Vitet e fundit, me përhapjen gjerësisht të njohurive mbi Sidën, njerëzit nuk kanë më shumë frikë nga kjo sëmundje dhe nuk i diskriminojnë të sëmurët nga Sida, madje shumë njerëz tregojnë kujdes të madh dhe i ndihmojnë në forma të ndryshme këta të sëmurë.

Para 10 vjetëve, fshatari i thjeshtë 43 vjeçar z. Tao Tongxue nga provinca Guizhou e Kinës jug-perëndimore, u prek padashur nga virusi i Sidës dhe para 3 vjetëve u sëmur. Pas mjekimit, tani ai është bërë më mirë. Pak kohë më parë, kur Tao Tongxue erdhi në Pekin si përfaqësues i të sëmurëve nga Sida për të marrë pjesë në një forum popullor mbi parandalimin dhe mjekimin e Sidës, ai i tha korrespondentit të radios sonë se në vendlindjen e tij gati 2 mijë të infektuar nga virusi i Sidës kanë marrë ndihmë nga qeveria dhe shoqëria. Ai tha:

"Kemi bërë falas kontrollin mbi kundërtrupat e virusit të Sidës dhe mjekohemi falas, edhe fëmijët e mi ndjekin falas shkollën. Të gjitha këto kanë rëndësi shumë të madhe për një të infektuar nga Sida në fshat."

Tao Tongxue tha se sëmundja e tij është kontrolluar shumë mirë dhe jeta e tij është njësoj si e të tjerëve dhe kjo nuk mund të ndahet nga kujdesi i qeverisë e i shoqërisë.

Qysh nga mesi i viteve '80 të shekullit të kaluar, kur u zbulua i infektuari i parë nga Sida e deri tani, në Kinë ka 840 mijë të infektuar nga Sida. Si të ndihmohen ata të vënë nën kontroll sëmundjen dhe të jetojnë njësoj si të tjerët, ky është bërë një problem që tërheq vëmendjen e sektorëve përkatës shëndetësorë qeveritarë dhe shoqërorë.

Qeveria kineze ka zbatuar një sërë masash për të pakësuar barrën ekonomike të të sëmurëve nga Sida. P.sh. u jepen falas barna dhe mjekime të sëmurëve që kanë vështirësi ekonomike, spitalet u japin këshilla shëndetësore dhe shërbime grave shtatzëna të prekura nga virusi i Sidës gjatë lindjes etj. Të sëmurët nga Sida që kanë vështirësi ekonomike dhe të afërmit e tyre mund të gëzojnë subvencione të qeverisë. Administratat qeveritare të niveleve të ndryshme dhe qarqet e ndryshme shoqërore tregojnë kujdes dhe i ndihmojnë jetimët, prindërit e të cilëve kanë vdekur nga Sida, nga ana e jetës, arsimore dhe shëndetësore.

Edhe shumë njerëz janë organizuar vullnetarisht në aktivitetet për ndihmën ndaj të sëmurve nga Sida. Në qytetin Kunmin të provincës Junan të Kinës jug-perëndimore ekziston një organizatë popullore me emrin "Vatra e rrezeve diellore", e cila u jep ndihmë të infektuarve nga Sida. Punonjësi i kësaj organizate z. Li Yun i tha korrespondentit:

"Në provincën Junan 80% e të sëmurve nga Sida janë infektuar nëpërmjet injeksioneve të narkotikëve në damarë, ata kanë humbur aftësitë themelore të jetës dhe janë diskriminuar nga të tjerët për shkak të përdorimit të lëndëve narkotike. Kështu "Vatra e rrezeve diellore" u jep atyre mbështetje psikike dhe një platformë për rikthim në jetën shoqërore."

Për të bërë që të prekurit nga virusi i Sidës të rifitojnë vetëbesimin, punonjësit e "Vatrës së rrezeve diellore" u mësojnë atyre mjeshtëri për prodhimin e punimeve të ndryshme artistike, organizojnë kurse kualifikimi për kujdesin ndaj të sëmurëve etj. Duke filluar nga fundi i vitit 2003, 270 të sëmurë nga Sida dhe 115 familje janë kualifikuar në këto kurse të organizuara nga "Vatra e rrezeve diellore".

Jetimët, të cilëve u kanë vdekur prindërit nga Sida, gëzojnë gjithnjë e më shumë dashurinë dhe kujdesin e qarqeve të ndryshme shoqërore.

Në qytetin e Fuyangut të provincës Anhui të Kinës lindore ekziston një shoqatë ndihme, për fëmijët e varfër të prekur nga Sida e përbërë nga sipërmarrës. Kryetarja e kësaj shoqate, zonja Zhan Ying i tha korrespondentit se ata jo vetëm kanë ndihmuar një numër fëmijësh të sëmurë nga Sida të shkollohen, por i kanë organizuar ata në aktivitete të ndryshme kolektive interesante. Znj. Zhang Ying tha se gjatë më se dy vjetëve këta fëmijë kanë ndryshuar shumë nga ana psikike.

Tani 280 fëmijë të prekur nga Sida që kanë marrë ndihmë nga kjo shoqatë po ndjekin shkollën dhe po mësojnë shumë mirë. Duke parë fëmijët që jetojnë të gëzuar, zonja Zhan dhe shokët e saj kënaqen pa masë.

Kujdesi për të sëmurët e Sidës shprehet edhe në faktin se gjithnjë e më shumë njerëz po i pranojnë dhe i trajtojnë në mënyrë të barabartë dhe miqësore të sëmurët dhe të infektuarit nga Sida. Disa aktorë kinematografike kanë marrë pjesë në shfaqje në ndihmë të këtyre të sëmurëve dhe në fillim të këtij viti disa nxënës i ftuan në shtëpi, si mysafirë, jetimët e prekur nga Sida.

Edhe vetë të sëmurët nga Sida janë organizuar në luftën aktive kundër Sidës. 29 vjeçari Li Xiang i sëmurë nga Sida, formoi, para 3 vjetëve, me disa të shokë të tjerë të sëmurë organizatën me emrin "Hong Shulin", e cila ka bërë shumë punë për popullarizimin e njohurive mbi Sidën dhe për pakësimin e diskriminimit të të sëmurëve nga Sida. Li Xiang i tha korrespondentit:

"Ne i nxisim me të gjitha mënyrat të infektuarit të marrin pjesë në krijimin e kanaleve të informacionit, në hapjen e linjës së nxehtë telefonike, në hapjen e faqes së tyre në internet, në botimin e revistës, në organizimin e kurseve për forcimin e aftësive vetëndihmuese etj. Botuam librat e të infektuarve nga Sida, organizuam fotoekspozitën e përgatitur prej tyre, xhiruam edhe filma dokumentarë për të popullarizuar njohuritë mbi Sidën."

Tani, në Kinë, janë formuar mbi 40 organizata të tilla si "Hong Shulin". Ata inkurajojnë njëri-tjetrin dhe bëjnë përpjekje që sa më shumë njerëz të njohin e të trajtojnë si duhet Sidën dhe, më në fund, njerëzimi të mposhtë Sidën. (Pina)