Festa e vendeve të ndryshme --  temë kryesore e festivalit

Institucioni organizativ i këtij festivali është Sektori i Marrëdhënieve me Jashtë i Universitetit Pekin. Një drejtor i këtij seksori zj. Wang bëri të ditur për mua se:

"Tema kryesore e këtij festivali është 'festa e vendeve të ndryshme', që kërkon që studentët e huaj të prezantojnë kulturat e vendeve e rajoneve të tyre duke vënë theksin në festë. Festivali zhvillohet kryesisht në formën e ekspozitave dhe njëkohësisht, transmetohet drejtpërdrejtë edhe në internet dhe në qarkun e mbyllur të televizionit të universitetit."

Zj. Wang tha se më 2004 Universiteti Pekin organizoi festivalin e parë ndërkombëtar kulturor dhe kjo ngjarje u vlerësua si ngjarja e parë ndër 10 ngjarjet kryesore të Universitetit të Pekinit në vitin 2004.

Por si u zhvillua festivali i këtij viti? 

Kina në sytë e një studenteje shqiptare

Festivali u zhvillua në sheshin përpara Sallës së Leksioneve të krijuar me rastin e 100 vjetorit të Universitetit Pekin. Ekspozita për Shqipërinë ndodhet në një vend të dukshëm afër tribunës. Përgjegjësja e kësaj ekspozite është studentja shqiptare Eva Veizaj, që po ndjek studimet pasuniversitare në specialitetin e ligjit ndërkombëtar në Fakultetin e Drejtësisë të Universitetit Pekin.

Unë e pyeta atë për kushtet e jetesës dhe të studimeve në Kinë. Ajo mu përgjigj me një buzëqeshje të çiltër:

"Jam në Kinë që prej dy vjetësh për të mësuar ligjin ndërkombëtar. Studimet e mia do të zgjasin për 4 vjet, pastaj do të kthehem në Shqipëri sepse dua të kontribuoj për vendin tim. Niveli i studimeve në Universitetin Pekin është shumë i lartë. Këtu kam bërë shumë miq të huaj. Mund të praktikoj anglishten dhe të mësoj kinezçen. Duke jetuar epavarur nga prindrit kam mësuar shumë gjëra."

"Në fillim nuk isha mësuar me ushqimin kinez, sepse nuk e ha orizin, por bukë. Vështirësia tjetër është gjuha, sepse gjuha kineze është e vështirë për tu mësuar. Nuk kisha shumë njohuri për Kinën. Vetëm dije që Kina është një vend i madh dhe me kulturë shumë të lashtë. Unë kam folur me prindërit e mi në telefon dhe ata më thanë që tani media shqiptare flet shumë për Kinën."

Eva, e veshur me kostumin e bukur kombëtar shqiptar, u bë yllit i festivalit. Edhe produktet e mrekullueshme zejtare shqiptare të ekspozitës tërhoqën shumë vëmendje. Por dikush e viziton këtë ekspozitë jo vetëm për t'u dëfryer.

"Festivali kulturor më njeh me shqiptarët"

Yangu është student pasuniversitar i vitit të 3-të në Fakultetin e Marrëdhëniet Ndërkombëtare të Universitetit të Pekinit. Ai mori vesh se në këtë festival kulturor do të merrte pjesë një student shqiptar dhe erdhi enkas për t'u njohur me të, sepse ai besonte se shkëmbimet me këtë shqiptar do të jenë në ndihmë të temës së tij të kërkimeve për lëvizjen komuniste ndërkombëtare dhe për marrëdhëniet e Kinës me ish-Bashkimin Sovjetik e me vendet e Evropës Lindore.

Duke folur për marrëdhëniet midis Kinës dhe Shqipërisë, Yangu tha:

"Në historinë e lëvizjes së komunizmit ndërkombëtar, Kina dhe Shqipëria patën ruajtur marrëdhënie të ngushta dhe miqësore gjatë viteve nga `60 deri në fund të viteve '70. Në fushën ekonomike, Kina dërgoi atëherë një kontingjent të madh specialistësh në Shqipëri për ndihma në ndërtim, ndërsa Shqipëria luajti një rol të rëndësishëm në historinë diplomatike të Kinës. Ajo ishte vendi i parë që njohu rivendosjen për Kinën të statusit të vendit të ligjshëm në OKB-në."

Është rritur tendenca në mbarë botën për studime në Kinë

Në Pekin, një qytet me kulturë të lashtë, përqëndrohen shumë shkolla të larta të famshme, të cilat kanë tërhequr vitet e fundit gjithnjë e më shumë studentë të huaj. Sipas të dhënave statistikore të Komisionit të Arsimit të Pekinit, gjatë vitit 2004 numri i studentëve të huaj në Pekin kaloi në 40 mijë, shifër kjo që zë 40% të studentëve të huaj në Kinë. Bashkia e qytetit të Pekinit njoftoi se deri në vitin 2008, ky numër do të arrijë në 80 mijë. Për këtë, Pekini çeli në vitin 2005, fondin prej 30 milionë juanësh si bursë të studentëve të huaj në Pekin dhe ky fond në të ardhmen do të shtohet vit pas viti.

Përsa i përket Universiteti Pekin, drejtorja e sektorit të Marrëdhënieve me Jashtë të Universitetit Pekin, zj. Wang bëri të ditur se:

"Aktualisht çdo vit hyjnë në universitetin tonë 4 a 5 mijë studentë të huaj. Ata studiojnë kryesisht në fakultetet e marrëdhënieve ndërkombëtare, të drejtësisë, të gjuhës kineze, të gazetarisë dhe të komunikacionit, të administrimit ekonomik, etj. Sukseset e dukshme të Kinës në fusha të ndryshme kanë tërhequr shumë studentë të huaj dhe ata dëshirojnë ta njohin më tej Kinën dhe të bëjnë bashkëpunime afatgjata tregtare e kulturore me Kinën. Pikërisht me këtë sfond lindi festivali ndërkombëtar kulturor i Universitetit Pekin. Vitin e kaluar, festivali i parë u vlerësua lart nga studentët e specialistët e huaj për rolin e tij në nxitjen e shkëmbimeve midis kulturave të ndryshme."

Unë mendoj se festivali ndërkombëtar kulturor i Universitetit Pekin është vetëm një pikënisje e shkëmbimeve midis Kinës dhe botës së jashtme. Me shpejtimin e hapave të zhvillimit të Kinës, Kina do të luajë një rol edhe më të dukshëm në arenën ndërkombëtare dhe po ishta them do të ketë më shumë shkëmbime kulturore me përmbajtje më të pasur dhe me formë më të larmishme.(U Sen)