Korrespondenti i Radios së Jashtme të Kinës njoftoi se Kina do të inkurajojë qarqet e ndryshme shoqërore të përkrahin ndërtimin kulturor të fshatrave për të pasuruar jetën kulturore të fshatarëve.

Më 11 dhjetor, Komiteti Qendror i Partisë Komuniste të Kinës dhe Këshilli i Shtetit i Kinës publikuan një dokument ku u kërkohet krahinave të ndryshme të forcojnë ndërtimin e infrastrukturës kulturore të fshatrave dhe të krijojnë rrjetin e shërbimeve kulturore në fshatra. Në dokument thuhet se krahinat e ndryshme duhet të zhvillojnë vazhdimisht veprimtari kulturore në fshatra, njëkohësisht duhet të inkurajojnë studentë të diplomuar të shkojnë në fshatra për shërbime kulturore. Krahas këtyre, qeveria kineze do të shtojë investimet dhe do të zbatojë politika përkatëse për të inkurajuar ndërmarrje të zhvillojnë tregun kulturor të fshatrave.

Tani më se 70% e popullsisë kineze banojnë në fshatra. Në krahasim me qytetet, infrastruktura kulturore e fshatrave është më e prapambetur, veprimtaritë kulturore atje janë më të pakta. (Fani)

U mbyll panairi i parë i sektorit kulturor të krahinave perëndimore

Agjencia kineze e lajmeve Hsinhua njoftoi se më 11 dhjetor, u mbyll në Kunmin të provincës Yunnan të Kinës jugore panairi i parë i sektorit kulturor të krahinave perëndimore të Kinës. Ky është panairi kulturor me përmasat më të mëdha në Kinë.

Drejtori i Drejtorisë Propaganduese të Provincës Yunnan Yan Youqiong u shpreh se në këtë panair morën pjesë 642 ndërmarrje. Gjatë panairit u nënshkruan 41 projekte të bashkëpunimit dhe vëllimi i kontratave arriti në 15.2 miliardë juanë. Këto 41 projekte lidhen me fushën e shtypit, të radios, të televizonit, të filmit, të shërbimeve kulturore etj. (Fani)

Qarqet kineze të dramës përkujtuan 100-vjetorin e ditëlindjes së Jiao Juyinit

Agjencia kineze e lajmeve Hsinhua njoftoi se më 12 dhjetor, afro 100 personalitete të qarqeve të dramës të Kinës u takuan në Pekin për të përkujtuar 100-vjetorin e ditëlindjes së krijuesit të Trupës Popullore Artistike të Pekinit, Jiao Juyin.

Jiao Juyin lindi në vitin 1905 në Tianjin dhe vdiq në vitin 1975, ishte një nga krijuesit e Trupës Popullore Artistike të Pekinit dhe regjisori i përgjithshëm i kësaj trupe. Ai drejtoi mbi 20 drama të shquara, shumica e të cilave janë bërë drama klasike të Trupës Popullore Artistike të Pekinit.

Njëkohësisht Jiao Juyin ishte edhe një studiues që studionte operat tradicionale kineze dhe dramat perëndimore. Ai ka përkthyer shumë drama, novela dhe vepra për dramën.

Siç bëhet e ditur, ditët e fundit, u botuan "Veprat e Jiao Juyinit" për të paraqitur rezultatet artistike të Jiao Juyinit. (Fani)