Li Yuwei është një qitës i njohur në Kinë. Ai ka lindur më 20 korrik të vitit 1965 në provincën Liaoning të Kinës verilindore. Në vitin 1984, kur Lojërat Olimpike u organizuan në Los Anxhelos, Li Yuwei fitoi medaljen e artë në qitjen me tabelë të lëvizshme në distancë prej 50 metrash.

Gjatë stëvitjes, Li Yuwei kërkon gjithmonë nga vetja në mënyrë të rreptë që ta konsiderojë stërvitjen si garë. Kur ishte në ekipin e provincës Liaoning, ai ishte lojtari më i dalluar dhe nuk harxhonte shumë kohë në stërvitje, prandaj niveli i tij sportiv nuk ngrihej shpejt. Në vitin 1983, ai u përfshi në kombëtaren kineze të qitjes, duke u përgatitur për Lojërat Olimpike të vitit 1984. Gjatë asaj kohe në ekipin kombëtar, kishte shumë lojtarë të shkëlqyer, kurse paraqitja e Li Yuwei-t në stërvitje nuk ishte e mirë, prandaj ai vendosi të ngrejë nivelin e tij dhe ta kalojë nivelin e të tjerëve brenda një kohe të shkurtë. Ai harxhonte shumë kohë në forcimin e aftësisë së rezistencës dhe të saktësisë së qitjes. Pas stërvitjes së rreptë ai arriti të fitojë medaljen e artë olimpike në Los Anxhelos.

Në vitin 1979, Li Yuwei hyri në një shkollë të sportit amator dhe filloi atje stërvitjen e qitjes. Në vitin 1980, ai u fut në ekipin e qitjes të provincës Liaoning, ndërsa vit më vonë, mori pjesë në kampionatin kombëtar, duke arritur rezultat të mirë me 572 pikë. Në tetor të po atij viti, ai mori pjesë në kampionatin kombëtar për të rinjtë, ku u radhit në vendin e parë në qitjen me tabelë të lëvizshme (me shpejtësi standarde) në distancë prej 50 metrash. Ky është titulli i tij i parë kampion. Në vitin 1983, në Spartakiadën e 5-të Kombëtare, Li Yuwei fitoi titullin kampion në qitjen me tabelë të lëvizshme për meshkuj dhe fitoi titullin kampion si ekip, duke shënuar një rekord të ri kombëtar. Në të njëjtin vit, për paraqitjen e tij të shkëlqyer, Li Yuwei u pranua në kombëtaren e qitjes. Në vitin 1984, gjatë Lojërave Olimpike të Los Anxhelosit, Li Yuwei fitoi medaljen e artë në qitjen me tabelë të lëvizshme në distancë prej 50 metrash me 587 pikë. Në vitin 1986 në kampionatin botëror të qitjes, ai u radhit në vendin e 4-të në qitjen me tabelë të lëvizshme (me shpejtësi të ndryshme) dhe fitoi titullin kampion si ekip në këtë garë. Në vitin 1987, në kampionatin botëror të qitjes të Mynihut, Li Yuwei fitoi medaljen e artë në qitjen e tabelës së lëvizshme me 590 pikë. Në vitin 1981, ai u përcaktua si një nga sportistët më të njohur në Kinë ndërsa në vitin 1985, si një nga sportistët më të njohur në botë. Në vitin 1984, Li Yuwei fitoi medaljen e nderit të sportit të Kinës.

Pasi mbylli karrierën e tij si qitës, Li Yuwei u kthye në provincën Liaoning ku punon si trajner në ekipin e qitjes të provincës. (Jiang Lei)