Sëmundjet e tuberkulozit janë sëmundje ngjitëse kronike, që shkaktohen nga mikrobi tuberkle bacillus, i cili mund të depërtohet në çdo organ të trupit të njeriut, por prek kryesisht mushkëritë, prandaj tuberkulozi i mushkërive është tuberkulozi më i shpeshtë. Një pjesë e pacientëve, që vuajnë nga tuberkulozi i mushkërive, mund t'u ngjitin të tjerëve nëpërmjet kollëve ose teshtimave. Por, njerëzit me imunitet të fortë mund t'i rezistojnë ngjitjes, prandaj, jo të gjithë njerëzit kanë rrezik të vuajnë nga tuberkulozi i mushkërive. Megjithatë, nga kërkimet shkencore del se një pacient, që vuan nga tuberkulozi i mushkërive, mund t'u ngjitë këtë sëmundje 10 deri në 15 vetave brenda një viti.

Sot në Kinë, 4 milionë e 500 mijë veta vuajnë nga tuberkulozi i mushkërive dhe, sipas kësaj shifre, Kina zë vendin e dytë në botë, pas Indisë. Dhe kjo shifër rritet çdo vit 1 milion e 400 mijë veta. Për të frenuar këtë tendencë dhe për të garantuar shëndetin e popullit, të gjithë pacientët, që vuajnë nga kjo sëmundje, mjekohen falas. Shteti kinez shton çdo vit investimet në këtë fushë. Zv-ministri kinez i shëndetësisë zoti Vang Longde tha:

"Vitet e fundit, ministria e financave ka shtuar investimet në parandalimin e tuberkulozit. Më parë, shteti kinez investonte në vit 40 milionë juanë në këtë fushë, kurse në vitin 2004, investoi 265 milionë juanë. Ky fond shfrytëzohet kryesisht për mjekimin falas të pacientëve që vuajnë nga tuberkulozi i mushkërive, domethënë për blerjen e ilaçeve dhe për popullarizimin e njohurive në këtë drejtim."

Siç thotë zv-ministri Vang, vitin e kaluar, sektorët përkatës të Kinës morën një sërë masash të reja për parandalimin dhe kurimin e sëmundjeve të tuberkulozit, për shembull, u krijua "çmimi i raportimit të sëmundjeve të tuberkulozit", me qëllim që të inkurajohen mjekët në fshat dhe në bazë të diktojnë në kohë pacientët që vuajnë nga tuberkulozi i mushkërive. U krijua një rrjet kombëtar i raportimit të sëmundjeve ngjitëse, duke u përfshirë edhe tuberkulozi i mushkërive. Në një të tretën e spitaleve të lokaliteteve, u ngritën stacione të analizës së këlbazëve.

Në të njëjtën kohë, Kina zhvillon bashkëpunimin me Anlinë, Japoninë e vende të tjera si dhe me Bankën Botërore e organizata të tjera ndërkombëtare në fushën e parandalimit dhe kurimit të sëmundjeve të tuberkulozit. Duke shfrytëzuar kredinë që dha Banka Botërore dhe fondin që dhuroi qeveria angleze, qeveria kineze ka ngritur objekte të frenimit të tuberkulozit në 16 provinca dhe rajone, si në Hebei, Sinkiang, Mongolinë e Brendshme e të tjera. Tashmë janë arritur suksese të shkëlqyeshme në punën e këtyre objekteve dhe, për këto suksese, në vitin 2004, Kina fitoi "Çmimin presidencial të Bankës Botërore", çmimi i saj më i lartë.

Zv-ministri i shëndetësisë i Kinës, Vang Longde u shpreh se, me përpjekjet tona konsekuente, vendi ynë ka arritur sekseset e para në parandalimin dhe kurimin e sëmundjeve të tuberkulozit. Ai tha:

"Deri në fund të vitit 2004, u shëruan 91.6% i pacientëve që vuanin nga tuberkulozi i mushkërive, të regjistruar në mbarë vendin tonë, shifër kjo që është më e lartë se 85% që e kishte përcaktuar Organizata Botërore e Shëndetësisë."

Siç mësohet, duke filluar nga vitet 90 të shekullit të 20-të, në vendin tonë, përqindja e ngjitjes së tuberkulozit të mushkërive ka zbritur mesatarisht çdo vit 3%.

Sot në Kinë, ende ekzistojnë disa vështirësi dhe probleme në paranmdalimin dhe kurimin e sëmundjeve të tuberkuloyit, megjithëse janë arritur sukseset e sipërpërmendura. Shtimi i pandërprerë i numrit të popullsisë së lëvizshme vështirëson më tej punën për parandalimin dhe kurimin e sëmundjeve të tuberkulozit. Sot, numri i popullsisë së lëvizshme në Kinë arrin në 150 milionë veta. Ata vijnë kryesisht nga fshati, ku gjendja e epidemisë së tuberkulozit është relativisht e rëndë. Një pjesë e tyre mund të jenë pacientë që vuajnë nga tuberkulozi dhe që kanë rrezik t'u ngjitin sëmundjen edhe shumë të tjerëve. Pikërisht për këtë arsye, disa qytete të Kinës kanë ndryshuar punën në këtë drejtim dhe kanë filluar të mjekojnë falas ata njerëz që kanë ardhur nga krahina të tjera dhe që vuajnë nga tuberkulozi.

Përgjegjësi në Qendrën Kineze të parandalimit dhe frenimit të sëmundjeve epidemike, zoti Liu Gjan Gjun është i mendimit se kjo praktikë duhet të zbatohet në mbarë vendin, sepse vetëm kështu mund të evitohet përhapja e sëmundjeve të tuberkulozit në qytet. Ai tha:

"Ne duhet t'u shërbejmë të gjithë pacientëve që vuajnë nga tuberkulozi, pavarësisht se nga vijnë ata."(Zheng)