Zhvillimi i shkëmbimeve të ndryshme midis dy brigjeve të ngushticës së Tajvanit është dëshirë e përbashkët e bashkatdhetarëve të të dy brigjeve. Tani shkëmbimet e bashkëpunimi sportiv midis dy brigjeve janë shtuar pandërprerë, shumë trajnerë të futbollit të femrave e të Kung Fu-së të pjesës kontinentale të Kinës po bëhen trajnerë në Tajvan, e njëkohësisht disa trajnerë të bejsbollit të Tajvanit po punojnë në pjesën kontinentale. Lojtarja tajvaneze e tikuondosë Chen Shixin që fitoi medaljen e parë të artë të Lojërave Olimpike për Tajvanin dikur bënte stërvitje në Pekin së bashku me lojtarë të pjesës kontinentale. Anëtari i Komitetit Olimpik Ndërkombëtar të Tajvanit Wu Jingguo është i mendimit se fitimi i medaljes së artë të Lojërave Olimpike nga lojtarët tajvanezë ka krijuar një rast të mirë për forcimin e shkëmbimeve sportive midis dy brigjeve dhe për ngritjen së bashku të nivelit sportiv të dy brigjeve dhe se shkëmbimet sportive midis dy brigjeve janë tendencë e domosdoshme e kohës së re. Ai tha:

"Në fakt në vitin 1989, filluan shkëmbimet sportive midis dy brigjeve. Gjatë mbi 10 vjetëve, shumë sportistë tajvanezë kanë ardhur në pjesën kontinentale për ndeshje e po ashtu edhe shumë sportistë të pjesës kontinentale kanë shkuar në Tajvan për ndeshje. Ky numër është shtuar nga viti në vit."

Siç bëhet e ditur, pas lejimit në vitin 1987 të vizitës së bashkatdhetarëve tajvanezë në pjesën kontinentale, delegacionet sportive të Tajvanit filluan të vijnë në pjesën kontinentale për shkëmbime e ndeshje. Për shembull, në maj të vitit 1997, delegacioni sportiv tajvanez i përbërë nga 26 veta vizitoi provincën Fujian dhe shikoi ceremoninë e hapjes së spartakiadës së 15-të të qytetit Xiamen. Në gusht të vitit 1999 u zhvillua gara e peshkimit e personaliteteve të famshme të të dy brigjeve.

Prirja e shtimit pandërprerë të shkëmbimeve sportive midis dy brigjeve tregon se këto shkëmbime dhe bashkëpunimi përputhen me interesat e kërkesat e përbashkëta të bashkatdhetarëve të të dy brigjeve. Shkëmbimet sportive kanë thelluar ndjenjat e bashkatdhetarëve të dy brigjeve dhe kanë shtuar njohjen e njëri-tjetrit. Zoti Wu Jingguo shprehu besimin e plotë për shkëmbimet dhe bashkëpunimin e ardhshëm sportiv midis dy brigjeve. Ai tha:

"Jam i bindur se shkëmbimet sportive do të nxitin shkëmbimet politike midis dy brigjeve. Ne shpresojmë se këto shkëmbime do të jenë më aktive me qëllim që të shtohen njohja dhe mendimet unanime midis dy brigjeve." (Fani)