopshteve dhe të ujit të pijshëm, do të realizohet harmonia e prodhimit, jetesës dhe mjedisit ekologjik."

Në fillim, "Plani i mirëqenies së fshatarëve me ndërtimin e vatrave të tyre ekologjike" u zbatua në mënyrë eksperimentale në provincat dhe rajonet e Kinës Veriperëndimore, si në Shensi, Gansu, Ningsia etj. Më vonë, me përkrahjen e dikastereve financiare qendrore dhe të fondit të obligacioneve shtetërore, Ministria e Bujqësisë filloi ta zbatojë këtë plan në një shkallë më të gjerë në mbarë vendin.

Zv-ministri i bujqësisë i Kinës Zhang Baoven tha: "Deri në fund të vitit 2004, 15 milionë e 400 mijë familje fshatare kineze kishin filluar të përdornin gazin metan. Gjatë gjithë vitit 2004, u prodhuan 5 miliardë e 570 milionë metra kub gaz metan, afërsisht sa 4 milionë tonë qymyrgur standard." Ai vazhdoi: "Krahas shfrytëzimit të gazit metan, në fshatrat e mbarë vendit tonë janë instaluar 30 milionë metra katrorë ngrohës uji me energji diellore dhe 578 mijë furra me energji diellore dhe 330 mijë familje kanë filluar të përdorin hidrogjeneratorë të vegjël elektrikë."

Fshatari Çang Guoxian tha i gëzuar: "Është gjë e mirë që zbatohet plani i mirëqenies së fshatarëve me ndërtimin e vatrave të tyre ekologjike. Kjo është diçka që u ka pëlqyer fshatarëve."(Zheng)