Në fjalimin e mbajtur në ceremoninë e pritjes së delegacionit të anijes kozmike Shenzhou Nr.6, kryeadministratori i Rajonit të Posaçëm të Hongkongut Donald Zeng u shpreh: "Fluturimi me sukses i anijes kozmike me kozmonautë Shenzhou Nr.6 realizoi më tej ëndrrën e kombit kinez për fluturimin në hapësirën kozmike. Hongkongasit dhe të gjithë kinezët janë krenarë për këtë sukses të madh."

Më 29 nëntor, delegacioni i anijes kozmike Shenzhou Nr.6 shkoi në Pallatin e Sportit "Elizabeth" dhe u takua me 2000 nxënës të 400 shkollave fillore dhe të mesme të Hongkongut. Gjatë takimit mbi një orësh, kozmonautët Fei Junlong dhe Nie Haisheng folën për çështjen e fluturimit kozmik të Kinës, për familjet e veta dhe iu përgjigjën pyetjeve të nxënësve.

Fei Junlong u shpreh se pas hyrjes në pallatin e sportit, ai ndjeu menjëherë gjallërinë e të rinjve të Hongkongut. Ai i inkurajoi nxënësit të mësojnë me zell për të realizuar idealin e vet.

Nie Haisheng u shpreh se kur ishte në moshë të re, nëna e mësoi ta donte atdheun dhe të jepte kontribut për të. Ai shprehu shpresën se në të ardhmen, nxënësit do ta përdorin talentin e tyre për lulëzimin e Hongkongut dhe të vendit.

Duke folur për familjen e vet, Nie Haisheng u shpreh se për shkak të punës së veçantë, ai nuk shkon shpesh në shtëpi. Megjithatë, ai i merr shpesh në telefon bashkëshorten dhe vajzën dhe ata kanë ndjenja të thella për njëri-tjetrin. Nie Haisheng e falënderoi shumë familjen e vet për përkrahjen ndaj çështjes së tij dhe u shpreh se suksesi i tij nuk mund të ndahet nga përkrahja e familjes.

Nxënësi i shkollës fillore Jiyue të Hongkongut Chen Zhifeng u shpreh se pas dialogut me kozmonautët, ai krijoi idealin e vet për t'u bërë kozmonaut.

Dy kozmonautët u shprehën: "Sot ne takohemi këtu për të ndarë gëzimin e suksesit të fluturimit të anijes kozmike me kozmonautë Shenzhou Nr.6. Gjatë vizitës në Hongkong, ne kemi ndier ngrohtësinë e hongkongasve, veçanërisht të të rinjve të Hongkongut. Ata janë krenarë për lulëzimin e atdheut. Shpresojmë se të rinjtë e Hongkongut do të japin kontributin e vet për ndërtimin e së ardhmes së bukur të Hongkongut."

Drejtori i Universitetit të Gjuhës Kineze të Hongkongut Liu Zunyi tha: "Nëpërmjet takimit me kozmonautët, të rinjtë e Hongkongut njohën suksesin e madh të atdheut në fushën e teknologjisë së lartë. Kjo do të thellojë ndjenjat e tyre për atdheun dhe do të krijojë interes të tyre për shkencën e fluturimit kozmik. Kozmonautët Fei Junlong dhe Nie Haisheng janë shembuj për të rinjtë e Hongkongut." (Fani)