Qyteti i Londrës fitoi për të tretën herë të drejtën për organizimin e Lojërave Olimpike, ndërsa ka një qytet tjetër që po përpiqet për të shënuar "tripletë" në organizimin e Lojërave Olimpike. Ky është Los Anxhelosi, qyteti më i madh i Amerikës perëndimore.

Ditët e fundit, një funksionar i Los Anxhelosit bëri të ditur se ky qytet do të fillojë zyrtarisht kërkesën për organizimin e Lojërave Olimpike. Nëse Los Anxhelosi e realizon kërkesën e tij, atëherë ai do të bëhet, ashtu si Londra, qyteti që ka fituar për 3 herë të drejtën për organizimin e Lojërave Olimpike.

Në fillim të shtatorit, Komiteti Olimpik i Kalifornisë Jugore, i cili është një organizatë joqeveritare, zhvilloi një konferencë shtypi, ku u publikua zytarisht kërkesa e Los Anxhelosit për organizimin e Lojërave Olimpike. Kryetari i bashkisë së Los Anxhelosit, Antonio Velaregoza dhe kryetari i Komitetit Olimpik të Kalifornisë Jugore, Barier Sandes morën pjesë në konferencë shtypi gjatë së cilës Sandesi u shpreh se Los Anxhelosi e publikoi para kohe kërkesën e tij për organizimin e Lojërave Olimpike sepse ai dëshiron që anëtarët e Komitetit Olimpik Amerikan të mund të shohin vendosmërinë dhe përgatitjen e Los Anxhelosit. Sandesi shprehu gjithashtu dëshirën që Los Anxhelosi të kualifikohet në procesin e kërkesës në emër të Amerikës. Në fund, Komiteti Olimpik Amerikan do të vendosë se cili qytet do t'i paraqitë, si përfaqësues i Amerikës, Komitetit Olimpik Ndërkombëtar kërkesën zytare për organizimin e Lojërave Olimpike.

Por do të jetë e vështirë për Los Anxhelosin të fitojë të drejtën për organizimin e Lojërave Olimpike, sepse ai duhet të mundë të gjithë kandidatët amerikanë dhe të fitojë përkrahjen e Komitetit Olimpik Amerikan. Sipas planit, Komiteti Olimpik Amerikan do të vendosë në vitin 2007 kandidatin zyrtar amerikan për organizimin e Lojërave Olimpike të vitit 2016 dhe Komiteti Olimpik Ndërkombëtar do të përcaktojë në vitin 2009 qytetin organizator të Lojërave Olimpike të vitit 2016. Tani kryetari i Komitetit Olimpik Amerikan është Peter Juberos, i cili organizoi me sukses Lojërat Olimpike të vitit 1984 në Los Anxhelos.

Siç mësohet, Komiteti Olimpik Amerikan ka filluar në Denver hartimin e rregulloreve mbi kërkesën për organizimin e Lojërave Olimpike të vitit 2016.

Deri tani Los Anxhelosi është qyteti i parë në Amerikë që publikon kërkesën për organizimin e Lojërave Olimpike të vitit 2016. Siç mësohet, qytete të tjera amerikane kanë kërkuar të njejtën gjë, si Çikago, San Francisko, Hjustoni, Nju Jorku, Uashingtoni, etj. Kështu, Los Anxhelosi do të përballet me rivalë të shumtë brenda Amerikës. (Jiang Lei)