Në këtë fillim sezoni, trajneri kuqezi, Karlo Ançeloti, sikundër dhe sezonin e shkuar, ka bërë disi rrotacion. Skuadra nuk ka pasur probleme dhe ka marrë rezultate të rëndësishme edhe pa dy "pedinat" themelore si Pirlo e Kaka, të dy në stol dy herë brenda këtij sezoni. "Titullarët" mund të jenë më të freskët në fazën më vendimtare të sezonit. "Turn-overi" këtë vit funksionon dhe Milani fiton, pavarësisht nga ndryshimet e bëra nga trajneri. Kundër Kaljarit qëndruan pushim brazilianët, me përjashtim të Didës e Serzhinjos si dhe Andrea Pirlo. Në 7 ndeshje të kampionatit, vetëm 3 lojtarë (Dida, Stam dhe Shevçenko) kanë zbritur gjithnjë në fushë, për të tjerët ka pasur rrotacion. Tri turne pushimi ka pasur Kaka (që ka hyrë më pas në fushë gjatë ndeshjes nga stoli), dy Pirlo dhe Maldini. Një rrotacion që mund të ketë rezultatet e tij në fund të sezonit, kur vitin e shkuar Milani humbi gjithçka, ku kishte qenë protagonist. Nëse dështimi i papritur në Stamboll është shumë i veçantë, gjendja fizike e skuadrës kishte rënë në dy muajt e fundit, duke parë rezultatet e dobëta. I pashkatërrueshmi Paolo Maldini kishte luajtur 33 ndeshje nga 38 në kampionat, Kafu, një tjetër "plakush" i tmerrshëm, ka luajtur 31 herë, ndërsa mbi 25 ndeshje (pa llogaritur Ligën e Kampioneve) kishin shkuar Kaka (33), Gatuzo (28), Nesta (29), Sheva (27), Sedorf (26) dhe Pirlo (26). Në veçanti, kur ka munguar ky i fundit, skuadra e Ançelotit nuk arrinte të kishte të njëjtin rendiment: pa Pirlon, Milani humbi me Livornon dhe Sienën, barazoi me Rexhinën e Palermon dhe humbi me Juven në "San Siro". Në të gjitha këto ndeshje, "regjisori" milanist ka luajtur vetëm një pjesë loje. Këtë vit, të paktën për momentin, Vogeli po e zëvendëson mirë: dy ndeshje, dy fitore. Një llogari e mirë për pjesën tjetër të sezonit. (Nga Sportishqiptar)