Në korrik të vitit 1998, gjimnastja kineze Sang Lan dëmtoi boshtin kurrizor në Lojërat e katërta Miqësore të Nju Jorkut. Fatkeqësisht, aksidenti e la atë të paralizuar nga mesi e poshtë. Megjithatë, në fund të vitit 2002, ajo u bë prezantuese e një programi sportiv në Televizionin Star, një rrjet përbërës i Korporatës së Lajmeve nën pronësinë e Rupert Murdoh-ut.

Emri i plotë: Sang Lan

Datëlindja/Vendlindja: 11 qershor 1981/ Ningbo, Provinca Zhejiang, Kinë

Qyteti i lindjes/i banimit: Ningbo, Provinca Zhejiang, Kinë/ Nju York, NY ShBA

Famijla: nëna, Chen Xiufeng; babai, Sang Shisheng

Fillon gjimnastikën: 1987

Arritjet kryesore: 1998, Kampionati Kombëtar i Kinës, Vendi i dytë; 1997, Kampionati Kombëtar i Kinës, Kampione; 1996, Kampionati Kombëtar i Kinës, Vendi i dytë; 1996, Kupa amerikane, E shtata; 1995, Kampionati Kombëtar i Kinës, Vendi i dytë; 1991, Lojërat e provincës Zhejiang, Kampione etj.

Lëndimet: Thyerje dhe nxjerrje nga vendi në vertebra, e paralizuar nga mesi e poshtë.

Hobet: Videolojërat, Multiplikativi "Tomi dhe Xheri"

Ushqimi: KFC ose Kentucky Fried Chicken

Fakte të tjera:

Sang Lan dëmtoi boshtin kurrizor në Lojërat e katërta Miqësore të Nju Jorkut

Kur ka qenë e shtruar në spital ka pasur vizitorë të famshëm, si Leonardo Di Kaprion, Selin Dionin and Kristopher Reeven.

Ajo dhe mamaja e saj jetojnë me Gina Liun, zv/presidente e Shoqatës Kineze të Gjimnastëve dhe dy djemtë e saj, Uinston dhe Eduard Sie.

"Disa e lëvizin botën me lotët e tyre, të tjerë e bëjnë këtë me një buzëqeshje." Kështu e kishte përshkruar dikur dikush Sang Lan-in.

Jo shumë kohë më parë, - shkruan korrespondenti, - unë pashë një fotografi të saj. Në fotografi, fytyra e saj rrezatonte një buzëqeshje të ëmbël dhe të sinqertë, qe e veshur sipas modës dhe flokët i kishte lyer me një të kuqe të lehtë sportive. Ajo kishte ndryshuar dhe dukej më e matur dhe më e gëzuar.

Ish gjimnastja me pseudonimin Vajza e Diellit, Sang Lan ka fituar zemrat e njerëzve me shpirtin e saj elastik dhe me buzëqeshjen rrezëllitëse. Që nga aksidenti fatkeq, jeta e saj ka ndryshuar shumë dhe ndjenjat e njerëzve për të nga simpatia kanë lëvizur drejt respektit. Ajo ka vuajtuar shumë dhe të tjerë në moshën e saj rrallë kalojnë vuajtje të tilla. Në qofte se aksidenti nuk do të kishte ndodhur, ajo do të kishte hipur atë ditë në platformën e fitores për të marrë çmimin e parë e për t'i kthyer atdheut të saj lavdinë. Po ashtu, ajo do të ishte bërë, një gjimnaste shumë e suksesshme që, si e tillë, me kalimin e kohës, është harruar, duke mos i dhënë askujt rastin e rrallë të ndjente sot personalitetin e saj të fuqishëm në këtë sport.

Megjithatë ajo që ndodhi, ndodhi dhe nuk zhbëhet.

Pas tre vjet përpjekjesh plot durim, Sang Lan u regjistrua në degën e gazetarisë të Universitetit të Pekinit në shtator të vitit 2002. Për shkak se ajo kishte nevojë t'i nënshtrohej një trajtimi të mëtutjeshëm, ajo nuk jetonte në konviktet studentore, por shkonte e vinte për ditë nga Qendra Kineze e Kërkim-Rehabilitimit në Universitet. Ajo ngrihej çdo mëngjes para orës 6:00 dhe, e shoqëruar nga prindërit e saj, udhëtonte 20 km nga jugu i Pekinit deri në veri të Pekinit, ku ndodhet universiteti. Perveç se e shoqëronin të shkonte dhe të kthehej nga shkolla, prindërit e Sang Lan-it e ndihmonin atë në qëmtimin e literaturës nëpër tekste të ndryshme dhe në mbajtjen e shënimeve në auditor.

Përveç studimit, Sang Lan filloi të punojë edhe si prezentatore në Televizionin Star. Pas mësimeve dhe terapisë psikologjike dy herë në jave, ajo përgatitej edhe për programin e saj televiziv, i cili transmetohej një herë në javë. Kështu orari i saj ditor ishte i mbushur me aktivitete shoqërore dhe ajo, gjithnjë e më shumë, bëhet një vajzë tepër e zënë me punë.

"Në këto kohë unë intervistova atletët e Olimpiadës së tretë Speciale, të organizuar në Xi'an të Provincës së Shanxi-së." Kur e pyet rreth përvojës së saj si prezentatore televizive, thotë korrespondenti, Sang Lan-i duket e entuziasmuar. "Pas kthimit në Pekin, unë prezantova edhe dy biseda televizive për të mbrojtur shpirtin olimpik. Mbeta e kënaqur me punën time në këto prezantime. Megjithëse mendoj se kam një sjellje të natyrshme dhe të shtruar para ekranit, prapë them se prezantimet e mia nuk janë aq të mira sa ato të prezentatorëve profesionistë. Ndonjëherë unë dukem pak nervoze dhe pyetjeve që unë bëj u mungon vlerësimi dhe thellësia. Gjithsesi, unë jam duke u munduar të zhvilloj një stil të shkujdesur, por të besueshëm gjatë prezantimeve."

Sang Lan-i duhet të qëndrojë ulur në karrigen e saj me rrota, kur interviston të ftuarit në bisedat e saj televizive. Ajo përmend mbresat e pashlyeshme që i kanë lënë qëndrimet dashamirëse të kameramanit, regjizorit dhe të kolegëve të tjerë, "...të cilët janë shumë të kujdesshëm dhe përpiqen t'i bëjnë gjërat sa më të përshtashme që të jetë e mundur për mua." ? thotë ajo me respekt të thellë.

Gjatë trajtimit të saj mjekësor në Shtetet e Bashkuara, Sang Lan-i i tha një reporteri amerikan se "Për hir të të gjithë atyre që janë kujdesur për mua,unë do të vazhdoj të përpiqem dhe do të shikoj vetëm përpara."

Tani që ajo është kthyer në atdhe, po përpiqet për një qëllim të ri. Megjithëse e kënaqur me atë që ka arritur deri më sot, prapë Sang Lani është e gatshme të përballet me sfidat e reja që mund t'i dalin përpara në të ardhmen. (R.Stringa)