dëgjoni

Në shtator të këtij viti, i dërguar nga drejtuesi shumë i pritur televiziv kinez Cui Yongyuan, një grup i CCTV-së shkoi në Shqipëri dhe intervistoi për rubrikën e CCTV-së "Magjia e filmave artistikë" dhjetra kineastë veteranë shqiptarë të filmave të vjetër shqiptarë. Intervista e grupit televiziv kinez gjeti ndihmën dhe përkrahjen e madhe të kineastëve veteranë shqiptarë, veçanërisht të regjisorëve Viktor Gjika dhe Hysen Hakani etj. Para se të vinte grupi në Shqipëri, ata i kishin lajmëruar aktorët e filmave të drejtuar dikur prej tyre duke rregulluar edhe orën dhe datën e pjesëmarrjes në intervistë, duke i krijuar kështu shumë lehtësira grupit televiziv kinez për marrjen e intervistave të veta.

Ndër filmat e vjetër shqiptarë të zgjedhur nga CCTV për t'i intervistuar, tri janë drejtuar nga regjisori i njohur shqiptar Viktor Gjika, ato janë " Horizonte të hapura", " I teti në Bronz " dhe " Rrugë të bardha". Për këtë arsye, Viktor Gjika ishte një ndër regjisorët e parë që u intervistuan nga grupi i televizionit kinez.

Në intervistë, duke iu përgjigjur pyetjes së grupit televiziv kinez se e si e ka nisur rrugën e tij kinematografike, ai tha :"Unë që i vogël kam pasur një dëshirë shumë të madhe për kinematografinë. Prandaj, kur mbarova shkollën e mesme në qytetin e Korçës kërkova që të çohesha për studime për filmin. Ishte fat për mua që më doli e drejta e studimit pikërisht për kinematografi në Institutin Kinematografik të Moskës, një ndër institutet më të mirë dhe më të mëdha të botës

Në fillim kam studiuar për operator. Në vitin 1960 mbarova studimet shkëlqyeshëm, me diplomë të kuqe, diplomë e veçantë. Filmi-diplomë që xhirova unë ishte një tregim i Heminguejit, që mori "Grand Prix" në një festival filmi. Pastaj erdha në Shqipëri, ku sapo kishte filluar prodhimi i filmave artistikë. Ishin bërë nja dy filma dhe do të xhirohej filmi "Debatik", me regjisor Hysen Hakanin, kurse operator isha unë me Dhimitër Anagnostin. Më vonë që të dy ne u bëmë regjisorë. Pas filmit "Debatik" neve na u ngarkua të bënim, si regjisorë e si operatorë filmin "Komisari i dritës". Meqenëse filmi pati sukses të madh, ne vazhduam punën në fushën e regjisë. "

Z.Viktor Gjika ka drejtuar me sukses shumë fima shqiptarë, ndër ta janë "Horizonte të hapura", "I teti në bronz ", "Yjet e netëve të gjata", "Rrugë të bardha", "Rezistencë", "Gjerenal gramafoni" "Nëntori i dytë" dhe "Njeriu me top"etj.

Ai tha: "Filmi i parë që kam bërë si regjisor i pavarur ishte "Horizonte të hapura", që mbështetej në një ngjarje reale, në një personazh që dha jetën gjatë një stuhie për të mbrojtur bigën, që është një vinc ngarkim-shkarkimi në port detar. Me kërkesën time Dritëro Agolli shkroi skenarin. Unë në atë film isha edhe regjisor, edhe operator. Filmi ka skena interesante e u prit mirë."

Pasi foli për filmin e parë, ai vazhdoi edhe për filmin " I teti në bronz" për të cilën interesohej grupi televiziv kinez. Sidomos për faktin se si i ka shkuar ndërmend të xhirojë një film të tillë. Lidhur me këtë, z. Viktor Gjika tha :

"Andej nga fundi i filmit i kërkova Dritëroit të më jepte ndonjë gjë tjetër të shkruar prej tij. Ai më dha një roman në dorëshkrim, që quhej "I teti ishte në bronz". Mua më pëlqeu shumë kjo ide, pasi e i thashë se mund të bëhej një skenar i mirë. Ai më kërkoi ta shkruaja unë një herë skenarin. Mua më pëlqeu shumë, ndoshta lidhej me kujtime nga fëmijëria ime, kishte role shumë interesante, të skalitura. E shkrova me shumë pasion variantin e parë të skenarit, në të cilin unë i bëra disa ndryshime romanit. Ndryshimi kryesor ishte se personazhi nuk vritej në rrugët e qytetit, por kisha zhvilluar një skenë beteje, ku të gjitha personazhet e filmit merrnin pjesë, e aty vritej edhe personazhi kryesor, të cilit iu bë më vonë edhe busti prej bronzi. Ndërtimi i romanit, pra dhe i filmit, ishte tepër modern, sepse duke treguar kujtimet e tyre të shtatë personazhet e filmit që mbanin bustin, zbërthenin jo vetëm figurën e heroit, por jepnin dhe një tablo shumë realiste e Luftës Nacionalçlirimtare."(zhai)