Më 3 nëntor, Instituti i Kompjuterave i Akademisë së Shkencave të Kinës dhe Fakulteti i kompjuterave i Universitetit Çinhua të Kinës nënshkruan zyrtarisht marrëveshjen për vendosjen e marrëdhënieve të partneritetit të bashkëpunimit strategjik. Të dyja palët do të zhvillojnë bashkëpunim të gjerë në fushat e studimeve shkencore, të përgatitjes së kuadrove, të shkëmbimeve akademike dhe të strategjisë së zhvillimit, dhe do të nxisin bashkërisht krijimin e sistemit të shpikjeve të shkencës së kompjuterave të vendit tonë.

Drejtori i Institutit të Kompjuterave të Akademisë së Shkencave të Kinës, akademiku Li Kuojie u shpreh se instituti i tij është " ekip përfaqësues" në fushën e shkencës së kompjuterave në vendin tonë, ndërsa fakulteti i kompjuterave të Universitetit Çinhua është bazë e përgatitjes së kuadrove dhe e studimeve shkencore në këtë fushë. Bashkëpunimi i tyre, si bashkëpunim i dy njësive të forta, me siguri do të nxitë progresin e shkencës së kompjuterave në vendin tonë dhe do të ndihmojë në ndërtimin e një qendre të studimeve dhe të arsimit të kategorisë së parë në vendin tonë.

Sipas njoftimeve, ky bashkëpunim është një pjesë e rëndësishme e bashkëpunimit të Akademisë së Shkencave të Kinës me institucione të tjera të vendit. Bashkëpunimi dypalësh përfshin: krijimin e përbashkët të platformës së studimeve të shkencës së kompjuterave, forcimin e lidhjes së studimeve themelore me studimet e teknologjive të larta, shkëmbimet akademike, përgatitjen e përbashkët të kuadrove të nivelit të lartë, krijimin e përbashkët të fondeve të studimit dhe organizimin e përbashkët të aktiviteteve akademike ndërkombëtare.

Li Kuojie u shpreh se për të inkurajuar bashkëpunimin midis punonjësve shkencorë dhe për të krijuar një atmosferë të mirë të bashkëpunimit, të dyja palët do të hartojnë bashkërisht standarde të vlerësimit të nivelit akademik dhe të titujve shkencorë të punonjësve, etj. ( zhang )