Ma Yanhong është një gjimnaste e njohur në Kinë. Ajo ka lindur më 5 korrik të vitit 1963 në Pekin. Në vitin 1972, Ma Yanhong fillon të mësojë gjimnastikë në një shkollë të sportit amator në Pekin. Në vitin 1975, ajo u pranua në ekipin e gjimnastikës "Bayi" dhe në vitin 1978 hyri me sukses në kombëtaren kineze të gjimnastikës.

Në vitin 1978, si pjesëtarja e kombëtares kineze, ajo mori pjesë për herë të parë në Lojërat e 8-ta Aziatike dhe fitoi titullin kampion në garën e paraleleve të shkallëzuara. Një vit më pas, Ma Yanhong fitoi titullin kampion në kampionatin e 20-të botëror të gjimnastikës. Kjo ishte hera e parë që gjimnastja kineze fiton titullin kampione bote. Në vitin 1980, kur kampionati i gjimnastikës "Hardford" u organizua në Amerikë, Ma Yanhong fitoi titullin kampion në garën e traut të ekuilibrit. Në vitin 1981, në kampionatin e 21-të botëror të gjimnastikës, ajo fitoi titullin nënkampione në garën e paraleleve të shkallëzuara dhe u radhit në vendin e 5-të në gjimnastikën e lirë. Në të njëjtën vit, në kampionatin e gjimnastikës të Kinës, ajo fitoi titullin kampion në shumëgarësh. Në vitin 1983 në kampionatin e 22-të botëror të gjimnastikës, nën drejtimin e saj, ekipi kinez u radhit në vendin e 5-të. Në vitin 1984, kur Lojërat Olimpike u organizuan në Los Anxhelos, Ma Yanhong fitoi medaljen e artë në garën e paraleleve të shkallëzuara, duke u bërë kinezja e parë që fiton medaljen e artë olimpike.

Pas Lojërave Olimpike të vitit 1985, Ma Yanhong e mbylli karrierën e saj sportive dhe hyri në shkollën e lartë të sportit të provincës Shandong. Ndërsa në vitin 1987, ajo hyri në Universitetin Miteran për mësimin e gjuhës angleze. Në vitin 1989, ajo vazhdoi studimet në Universitetin e Kalifornisë në Amerikë dhe punonte gjithashtu si trajnere e klubit të gjimnastikës të Los Anxhelosit. Në vitin 1994, ajo u kthye në atdhe dhe punoi si menaxhere e përgjithshme e kompanisë së administrimit sportiv "Guo Shi" të Kinës. Në vitin 1999, ajo u shpall si një nga 50 sportistët më të mirë të Kinës. Mediat ndërkombëtare e quajnë Ma Yanhong si nismëtare e lulëzimit të gjimnastikës në Kinë. (Jiang Lei)