Komiteti Organizativ i Pekinit për Olimpiadën e 29-të shpalli më 6 dhjetor në Pekin se sipas planifikimit të përgjithshëm të Lojërave Olimpike 2008, u nis më 6 dhjetor zyrtarisht puna e projektimit të pishtarit të Lojërave Olimpike 2008 dhe filluan të mblidhen projekte nga mbarë bota.

Ky aktivitet i mbledhjes së projekteve u kërkon pjesëmarrësve të projektojnë duke u nisur nga konceptet "lavdi dhe ëndërr", "traditë dhe modernizëm" dhe "kulturë dhe harmoni". Projekti i pishtarit duhet të mishërojë plotësisht stilin kinez, madhështinë kulturore dhe frymën bashkëkohore dhe duhet të demonstrojë gjallërinë dhe pasionin e të mbajturit të pishtarit. Krahas këtyre, për pamjen e pishtarit kërkohet uniteti i formës unike me teknikën, duke shprehur kështu artin kinez dhe nivelin e teknikës së Kinës.

Përveç mbledhjes së hapur për mbarë botën, Komiteti Organizativ i Pekinit do të ftojë edhe personalitete e kompani me potencial ose me eksperiencë në projektimin e pishtarit të lojërave të kaluara olimpike.

Afati i fundit i mbledhjes së projekteve të pishtarit do të jetë data 28 shkurt 2006, në orën 17-të.

Stafeta e pishtarit olimpik është bërë një nga aktivitetet më me influencë në botë. Ky aktivitet ka luajtur një rol të veçantë në përhapjen e frymës së Olimpiadës dhe në demonstrimin e historisë, kulturës, arteve dhe të nivelit të teknikës të vendeve dhe qyteteve organizative. Në sajë të rëndësisë së saj kolosale shembullore dhe të influencës, Komiteti Olimpik Ndërkombëtar dhe Lojërat e kaluara Olimpike i kanë kushtuar rëndësi të madhe projektimit të pishtarit olimpik dhe shpallja e rezultatit të projektit të pishtarit është bërë herë pas here fokus i botës.

Stefata e pishtarit të Olimpiadës moderne filloi në vitin 1936 në Lojërat Olimpike të Berlinit. Në Lojërat Olimpike të Sidneit, Komiteti Olimpik Ndërkombëtar  paraqiti konceptin "Vepra e figurës dhe e peizazhit të Olimpiadës". Pas kësaj, në pishtarin olimpik u realizua kalimi në krijimin e figurës të përgjithshme të Lojërave Olimpike dhe në mishërimin e frymës së Olimpiadës, të konceptit të lojërave olimpike dhe të karakteristikave kulturore të vendeve organizatore. Në projektimin e pishtarit të Lojërave Olimpike të Dimrit në vitin 2002, për të mishëruar temën "Të digjet zjarri i zemrës" dhe koncepti i  Lojërave Olimpike të atij viti "akull dhe zjarr", u përdor për herë të parë xhami në projektin e pishtarit. Ideja e pishtarit të Lojërave Olimpike të Athinës vjen nga gjethe ulliri, që mishëron më së miri karakteristikat greke. Të gjitha këto kanë mbetur si trashëgimi e veçantë e Olimpiadave. (Wang Lei)