Zv-kryeredaktori i Radios së Jashtme të Kinës Li Zongshang u takua me mysafirët shqiptarë. Të dyja palët zhvilluan një bisedë miqësore dhe shkëmbyen mendime për forcimin e shkëmbimeve midis radiove të të dy vendeve.

Pas takimit, delegacioni shqiptar vizitoi zyrën dhe studion e redaksisë së gjuhës shqipe dhe dha intervista për korrespondentin e radios sonë.

Shefja e delegacionit shqiptar Reseca Mataj ishte shumë e gëzuar për ndryshimet e mëdha të Kinës dhe shprehu shpresën se vizita e delegacionit do të ndihmojë më shumë bashkëpunimin e mëtejshëm midis popullit kinez dhe popullit shqiptar. Ajo tha:

"Për mua është një nder i veçantë dhe gëzim shumë i madh që kam qenë në Kinë, në Pekin. Jemi takuar me drejtues të Ministrisë së Punëve të Jashtme të Kinës. Ne jemi tepër të gëzuar që kemi parë ndryshime dhe përparime të mëdha të Kinës. Na vjen mirë që në bazë të miqësisë së vjetër, tashmë po ndërtojmë një miqësi të re midis dy vendeve." 

Drejtori i Institutit të Mediave të Shqipërisë Remzi Lani ka qenë një herë në Kinë. Më përpara ai kishte kontakte me korrespondentë të redaksisë së gjuhës shqipe të radios sonë në Tiranë. Ai tha:

"Jam shumë i gëzuar që jam në Radion e Jashtme të Kinës. Është hera e dytë që vij në Kinë. Brenda një kohe të shkurtër, Kina ka pasur ndryshime të mëdha. Kina është një vend miqësor, njerëzit janë të hapur dhe të dashur. Populli shqiptar nuk do të harrojë ndihmat e popullit kinez ndaj Shqipërisë."

Drejtori i Institutit për Studimet Ndërkombëtare të Shqipërisë Albert Rakipi vlerësoi lart rolin më të rëndësishëm të Kinës në skenën ndërkombëtare dhe shprehu shpresën se të dy vendet do të forcojnë më tej bashkëpunimin në të gjitha fushat. Ai tha:

"Jam shumë i gëzuar që kam qenë një anëtar i delegacionit shqiptar të informacionit në Kinë. Jam jashtëzakonisht i impresionuar nga zhvillimet e Kinës, nga pikëpamja ekonomike. Për ne Kina është një vend i madh dhe shumë i rëndësishëm në pikëpamjen e marrëdhënieve ndërkombëtare. Midis Shqipërisë dhe Kinës kemi miqësinë tradicionale, tani është momenti i mirë për t'i çuar marrëdhëniet dypalëshe në një nivel të ri."

Vizita e delegacionit të informacionit të Shqipërisë në Kinë zgjati një javë. Krahas Pekinit, ata vizituan edhe qytetin Shangai dhe qytetin Suzhou. (Fani)