Në shtator të këtij viti, i dërguar nga drejtuesi shumë i pritur televiziv kinez Cui Yongyuan, një grup i CCTV-së shkoi në Shqipëri dhe intervistoi për rubrikën e CCTV-së "Magjia e filmave artistikë" dhjetra kineastë veteranë shqiptarë të filmave të vjetër shqiptar si "Njesiti gueril", " Ngadhnjim mbi Vdekjen", "Oshëtimë në bregdet", " I teti në bronx", "Guximtarët", "Horizonte të hapura", "Rrugë të bardha ", "Beni ecen vetë", "Mengjese lufte"etj. Këto filma ishin shfaqur në vitet '70-të të shekullit të kaluar në Kinë dhe ishin pritur shumë mirë nga spektatorët kinezë.

Për arsye se producenti dhe prezantuesi i rubrikës "Magjia e filmave artistikë " z. Cui Yongyuan është adhurues i filmave të vjetër kinezë dhe shqiptarë dhe në kohën e fëmijërisë shkonte gjithmonë pas ekipit të shfaqjes së filmave duke e ndihmuar ekipin ai i ka parë kush e di sa herë filmat e vjetër shqiptarë dhe të vendeve të tjera. Këto filma të vjetër shqiptarë i janë ngulitur fort në kujtesë. Kështu atij i ka lindur dëshira e zjarrtë që në rubrikën e tij " Magjia e filmave artistikë " jo vetëm të kujtojë aspekte të bukura të filmave të vjetër artistikë kinezë me anën e intervistave me skenaristë, regjizorë dhe aktorë të këtyre filmave, por të kujtojë e të diskutojë edhe aspekte të bukura të filmave të vjetër shqiptarë.

Gjatë qëndrimit në Tiranë grupi televiziv kinez intervistoi dhjetra skenaristë, regjisorë dhe aktorë veteranë, ndër të cilët përmendim Dritëro Agollin, Hysen Hakanin, Viktor Gjikën, Gëzim Erebarën, Sulejman Pitarkën, Dhimitër Xhuvanin, Vath Koreshin, Xhanfise Kekon, Kiço Blushin, Mevlan Shanajn, Rikard Ljarjen, Robert Ndrenikën, Yllka Mujon, Edi Luarasin, Artan Santon, Suzana Turkun, Samir Kumbaron, Demir Hyskjen, Kadri Roshin, Lazër Vlashin, Andon Qezarin, Lazër Filipin, Vangjel Hebën, Pëllumb Dervishin etj.

Ata i treguan grupit se si e kanë filluar rrugën e kinematografisë, se si e kanë shkruar skenarin e një filmi artistik, si i kanë drejtuar si regjisorë filmat dhe si i kanë luajtur rolet në filma të ndryshme. Ata kujtuan edhe shumë histori interesante gjatë xhirimit të filmave të tyre të vjetër artistikë që u interesojnë spektatorëve kinezë. Kujtimet janë shumë të bukura dhe interesante, jo vetëm se ato janë të kohës së rinisë së kineastëve shqiptarë, por edhe të një kohe të zhvillimit të vrullshëm të kinematografisë shqiptare. Filmat shqiptarë të atyre viteve, jo vetëm ishin pritur shumë mirë në Shqipëri, por edhe kanë ushtruar një ndikim të madh në gjirin e spektatorëve kineze. Disa aktorë ishin shumë të emocionuar dhe të mallëngjyer, pasi morën vesh se edhe tani spektatorët kinezë i kujtojnë ata filma të vjetër shqiptarë dhe këtë vit, në kuadrin e 60 ?vjetorit të fitores së luftës antifashiste, në dy spektakle madhështore të organizuara përkatësisht në sallën e sportit Shodu të Pekinit dhe në Pallatin e madh të Popullit në Pekin u këndua në një mënyrë të re kënga e filmit shqiptar " Ngadhnjim mbi vdekjen ".

Gjatë intervistës, z. Rikard Ljarja që ka luajtur rolin kryesor në filmin:"Ngadhnjim mbi vdekjen" këndoi edhe një fragment nga kënga e këtij filmi. (Zhai)