Në një masë të madhe për shkak të këtyre ndjenjave të popullit, u ndërtua Muzeu i Lokomotivës me Avull i Shenyang-it, që mund të kënaqë kështu disi nostalgjinë që gjallon në zemrat e këtyre njerëzve. Në muze, i cili ka një hapësirë arkitekturore prej më shumë se 11 300 kilometrash katrorë, janë vendosur 15 lokomotiva të modelit të vjetër dhe 5 riprodhime lokomotivash, duke e bërë këtë muze më të madhin e këtij lloji në Kinë. Hekurudha Jining-Tongliao gëlon nga lokomotivat me avull dymotorëshe, që u shtohen peizazheve të bukura përgjatë vijës hekurudhore, duke fituar kështu vlerësimin si "Muzeu lëvizës i lokomotivave me avull". Çdo vit, në të katër stinët, mijëra dashamirës të lokomotivave me avull vijnë këtu për të vizituar "muzeun lëvizës".

Që prej krijimit të saj në vitin 1995, salla e ekspozitës që i përket Kompanisë së Hekurudhës Jining-Tongliao, ka pritur më shumë se 6 000 vizitorë të huaj. Ky entuziazëm publik u ka lënë mbresa të mëdha punëtorëve të kompanisë, që kanë edhe ata të njëjtin interes. Në fund të vitit 2003, disa punëtorë të rinj të "Daban Section" nisën të grumbullojnë pjesë të lokomotivave me avull, si llamba, sinjale drejtimi, pllaka me numra trenash dhe pompa karburanti. Me më shumë se 300 objektet që grumbulluan, si edhe me modelin e lokomotivës që krijuan, këta punëtorë e kanë kthyer një magazinë të vjetruar në një muze të vogël. Çdo lokomotivë e ekspozuar atje ka një arkivë të vetën ku janë regjistruar ulje-ngritjet që ka njohur ajo që ka dita kur doli nga linja e prodhimit e deri në ditën kur "doli në pension".

Çdo vit shumë udhëtarë e fotografë nga Amerika dhe nga Evropa vijnë për të shijuar lokomotivat me avull e për të bërë fotografi. "Shoqata botërore e dashamirësve të lokomotivave me avull" dhe Kompania e Hekurudhës Jining-Tongliao kanë arritur marrëveshje për të bërë veprimtari si "Muaji i udhëtimit me lokomotivë me avull", e cila do të zhvillohet për tre vjet radhazi duke filluar që nga nëntori i këtij viti, për shpenzimet e së cilës Shoqata do të japë 900 000 yuan-ë. Në këto veprimtari, ata që i dashurojnë lokomotivat me avull nga e gjithë bota mblidhen në hekurudhën Jining-Tongliao dhe ndiejnë nga afër fuqinë e madhërishme të tyre, fishkëllimën mallëngjyese dhe çak-çuk, çak-çuk, çak-çuk-un ritmik të tyre ?

"Kompania e hekurudhës Jining-Tongliao do të mbajë disa lokomotiva me avull sa për demonstrim", shprehet manaxheri i përgjithshëm i kësaj kompanie Wang, "kështu që shumë vjet më pas dashamirësit e lokomotivave me avull do të mundin jo vetëm të vështrojnë modelet e lokomotivave me avull në muzeume, por edhe të shohin trena me lokomotiva me avull duke ecur me shpejtësi të madhe nëpër hekurudha".

Këto lokomotiva me avull të përdorura për demonstrim kanë mbijetuar, megjithëse ato nuk vihen më në shfrytëzim. Falë vëmendjes dhe interesit të atyre që i adhurojnë dhe i pëlqejnë lokomotivat me avull, kjo është një "parajsë" e vërtetë. (Artani)