Në këtë mbledhje morën pjesë funksionarë, specialistë të mbi 80 vendeve, përfaqësues të organizatave përkatëse ndërkombëtare dhe të kompanive të famshme të prodhimit të ilaçeve. Sfondi i kësaj mbledhjeje është që në disa vende aziatike janë dukur pandërprerë raste të reja të njerëzve të prekur nga gripi i shpendëve; virusi i gripit të shpendëve vazhdon të përhapet në Azi dhe Evropë, deri tani vetëm në Afrikë dhe në Oqeani nuk janë zbuluar gjendje epidemike të gripit të shpendëve; me ardhjen e dimrit, shumë zogj shtegtarë fluturojnë drejt jugut duke kërcënuar Afrikën, ndërkohë që Afrika është pjesa më e dobët në sistemin global të parandalimit të gripit të shpendëve.

Më 4 nëntor, konferenca e 7-të afrikane në rang ministrash bujqësorë diskutoi për herë të parë problemin e gripit të shpendëve. Konferenca ishte e mendimit se detyra e parë e vendeve afrikane është përsosja e sistemit kontrollues të gripit të shpendëve. Më 4 nëntor, Banka Botërore shpalli se do të japë 300 deri 500 milionë dollarë për të ndihmuar vendet e varfra në parandalimin dhe mjekimin e gripit të shpendëve. Ndihma ndaj Afrikës dhe vendeve të tjera të varfra për parandalimin dhe mjekimin e gripit të shpendëve do të jetë një nga temat kryesore të kësaj mbledhjeje globale të parandalimit dhe mjekimit të gripit të shpendëve.

Një temë tjetër e rëndësishme e kësaj mbledhjeje është përdorimi efektiv i kapitaleve në parandalimin dhe mjekimin e gripit të shpendëve. Ditët e fundit, sekretari i përgjithshëm i FAO-së Diouf tha se për shkak se gripi i shpendëve është një sëmundje e shtazave, duhet të kontrollohet së pari përhapja e tij ndër kafshë. Tani komuniteti ndërkombëtar i kushton vëmendje vetëm ndikimit të gripit të shpendëve mbi shëndetin e njerëzve, por problemi i mos-përsosjes së sistemit të veterinerëve në shumë vende të varfra nuk ka tërhequr vëmendjen e duhur. Prandaj komuniteti ndërkombëtar dhe vendet e prekura nga kjo epidemi duhet të shtojnë më shumë kapitalet në këtë fushë.

Tani mungesa e koordinimit në studimin dhe prodhimin e vaksinës kundër virusit të gripit të shpendëve është problemi i tretë që duhet të diskutohet për t'u zgjidhur në këtë mbledhje. Për arsye se prodhimi i ilaçeve kundër virusit bëhet me leje, vëllimi i prodhimit të tyre është i kufizuar dhe çmimet janë të larta. Mbledhja do ta diskutojë problemin e dhënies së lejes për të zgjeruar vëllimin e prodhimit të ilaçeve dhe për të ulur çmimet.

Për të përballuar përhapjen e mundshme të gripit të shpendëve në mbarë botën, vendet e ndryshme duhet të krijojnë sistemin e bashkëpunimit ndërkombëtar me besim dhe përkrahje reciproke. Në fushën e epidemisë, vendet e ndryshme duhet të informojnë plotësisht, drejtësisht dhe në kohë komunitetin ndërkombëtar dhe shtetasit e vendeve përkatëse për të mbrojtur rendin normal shoqëror. Por njëkohësisht vendet e ndryshme duhet të shmangin edhe masat e tepërta mbrojtëse për të siguruar tregtinë dhe shkëmbimet normale ndërkombëtare. (Fani)