Numri një i botës në tenis, Maria Sharapova, ka deklaruar se do të pranojë të luajë për kombëtaren e vendit të saj në të ardhmen. 18-vjeçarja ka hedhur poshtë zërat se nuk ka pranuar më parë ftesën e kombëtares ruse, pasi ka qenë e zënë nga biznesi i modës, duke pretenduar se ka kërkuar kohë për të përmirësuar akoma aftësitë individuale. "Unë dua të luaj për Rusinë. Jam e vendosur se dua të luaj për vendin tim në "Fed Cup". Unë thjesht nuk e di se kur do ta bëj debutimin tim me kombëtaren në atë turne," - tha ajo. Rusia e ka fituar kompeticionin e kombëtareve për femra në dy vitet e fundit, edhe pa pjesëmarrjen e numrit një të botës. Vitin e kaluar, kombëtarja ruse u udhëhoq nga Anastasia Miskina, por ajo ka dhënë dorëheqjen duke pretenduar se dëshironte që t'u linte rrugë të lirë talenteve të reja. Ndërkohë, Sharapova shtoi: "Unë nuk luajta me kombëtaren këtë vit, pasi do të ishte shumë e vështirë për mua. Jam marrë më shumë me përmirësimin e aftësive të mia, në mënyrë që të arrija sa më shumë në renditjen botërore. Mendoj se puna ime është vlerësuar dhe tashmë kam vendosur që në të ardhmen, do të pranoj ftesën e Rusisë." (Nga Sportishqiptar)