dëgjoni

Në fund të nëntorit të këtij viti, 6 biznesmenë spanjollë për prodhimin e pajisjeve të këpucëve do të shkojnë në qytetin Wenzhou të Kinës jugore për bisedime bashkëpunimi. Kjo nuk është gjë e rrallë. Një muaj më parë, në emër të Shoqatës së Pajisjeve të Këpucëve të Spanjës dhe të Shoqatës së Këpucëve, komisioneri i posaçëm për tregtinë i Konsullatës së Spanjës në Shangai, z. Lamer, shkoi në Wenzhou duke shprehur dëshirën që produktet këpucore spanjolle të hyjnë në tregun e Wenzhout.

Në shtator të vitit të kaluar, në Elçe të Spanjës, ndodhi një incident i djegies së këpucëve kineze. Vetëm pas një viti, pse spanjollët vizitojnë shpesh qytetin Wenzhou, qendër e prodhimit të këpucëve në Kinë?

Ndryshimi vjen nga idetë e reja dhe përpjekjet e paepura të tregtarëve të Wenzhout për zbutjen e fërkimeve në tregtinë ndërkombëtare. Sekretari i përgjithshëm i Shoqatës së Këpucarisë të qytetit Wenzhou, z. Zhu Feng tha se në të kaluarën këpucët e Wenzhout shiteshin jashtë vendit në mënyrë të drejtpërdrejtë, dmth, të gjitha hallkat e shitjes, si eksportimi, importimi dhe shitja, kontrolloheshin nga tregtarët e Wenzhout, kështu që të gjitha fitimet i merrnin ata vetë. Krahas kësaj, funksionimi i tregtoreve të tregtarëve të Wenzhout ishte i ndryshëm nga ai i dyqaneve vendëse. Tregtarët e Wenzhout zgjatën kohën e hapjes së tregtoreve, pa bërë pushim në mesditë dhe të shtunave. Të gjitha këto shkaktuan në më fund konflikte midis tregtarëve vendës dhe atyre të Wenzhout. Por një zjarr i bëri këta tregtarë të ndërgjegjshëm për "fitime të përbashkëta". Z. Zhu Feng tha se pas incidentit të djegies së këpucëve, tregtarët e Wenzhout filluan të kenë kujdes për hyrjen në kulturën tregtare vendëse. Tani, shumë nga ndërmarrjet e Wenzhout në Spanjë e kanë rregulluar mënyrën e funksionimit, psh. dyqanet pushojnë nga ora 14 deri në orën 16 dhe nuk hapen të shtunën. Në pjesën dërrmuese të dyqaneve të Wenzhout janë ftuar edhe shitës të huaj. Tregtarët e Wenzhout e kanë ndryshuar edhe strukturën e mallrave dhe mënyrën e shitjes së drejtpërdrejtë në Spanjë. Në tregtoren e tyre, janë shtuar llojet e këpucëve me cilësi dhe çmim të lartë, duke zvogëluar diferencën midis çmimeve të këpucëve të Wenzhout dhe atyre vendëse. Disa ndërmarrje këpucësh të Wenzhout, si "Dongyi", "Hashan", "Lubins" çojnë këpucë gjysmë të gatshme në Spanjë dhe i futin në treg pas përpunimit në ndërmarrjet atyre vendëse. Kështu të dzja palët kanë mundësi të marrin fitime.

Krahas përpjekjeve për përshtatjen me rregullat tregtare ndërkombëtare, tregtarët e Wenzhout i ndihmojnë edhe tregtarët evropianë për të hyrë në tregun kinez. Z. Zhu Feng tha se vendet evropiane prodhojnë produkte lëkure të cilësisë së lartë, të cilat mund të plotësojnë mungesën e tregut kinez. Nga ana tjetër, Wenzhou është i fuqishëm në prodhimin e këpucëve të gatshme, ndërsa vendet evropiane kanë më shumë forcë konkurruese në prodhimin e pajisjeve për këpucë, prandaj të dyja palët kanë shumë mundësi që të plotësojnë njëra-tjetrën. Mësohet se në verën e vitit t ardhshëm, Shoqata e Këpucëve e Spanjës do të shkojë në Kinë për organizimin e ekspozitës së produkteve të lëkurës në Wenzhou.

Ndryshimi i mendimeve e ka zgjeruar hapësirën e tregtisë. Përpjekjet e tregtarëve të Wenzhout pranohen nga tregu dhe nga gjithnjë e më shumë spanjollë. Kryetari i shoqatës së këpucarisë kineze në Spanjë, z. Liu Guangzhong tha se këtë vit, megjithë se është shtuar kostoja e funksionimit të tregtoreve, tregtarët e këpucëve të Wenzhout kanë një biznes më të mirë në Spanjë. Kryetari i Federatës së Këpucarisë të Bashkimit Evropian, z. Kalvo tha se nga konkurrenca me tregtarët e Wenzhout, edhe evropianët mësuan shumë. Ndërmarrjet evropiane të këpucëve po kërkojnë aktivisht ndryshime, veçanërisht uljen e kostos. Ai premtoi se nuk do të ndodhin kurrë incidente si djegia e këpucëve kineze.(Wang Lei)