dëgjoni

Më 16 nëntor, duke mundur skuadrën kineze të volejbollit me rezultatin 3:0, skuadra amerikane e volejbollit, e kryesuar nga trajnerja Lang Ping, i dha botës një rezultat të papritur në Kupën e Kampionëve të Mëdhenj të Botës 2005. Kjo skuadër, që para gjysmë vit ishte në gjendje të fitonte vetëm me skuadrën e Tajlandës nëpërmjet epërsisë në gjatësi, nën përgatitjen me zell të Lang Pingut, ka ndryshuar fund e krye brenda vetëm 6 muajve.

Për trajneren Lang Ping, asnjë fitore tjetër nuk mund të vërtetojë vlerën e saj të vërtetë. Në ndeshjen e parë të kësaj kupe, skuadra amerikane mundi skuadrën koreanojugore, që është relativisht e dobët, por kjo nuk mund të tregojë ende fuqizimin e skuadrës amerikane. Fitimi me skuadrën e  fortë kineze, që u shpall kampione në Lojërat Olimpike 2004, vërtetoi edhe një herë aftësinë e Lang Pingut si trajnere. Vetëm 5 muaj më parë, në turneun e Çmimit të Madh Botëror të Volejbollit për femra në Ningbo, skuadra amerikane, e kryesuar nga Lang Ping, u ndesh me skuadrën kineze. Skuadra e atëherëshme amerikane nuk mund të krahasohej fare me skuadrën kineze dhe humbi shumë shpejt me rezultatin 0:3.

Pikërisht mbi këtë bazë të dobët, Lang Ping-u, që ka bërë shumë mrekulli, e ka drejtuar skuadrën amerikane të volejbollit në rrugën e rritjes së shpejtë. Para Kupës së Kampionëve të Mëdhenjë, në Kampionatin e Volejbollit për femra të Amerikës së Qendrore dhe Veriore, skuadra amerikane bëri një paraqitje befasuese. Në 5 sete me rivalitet, ajo mundi skuadrën e fortë të Kubës, duke u shpallur kampione dhe kështu fitoi të drejtën për pjesëmarrjen në Kupën e Kampionëve të Mëdhenj.

Lang Ping-u, që thirret edhe "Çekani i hekurt", ka qenë një njeri shembullor dhe krenaria e volejbollit kinez. Pasi ajo u bë trajnere kryesore e skuadrës amerikane të volejbollit për femra, paraqitja e kohëve të fundit dhe rezultatet e skuadrës amerikane kanë tërhequr vëmendjen edhe të tifozëve kinezë. Duhet të themi se rezultati i mirë i skuadrës amerikane, të drejtuar nga Lang Ping-u, i pasqyron botës edhe nivelin e volejbollit të Kinës.

Pas fitores mbi skuadrën kineze në Kupën e Kampionëve të Mëdhenjë të Botës, gazetarët e huaj e pyetën Lang Ping-un: "Kinezja mundi skuadrën kineze, si mendoni ju?" Lang Ping-u iu përgjigj shumë e qetë: "Në kohën e sotme, sporti nuk njeh kufij midis vendeve. Shumë trajnerë të dalluar drejtojnë skuadra të vendeve të tjera. Si trajnere, pavarësisht se cilën skuadër drejtoj, unë bëj gjithçka që mundem që ti jap të gjithë përvojën time kësaj skuadre dhe shpresoj që kjo skuadër të arrijë rezultate të mira."

Në fakt, ka shumë trajnerë të huaj edhe në Kinë. Në Lojërat Olimpike të Athinës 2004, trajnerët e huaj e ndihmuan Kinën të arrinte rezultate të mira në basketboll dhe në hokej mbi bar. Ata kanë nxitur edhe profesionalizimin e sportit në Kinë. Përsa i përket volejbollit, një trajnere e shquar ashtu si Lang Ping, jo vetëm e ndihmon skuadrën amerikane në arritjen e rezultateve të mira, por ngre edhe nivelin e volejbollit botëror, në mënyrë që ky sport të tërheqë sa më shumë tifozë. Nga kjo pikëpamje, Lang Ping-u i përket më shumë botës, se sa Kinës. (Wang Lei)