Me rastin e 600-vjetorit të lindjes së heroit kombëtar të shqiptarëve, Skënderbeut, më 21 shtator u organizua nga ambasada e Republikës së Shqipërisë në Kinë një konferencë përkujtimore, ku morën pjesë ambasadori i Shqipërisë në Kinë zoti Kujtim Xhani dhe punonjës të tjerë të ambasadës, e ku ishin të ftuar edhe albanologët e shqipfolësit kinezë, si dhe studentë e pedagogë të gjuhës shqipe të Universitetit të Gjuhëve të Huaja të Pekinit.

Në këtë konferencë mbajti një referat profesoresha kineze He Daming me titull: "Veprimtaria e heroit kombëtar shqiptar Gjergj Kastrioti ? Skënderbeu". Pas saj mbajti një referat bashkëpunëtori i vjetër shkencor kinez Zheng Enbo mbi veprat e autorëve shqiptarë për Skënderbeun. Më pas ish-ambasadori i Kinës në Shqipëri Fan Chengzuo recitoi dy poezi të krijuara prej tij për kujtimin e Skënderbeut.

Konferenca përkujtimore kaloi në një atmosferë shumë të ngrohtë, në mes të recitimeve e këngëve shqiptare të studentëve kinezë.

Konferencën e hapi ambasadori shqiptar Kujtim Xhani, ndër të tjera ai tha:

"Jemi të gëzuar që kemi sot në mesin tonë shokë kinezë, të gjithë kontribues për marrëdhënie ndërmjet dy vendeve tona. Viti 2005 në Shqipëri është shpallur "Viti i Skënderbeut", është 600-vjetori i lindjes së Skënderbeut, heroit kombëtar të Shqipërisë. Shqiptarët kudo që janë gjatë këtij viti kanë organizuar aktivitete të ndryshme për të nderuar figurën e shquar të Skënderbeut, të këtij komandanti heroik, i cili bashkoi popullin shqiptar në luftë kundër Perandorisë Osmane dhe e udhëhoqi me fitore për njëçerek shekulli. E veçanta për ne është se këtë festë e kremtojmë së bashku me shokët kinezë. Këtu në këtë sallë kemi ish-ambasadorë, diplomatë, punonjës të tjerë, studentë. Të gjithë së bashku kanë kontribuar dhe jemi të sigurt se do të kontribuojnë për çuarjen përpara të marrëdhënieve midis dy vendeve tona.

Për mua është kënaqësi që sot në këtë ditë përkujtimore të heroit kombëtar Skënderbeut, do të kemi kënaqësinë dhe nderin të dëgjojmë disa tema të përgatitura nga shokët kinezë dhe ndër ta është profesori Zheng Enbo, i mirënjohur në Republikën Popullore të Kinës, me disa tituj shkencorë, por në këtë takim vjen edhe me një titull tjetër, këtë herë nga Republika e Shqipërisë. Ai është shpallur 'anëtar nderi' i Lidhjes së Shkrimtarëve dhe të Artistëve të Shqipërisë."

Pastaj ambasadori shqiptar z. Kujtim Xhani e ftoi shoqen Drita të mbajë referatin.

"Fjalën e parë ia japim shoqes Drita, edhe kjo ka dhënë kontribut shumë të madh për marrëdhëniet ndërmjet dy vendeve tona."

Profesoresha He Daming (Drita) mbajti në këtë konferencë një referat me titull:

"Veprimtaria e heroit kombëtar shqiptar Skënderbeu".

(1405-1468)

Sivjet është 600-vjetori i lindjes së Skënderbeut. Më kujtohet koha kur isha për studime në Universitetin e Tiranës, dëgjoja kudo në Shqipëri emrin e ndritur dhe të lavdishëm të shqiptarëve ? Skënderbeu. Ky emër është simboli i shqiptarëve dhe krenaria e tyre. Figura e Skënderbeut mbi kalë me shpatë të ngritur lart ka mbetur gjithmonë e ngulitur në mendjen time. Megjithëse nuk e kam studiuar si duhet historinë e Shqipërisë dhe veprimtarinë heroike patriotike të Skënderbeut, prapë se prapë ushqej respekt të madh për këtë hero të madh të shqiptarëve.

Sot ne albanologët e shqipfolësit kinezë mblidhemi këtu së bashku me ambasadorin e Shqipërisë në Kinë zotin Kujtim Xhani dhe miq të tjerë shqiptarë, për të përkujtuar veprimtarinë e ndritur të Skënderbeut. Kjo është hera e parë që përkujtojmë në Pekin veprimtarinë e heroit shqiptar Skënderbeu, pra kjo ngjarje ka rëndësi të veçantë.

Shoku Zheng Enbo më kërkoi që të flas për Skënderbeun, këtu po flas shkurtimisht dhe thjesht, meqë janë të pranishëm edhe studentët e gjuhës shqipe të Universitetit të gjuhëve të huaja të Pekinit. Unë kam përgatitur këtë referat të shkurtër e të përgjithësuar, pasi lexova disa materiale (kryesisht të Tajar Zavalanit dhe të Marin Barletit) brenda një kohe të shkurtër, pra nuk e kam studiuar thellë veprën e Skënderbeut. Në se kam folur gabim për faktet historike, më korrigjoni, dhe këtu ju kërkoj ndjesë.