dëgjoni

Në një intervistë që dha ditët e fundit për korrespondentin e radios sonë, funksionari i Drejtorisë Administrative Shtetërore të ilaçeve të mjekësisë kineze u shpreh se që nga gushti i vitit 2004 puna eksperimentale për mjekimin e sëmundjes së Sidës me mjekësinë kineze filloi të zhvillohet në 11 provinca ose rajone autonome të Kinës. Deri tani janë arritur rezultatet e para në këtë drejtim.

Sot në të gjithë botën afro 40 milionë njerëz janë të infektuar nga virusi i Sidës, ndër të cilët 23 milionë kanë vdekur. Tani në Kinë ka 840 mijë pacientë ose të infektuar nga virusi i Sidës. Kina ndodhet në periudhën e përhapjes së shpejtë të epidemisë së kësaj sëmundjeje.

Tani metoda më e efektshme e mjekësisë perëndimore ndaj Sidës është mjekimi kundër virusit. Por për arsye se deri tani nuk ka ndonjë ilaç që mund ta vrasë virusin e Sidës, efektiviteti i mjekimit me mjekësinë perëndimore nuk është i kënaqshëm, e për më tepër mjekimi me ilaçe kundër virusit ka edhe efekt të madh negativ. Por, mjekësia kineze në mjekimin e sëmundjes së Sidës nuk synon vrasjen e virusit, por që nëpërmjet mbrojtjes dhe rritjes së imunitetit të njeriut, të zbuten simptomat e pacientëve, e të ngrihet cilësia e jetës së tyre, në mënyrë që pacientët të mund të jetojnë për një kohë të gjatë megjithë virusin në trup.

Për të treguar epërsinë e mjekësisë kineze në mjekimin e Sidës, nga viti 2004 sektorët përkatës të Kinës kanë filluar punën eksperimentale në këtë drejtim. Zoti Liu Venpin nga Drejtoria Administrative e Farmacisë së Mjekësisë Kineze tha: Filluam punën eksperimentale në gusht të vitit 2004 në 5 provinca të vendit, si provinca Hënan, Hëpei, Anhui, Hupej dhe Guandong. Deri në qershor të vitit 2005 në këto 5 provinca janë mjekuar gjithsej 2700 pacientë me ilaçet e mjekësisë kineze. Nga viti 2005 kjo punë eksperimentale filloi të zhvillohet edhe në 6 provinca të tjera të vendit.

Që kur filloi kjo punë, qeveria kineze ka investuar 36 milionë juanë dhe kërkon gjithashtu që edhe krahinat e ndryshme të investojnë me financat krahinore në këtë drejtim. Krahas kësaj, qeveria kineze ka bërë edhe shumë punë të tjera në organizimin e eksperimentimeve shkencore dhe në përgatitjen e punonjësve mjekësorë për mjekimin e Sidës. Deri tani është krijuar një sistem administrativ i mjekimit të Sidës me mjekësinë kineze.

Metoda konkrete e kësaj pune eksperimentale është: sektorët përkatës zgjedhin disa pacientë të sëmurë nga sida ose njerëz të infektuar nga virusi i Sidës që nuk mund të mjekohen me mjekësinë perëndimore, për arsye se për ta efektiviteti i mjekimit nuk është i madh, ose efekti negativ është shumë i madh, dhe këta të fundit pranojnë me vullnetin e tyre të mjekohen me mjekësinë kineze. Krahas këtyre, shtohet mjekimi i mjekësisë kineze si mjekim ndihmës për ata pacientë që po mjekohen sipas metodës së mjekësisë perëndimore, në mënyrë që të pakësohet efekti negativ i ilaçeve të mjekësisë perëndimore.

Zoti Liu Ven U tha: Sipas të dhënave, pas pirjes së ilaçeve të mjekësisë kineze, te shumë pacientë janë zbutur ose janë përmirësuar simptomat klinike, si heqja barku, djersitja e tepërt, frymëmarrja e vështirë ose dobësia fizike, etj, e veçanërisht është pakësuar shumë ndikimi negativ i ilaçeve kundër virusit të Sidës. Prandaj mjekimi i Sidës me mjekësinë kineze mirëpritet nga të sëmurët dhe të afërmit e tyre dhe kjo mjekësi ka pasuruar metodat për mjekimin klinik të sëmundjes së Sidës. ( Zhang )