Për të zgjeruar zhvillimin e qëndrueshëm të ekonomisë dhe hapësirën e rritjes së tregtisë së jashtme, në vitin 2002, liderët e Kinës dhe të 10 vendeve të Aseanit nënshkruan bashkërisht "Marrëveshjen Kinë-Asean të kornizës mbi bashkëpunimin e plotë ekonomik"dhe filluan procesin e bisedimeve për krijimin e zonës së tregtisë së lirë Kinë-Asean. Në këtë panair, ndihmësi i Ministrit të Tregtisë të Kinës, z. Chen Jan tha se tani, ndërtimi i zonës së tregtisë së lirë Kinë-Asean po shkon mbarë.

Bashkëpunimi midis Kinës dhe Aseanit në tregti, investime, teknologji dhe në fusha të tjera është ngushtuar nga dita në ditë. Ndërtimi i zonës së tregtisë së lirë Kinë-Asean ka pasur pandërprerë progres të vazhdueshëm.

Nga viti 2002 deri në vitin 2004, vëllimi i tregtisë dypalëshe midis Kinës dhe Aseanit u shtua mesatarisht 38,9% në vit. Në vitin 2004, vëllimi i tregtisë dypalëshe arriti në 105 miliardë e 900 milionë dollarë amerikanë, duke realizuar para një viti objektivin e vëllimit të tregtisë dypalëshe me mbi 100 miliardë dollarë amerikanë, të parashtruar nga kryeministri i Kinës Wen Jiabao. Kina dhe Aseani janë bërë partneri i 4-t tregtar i njeri-tjetrit.

Panairi Kinë-Asean dhe samiti Kinë-Asean mbi tregtinë dhe investimet që organizohen një herë në vit, kanë krijuar një platformë të rëndësishme për forcimin e lidhjeve ekonomiko-tregtare midis Kinës dhe vendeve të Aseanit, për zhvillimin e tregtisë së mallrave, për bisedimet e tregtare dhe për bashkëpunimin ekonomik e teknik midis sipërmarrësve të këtij rajoni. Vëllimi i përgjithshëm i tregtisë së mallrave në këtë panair arriti në mbi 1 miliard e 100 milionë dollarë amerikanë, u nënshkruan kontratat e bashkëpunimit të investimeve ndërkombëtare në mbi 120 objekte, vëllimi i përgjithshëm i investimeve arriti në mbi 5 miliardë dollarë amerikanë. Funksionarët dhe sipërmarrësit e Kinës dhe të 10 vendeve të Aseanit folën edhe për politikën e tyre të bashkëpunimit ekonomiko-tregtar dhe për mjedisin e tregtisë. Nënkryetari i shtetit i Laosit Choummaly Saygnasone tha se Laosi dëshiron të thellojë më tej marrëdhëniet e bashkëpunimit ekonomiko-tregtar me partnerët e këtij rajoni.

"Qeveria e Laosit i kushton rëndësi shumë të madhe zhvillimit të bashkëpunimit ekonomik me vendet miqësore, duke përfshirë edhe Kinën. Bashkëpunimi ekonomik me botën e jashtme, sidomos, bashkëpunimi ekonomik rajonal është një nga detyrat tona kryesore. Për të realizuar intengrimin rajonal të tregut dhe të ekonomisë, sistemi i brendshëm i Laosit po përmirësohet gradualisht, duke krijuar një mjedis më harmonik dhe më tërheqës tregtar për investimet e huaja.

Krahas shpejtimit të procesit të ndërtimit të zonës së tregtisë së lirë Kinë-Asean, Aseani jo vetëm është bërë vend kryesor importimi i Kinës, por gradualisht po bëhet një nga zonat kryesore të investimeve të jashtme të ndërmarrjeve kineze.

Në panairin Kinë-Asean, ndihmësi i Ministrit të Tregtisë të Kinës, z. Chen Jan tha se hapja dhe rritja e shpejtë ekonomike e Kinës do të sjellë shanse të reja për zhvillimin ekonomik të Aseanit. Pala kineze dëshiron të shpejtojë bisedimet dhe të thellojë bashkëpunimin në fushat e ndryshme me Aseanin për të garantuar përfundimin, në vitin 2010, të ndërtimit të zonës së tregtisë së lirë Kinë-Asean. (Sihai)