Zonja Liao Xiaoyi, rreth 50 vjeçare është e bukur dhe elegante, ka flokë të zinj dhe të shkurtër dhe sy të shkruar. Dikur ajo është marrë me studime teorike të filozofisë në Akademinë e Shkencave Shqërore të Kinës, në vitet 1993-1994 ajo studioi për 2 vjet si studiuese vizitore në shtetin e Karolinës së Veriut të SHBA-së. Ajo ia ka kushtuar gjithmonë vëmendjen problemit të mbrojtjes së mjedisit, prandaj hoqi dorë nga vazhdimi i studimeve për titullin e doktorit dhe u kthye në atdhe për t'u marrë me mbrojtjen e mjedisit që e do shumë. Ajo u shpreh:

"Para se të shkoja në SHBA, kisha një grup xhirimi filmash dhe si prodhuese e pavarur po realizoja një film dokumentar me titull "Civilizimi i gjelbër dhe Kina". Kur isha në SHBA, një mik e vazhdonte këtë punë në vendin tim, por më vonë edhe ai kishte punë të tjera. Kështu u detyrova të kthehem për ta përfunduar këtë punë, sepse e kam shumë të qartë se në Kinë problemi i mjedisit është shumë serioz, por mediat nuk japin shumë njoftime lidhur me këtë problem."

Pas kthimit në atdhe, zonja Liao Xiaoyi jo vetëm përfundoi filmin dokumentar, por edhe realizoi dy ëndrra të tjera: formimin e qendrës kulturore të mjedisit të fshatit tokësor dhe nisjen e një emisioni mbi mbrojtjen e mjedisit në Televizionin Qendror të Kinës me titull "Koha për mbrojtjem e mjedisit". Deri më sot, Liao Xiaoyi ka botuar dizertacione me mbi 400 mijë hieroglife dhe ka xhiruar mbi 100 filma dokumentarë mbi mbrojtjen e mjedisit. Më 22 prill të vitit 2000, në Ditën Botërore të Rruzullit Tokësor, "Fshati tokësor i Pekinit" bashkë me disa organizata popullore të mbrojtjes së mjedisit zhvilluan aktivitetin me titull: "Veprimet në Kinë - Dita Botërore e Rruzullit Tokësor". Mbi 10 milionë kinezë morën pjesë në aktivitetet e ndryshme për mbrojtjen e mjedisit me temë: "Të inkurajojmë shpenzimet e vazhdueshme dhe të zgjedhim jetën e gjelbër". Po këtë vit mbi 800 mijë nxënës të shkollave fillore të Pekinit dhe prindërit e tyre plotësuan kartat e mbrojtjes së mjedisit të shpërndara nga "fshati tokësor i Pekinit" dhe sektorët përkatës qeveritarë, kështu që koncepti i lojërave olimpike të gjelbra dhe i jetës së gjelbër kanë hyrë në çdo familje.

Zonja Liao Xiaoyi ka guximin t'i vërë në zbatim mendimet e veta. Lidhur me këtë mikja e saj më e mirë zonja Su Li që përgjigjet për punën administrative në fshatin tokësor të Pekinit u shpreh kështu:

"Lao Xiaoyi është e guximshme për të vepruar dhe nuk pendohet asnjë herë për punët e bëra."

Për të brumosur vetëdijen e mbrojtjes së mjedisit te njerëzit, ajo ka marrë me qira 180 hektarë male dhe pyje në periferi të Pekinit si bazë edukative për mbrojtjen e mjedisit. Sot fshatarët e atjeshëm kanë arritur t'i ndajnë plehrat në kategori të ndryshme, të përdorin energjinë diellore për ndriçim dhe të mbjellin kultura bujqësore pa dëme publike. Mënyra e prodhimit dhe e jetës së këtyre fshatarëve u ka dhënë qytetarëve një mësim të mirë për mbropjtjen e mjedisit. Tani ky fshat i vogël me më shumë se 40 familje fshatare është bërë një zonë turistike ekologjike.

Kanë kaluar 9 vjet, numri i punonjësve zyrtarë të "fshatit tokësor të Pekinit" është shtuar në 15 nga 3 që ishin dhe janë regjistruar mbi 1 mijë punonjës vullnetarë. Puna e "fshatit tokësor të Pekinit" si një organizatë popullore që merret me studimet teorike, me prodhimin e filmave dokumentarë, me edukimin e banorëve dhe me shkëmbimet me botën e jashtme, ka tërhequr vëmendjen e komunitetit ndërkombëtar dhe të mediave botërore. Në vitin 2000, zonja Liao Xiaoyi, kjo militante popullore e mbrojtjes së mjedisit u dekorua me çmimin ndërkombëtar të mjedisit "Sophie" dhe qeveria kineze i dha asaj titullin e "ambasadores së civilizimit të gjelbër", kurse Komiteti organizativ i lojërave olimpike të Pekinit e ka ftuar atë si këshilltare për mjedisin.

Sot kur shumë njerëz rendin pas jetës moderne dhe luksoze, zonja Liao Xiaoyi bën një jetë të thjeshtë, ajo nuk nget makinën dhe nuk përdor kondicioner. Zyra e saj gjendet në katin e 8-të, po të mos ketë ndonjë punë të ngutshme, ajo i ngjit dhe i zbret më këmbë e jo me ashensor. Ajo tha se më mjaftojnë vetëm televizori me ngjyra, frigoriferi dhe makina larëse. Sipas saj, një jetë natyrore dhe e shëndetshme është një jetë e përsosur, njeriu dhe natyra duhet të jetojnë në harmoni.

Zonja Liao Xiaoyi ka një vajzë 18 vjeçare që ka emrin Kola, edhe ajo është një mbrojtëse e pasionuar e mjedisit. Ajo e pastron dyshemenë dhe banjën me ujë të përdorur dhe nuk harxhon asnjë fije letre. Kola e adhuron shumë nënën e saj. Ajo tha:

"E dua shumë mamanë, ajo ka ushtruar dhe ushtron ndikim të madh mbi mua nëpërmjet veprimeve të saj të përditshme."

Tani Kola po ndihmon nënën në xhirimin e një filmi dokumentar mbi kulturën ekologjike të Kinës dhe ajo shpreson se në të ardhmen ky film do të nxitë më shumë njerëz t'i kushtojnë vëmendje ekologjisë dhe rruzullit tonë tokësor të përbashkët. (Pina)