Dje u luajtën ndeshjet në grupet E, F, G, H, për Ligën e Kampioneve. Ishte raundi i katërt dhe nuk munguan surprizat. Luftë e ndezur në grupin E, pas humbjes së Milanit në Eindhoven dhe fitores së Shalkes. Reali siguron kualifikimin, ashtu si Lioni. Çelsi i Mourinjos pëson humbjen e parë sezonale në Sevilje, ndërsa Reali merr tri pikët në "Anfild Road". Barazon Artmedia dhe Kruzi "shpëton" Interin e Mançinit...

Grupi E

Milani bie në Eindhoven, ngjitet Shalke

Një gol i shënuar nga Xheferson Farfan në minutat e para të takimit, i dha PSV-së fitoren 1-0 ndaj Milanit në ndeshjen e luajtur dje në Eindhoven. Farfani përfitoi nga një gabim i Kaladzes dhe me ndihmën e shtyllës mposhti portierin kuqezi Dida. Milani pati disa raste për shënim, por goditjet e Sedorfit dhe Shevçenkos u neutralizuan si duhet nga portieri Gomes. Italianët e mbyllën ndeshjen me dhjetë futbollistë, pasi Jap Stam, gjashtë minuta nga fundi, mori kartonin e dytë të verdhë. Në ndeshjen tjetër të grupit E, Shalke arriti fitoren e parë në këtë edicion, pasi mundi 2-0 Fenerbahçen, që e mbylli ndeshjen me nëntë futbollistë. Turqit u gjendën në disavantazh në minutën e 32-të, kur Kuranji shënoi pas krosimit të marrë nga Linkolni. Në minutën e 55-të u vendosën edhe fatet e ndeshjes. Marko Aurelio u ndëshkua me karton të kuq, duke iu bashkuar Fabio Luçianos, që ishte nxjerrë nga fusha pak minuta më parë. Një Fenerbahçe me nëntë futbollistë detyrohet të kapitullojë, duke pësuar golin e dytë të Shalkes, me autor Ebe Sand.

Grupi G

Humbja e parë për Çelsin. Fiton Liverpuli

Betisi ka mundur 1-0 Çelsin në ndeshjen e luajtur dje për Ligën e Kampioneve, duke i shkaktuar skuadrës së Mourinjos humbjen e parë në këtë sezon. Spanjolli Dani shënoi golin e vetëm të takimit, pas topit të marrë nga Oliveira në minutën e 28-të. Betisi, që vinte në këtë ndeshje pas katër humbjesh, mban ende gjallë shpresat për një kualifikim. Çelsi kishte mundësi të barazonte me Mikael Esienin, 20 minuta nga përfundimi, por topi i goditur prej tij u ndal në shyllë. Nga ana tjetër, kampioni në fuqi, Liverpuli, arriti një fitore të thjeshtë 3-0 ndaj Anderlehtit në "Old Traford". Për të besuarit e Rafa Benitezit, që u mjafton një pikë për të siguruar kualifikimin, shënuan Fernando Morientes, Luis Garsia dhe Djibril Sise. Nga ana tjetër, kampionët e Belgjikës detyrohen të pësojnë humbjen e 11-të radhazi në Ligën e Kampioneve, përfshi këtu edhe takimet e sezonit të kaluar.

Grupi F

Reali dhe Lioni kualifikohen në transfertë

Reali i Madridit është kualifikuar për në fazën e dytë të Ligës së Kampioneve, pasi ka mundur 2-0 Rozenborgun, dje në Norvegji. Një autogol dhe një gol i Gutit i japin Realit mundësinë të ketë nëntë pikë pas katër ndeshjesh, gjashtë më shumë se Rozenborgu ndjekës. Reali kaloi në avantazh, pasi Dorsini devijoi në portë krosimin e ardhur nga Robinjo. Në pjesën e dytë, Guti vendosi gjithçka me një goditje të saktë nga jashtë zone. Ndërkohë, në ndeshjen tjetër të grupit F, Lioni ka fituar thellësisht 4-1 në Athinë ndaj Olimpiakosit. S'ndalet më skuadra e drejtuar nga Xherrard Hulier, që koleksionoi kështu fitoren e katërt në po aq ndeshje të luajtura në këtë edicion të Ligës së Kampioneve. Dy golat e Kerjut dhe nga një gol i shënuar nga Zhuninjo dhe Diarra i dhanë Lionit fitoren 4-1 ndaj Olimpiakosit, që kishte kaluar i pari në avantazh me golin e shënuar nga Babanxhida, në minutat e para të ndeshjes.

Grupi H

Interi, pranë kualifikimit. Barazon Artmedia

Sulmuesi argjentinas, Hulio Rikardo Kruz, i aktivizuar në pjesën e dytë nga Roberto Mançini, i dha Interit një fitore të vuajtur, por edhe shumë të rëndësishme. Zikaltrit u gjendën në disavantazh pas goditjes së dënimit të ekzekutuar me mjeshtëri nga Hugo Almeida. Aktivizimi i Kruzit në vend të zhgënjyesit Adriano ishte çelësi i fitores për Interin, që e ka kualifikimin për në 1/8 e finaleve vetëm një pikë larg. Argjentinasi shënoi fillimisht nga pika e bardhë e 11-metërshit, pas penalltisë së fituar nga Pizaro. Më pas, tetë minuta para përfundimit të ndeshjes, që u luajt me dyer të mbyllura, Kruzi shënoi me kokë pas krosimit të marrë nga Mihaloviçi, një tjetër futbollist që e nisi ndeshjen nga stoli. Ndërkohë, në ndeshjen tjetër Artmedia-Rejnxhërs gjithçka u mbyll në barazim 2-2. Për skocezët, që kaluan dy herë në avantazh, golat u shënuan nga Prso dhe Tompson. Ndërsa për vendësit shënuan Borblei dhe Kozaku.

(Nga Sportishqiptar)