dëgjoni

Krahinat perëndimore të Kinës kanë burime të pasura natyrore, por baza industriale është relativisht e prapambetur. Duke pasur parasysh këtë gjendje aktuale, vitet e fundit krahinat perëndimore të Kinës kanë bërë përpjekje të mëdha për zhvillimin e ekonomisë qarkulluese dhe kanë krijuar modelin e vet të zhvillimit, duke hedhur një hap përpara në rrugën e zhvillimit të vazhdueshëm.

Specialistët janë të mendimit se nga prirja e zhvillimit afatgjatë, krahinat perëndimore kanë nevojë për ngritjen e ndërmarrjeve industriale me aftësi konkurruese në treg, dhe në procesin e zhvillimit duhet t'i kushtojnë rëndësi zhvillimit të ekonomisë qarkulluese.

Krahinat perëndimore të Kinës kanë rezerva të mëdha për zhvillimin e ekonomisë qarkulluese. Në këto krahina, në strukturën industriale me ndërmarrjet e industrisë së rëndë si ndërmarrje kryesore, lëndët e para janë minerale. Prandaj është e ngutshme që në zhvillimin ekonomiko-shoqëror të krahinave perëndimore të zbatohet modeli i ekonomisë qarkulluese, e të ngrihet efektiviteti i shfrytëzimit të burimeve natyrore, për të arritur një rritje më efikase.

Zhvillimi i ekonomisë qarkulluese në krahinat perëndimore është gjithashtu një kërkesë për interesat afatgjatë të mbarë vendit. Krahinat perëndimore me burime të pasura natyrore janë rajone zëvendësuese të burimeve energjetike dhe minerale të vendit tonë në shekullin e 21-të. Prandaj zbatimi i cilitdo modeli të zhvillimit ekonomik ka të bëjë jo vetëm me zhvillimin e vazhdueshëm dhe të shëndetshëm të këtyre krahinave, por edhe me faktin në se krahinat perëndimore do të përkrahin apo jo zhvillimin ekonomik të mbarë vendit nga ana e burimeve natyrore, dhe me gjendjen e përgjithshme të zhvillimit të vazhdueshëm të mbarë vendit në shekullin e 21-të.

Duke pasur këtë konsensus, disa rajone të Kinës perëndimore filluan kërkime aktive në zhvillimin e ekonomisë qarkulluese. Nënkryetari i komitetit qendror të Partisë së Fshatarëve e Punëtorëve të Kinës Chen Zhonxin, bashkëpunëtori i vjetër i Institutit të Ekonomisë Industriale të Akademisë së Shkencave Shoqërore të Kinës Zhou Minliang dhe specialistë të tjerë, pas hetimeve në praktikë, shprehën mendimin se tani në krahinat perëndimore të Kinës janë krijuar disa modele të ekonomisë qarkulluese.

Modeli i mobilizimit të të gjithë provincës. Provinca Yunan ka hartuar planin që brenda 5 vjetëve të zhvillohen eksperimente të ekonomisë qarkulluese në ndërmarrjet, sektorët dhe rajonet kryesore të të gjithë provincës dhe me konceptin e ekonomisë qarkulluese të përgatiten 10 ndërmarrje kryesore, si dhe 200 fshatra e 10 mijë familje fshatare, si shembuj të ekonomisë qarkulluese.

Modeli i rajonit nismëtar. Provinca Shensi e Kinës perëndimore filloi të zhvillojë ekonominë qarkulluese në disa rajone në veri të kësaj province që kanë burime të pasura minerale, ndërsa provinca Çinhai do ta shndërrojë ultësirën Çajdamu në një rajon eksperimental të ekonomisë qarkulluese.

Modeli i qytetit nismëtar. Qyteti Guiyan i provincës Guixhou është qyteti i parë eksperimental i ekonomisë qarkulluese në Kinë. Qyteti Guiyan ka projektuar 8 sisteme qarkulluese. Qyteti U Hai i Mongolisë së Brendshme ka ngritur disa ndërmarrje tipike të ekonomisë qarkulluese, në mënyrë që të bëhet bazë e industrisë kimike të Mongolisë së Brendshme.

Modeli i ndërmarrjeve nismëtare. Si modeli i fabrikës së sheqerit të Rajonit Autonom të Guansi-Xhuanit, modeli i Kombinatit Metalurgjik Baodou të Mongolisë së Brendshme, etj.

Specialistët propozuan që gjatë zhvillimit të ekonomisë qarkulluese krahinat perëndimore të orientohen nga koncepti i zhvillimit shkencor, të lidhen ngushtë me politikën shtetërore të zhvillimit të krahinave perëndimore, të zhvillojnë ndërmarrje me epërsi speciale, të ndryshojnë format e prodhimit dhe të konsumit, të realizojnë qarkullimin e mirë të " nxjerrjes së paktë, të shfrytëzimit të plotë dhe të rishfrytëzimit" dhe të realizojnë kalimin nga industrializimi tradicional në industrializimin modern. ( zhang )