Pak kohë më parë u mbajt në Pekin Konferenca Botërore e Gjuhës Kineze. Nga kjo konferencë korrespondenti i Radios së Jashtme të Kinës mësoi se tani gjithnjë e më shumë të huaj mësojnë në forma të ndryshme gjuhën kineze.

Gjuha kineze është një nga gjuhët që përdoret nga më shumë njerëz në botë. Vitet e fundit, me hapjen e mëtejshme të Kinës ndaj botës dhe me zhvillimin e vazhdueshëm dhe të shpejtë të ekonomisë kineze, shkëmbimet dhe lidhjet midis Kinës dhe vendeve të ndryshme të botës janë zgjeruar dhe thelluar për ditë e më shumë, gjithnjë e më shumë shoqëri dhe ndërmarrje të huaja investojnë dhe ngrenë fabrika e uzina dhe gjithnjë e më shumë të huaj vijnë për të punuar dhe për turizëm në Kinë. Në të njëjtën kohë, është shtuar me shpejtësi numri i kinezëve që kanë shkuar për studime, për biznes dhe për turizëm në vende të tjera. Kështu që gjuhës kineze si një mjet i rëndësishëm i njohjes së Kinës nga popujt e botës, i kushtojnë shumë rëndësi qeveritë dhe institucionet arsimore të shumë vendeve.

Të huajt që mësojnë gjuhën kineze, më shumë janë nga Vietnami, Tajlanda, Koreja e Jugut, Japonia dhe vende të tjera përreth Kinës. Kultura e këtyre vendeve është e përafërt me kulturën kineze dhe këto vende zhvillojnë më shumë shkëmbime me Kinën, prandaj në to është shumë i përhapur studimi i gjuhës kineze.

Funksionari i Ministrisë së Arsimit të Vietnamit z. Vu Minh Tuan vuri në dukje se shumë të rinj vietnamezë po mësojnë me entuziazëm gjuhën kineze. Ai tha:

"Tani studentëve vietnamezë u pëlqejnë shumë të studiojnë gjuhën kineze. Ata e mësojnë atë jo vetëm në qendrat e gjuhës kineze, por edhe në kohën e lirë."

Në fakt jo vetëm në Vietnam, por edhe në të gjithë Azinë jug-lindore dëshira e popujve për të mësuar gjuhën kineze është shumë e madhe. Në shkollat fillore dhe të mesme të atjeshme është hapur lënda e gjuhës kineze, edhe disa institucione shoqërore të kualifikimit janë përfshirë në radhët e mësimit të gjuhës kineze. Sipas të dhënave statistikore, numri i njerëzve që mësojnë gjuhën kineze në Azinë jug-lindore ka arritur në 1 milion e 600 mijë.

Tani në 200 shkolla të larta të Koresë së Jugut është hapur lënda e gjuhës kineze dhe kjo gjuhë është përfshirë në lëndët e provimit për pranimin në shkollën e lartë. Në Japoni mbi 2 milionë veta mësojnë gjuhën kineze, dhe numri i shkollave të mesme të ciklit të lartë ku është hapur lënda e gjuhës kineze u rrit 10 herë gjatë 20 vjetëve të fundit.

Tani le të shohim se ç'ndikim ka gjuha kineze në Evropë.

Studentja e Universitetit Minstel të Gjermanisë Kerstin Storm flokartë dhe sykaltër, interesohej shumë për gjuhën kineze dhe Kinën që në shkollë të mesme, por atëherë në shkollën e saj nuk ishte hapur lënda e gjuhës kineze dhe dëshira e saj nuk u plotësua. Kur u pranua në universitet ajo zgjodhi specialitetin e gjuhës kineze. Pas 4 vjet studimi ajo e ka përvetësuar mirë gjuhën kineze dhe është në gjendje të komunikojë lirshëm me të tjerët. Ajo i tha korrespondentit se studimi i gjuhës kineze është një zgjedhje e mençur e saj:

"Tani në Kinë ka shumë shanse, shumë shoqëri gjermane kanë ngritur degët e tyre në Kinë, marrëdhëniet tregtare midis Gjermanisë dhe Kinës janë bërë gjithnjë e më të ngushta, prandaj studimi i gjuhës kineze do të më ndihmojë në punësim."

Kerstin Storm tha se tani gjithnjë e më shumë gjermanë mësojnë gjuhën kineze. Kur ajo mësonte në shkollë të lartë gjuhën kineze, në çdo kurs kishte vetëm 10 studentë, tani ka 40. Ajo shprehu mendimin se qëllimi i studimit të gjuhës kineze nga gjermanët është i njëjtë me të sajin, për t'u punësuar. Por disa të tjerë e mësojnë gjuhën kineze duke u nisur nga interesi për kulturën dhe historinë kineze.

Edhe në vende të tjera evropiane është përhapur mësimdhënia e gjuhës kineze. P.sh. tani 30 mijë francezë mësojnë gjuhën kineze, duke zënë vendin e parë në Evropë. Anglia në bashkëpunim me sektorët përkatës kinezë hartoi lëndët mësimore të gjuhës kineze për shkollën e mesme. Në Rusi kërkohen shumë specialistë të gjuhës kineze, shumë shoqëri japin rrogë të madhe për të tërhequr këta specialistë.

Në SHBA, gjuha kineze është bërë një nga gjuhët e huaja, që e mësojnë më shumë amerikanët. Presidenti i Këshillit të Universiteteve Amerikane z. Gaston Caperton që mori pjesë në Konferencën Botërore të Gjuhës Kineze në Pekin tha se në 30% të universiteteve amerikane është hapur lënda e gjuhës kineze, softet me lëndët mësimore të gjuhës kineze kanë hyrë në shkollat fillore dhe të mesme amerikane nëpërmjet internetit. Ai tha:

"Po përpiqemi të bëjmë një punë të veçantë, për përhapjen e gjuhës kineze në shkollat fillore, të mesme dhe të larta amerikane, në mënyrë që sa më shumë nxënës dhe studentë të mësojnë kulturën kineze. Unë dua të ndërtoj një urë për forcimin e shkëmbimeve dhe lidhjeve midis Kinës dhe SHBA-së."

Sipas të dhënave jo të plota, tani në botë numri i të huajve që mësojnë gjuhën kineze në forma të ndryshme i ka kaluar 30 milionët.

Shtimi i shpejtë i njerëzve që mësojnë gjuhën kineze ka rritur pandërprerë kërkesat për mësimdhënien dhe për pedagogët e gjuhës kineze. Për të plotësuar këto kërkesa, Kina ka ndërmarrë shumë masa, si formimi i grupit drejtues të mësimdhënies së gjuhës kineze për të huajt, shtimi i investimeve në hartimin dhe botimin e librave mësimorë, përgatitja dhe dërgimi i më shumë pedagogëve dhe vullnetarëve në vende të ndryshme, hapja në vende të ndryshme të 27 instituteve të Konfucit për të dhënë mësimin e gjuhës kineze dhe për të përhapur kulturën kineze etj. Kryetarja e Konferencës Botërore të Gjuhës Kineze, anëtarja e Këshillit të Shtetit të Kinës zj. Chen Zhili u shpreh:

"Në të ardhmen, do të forcojmë si kurdoherë me një qëndrim të përzemërt dhe aktiv bashkëpunimin në fushën e mësimdhënies së gjuhës kineze me vende të ndryshme, dhe do t'u japim me të gjitha forcat ndihmë vendeve dhe rajoneve që kanë nevojë. Do të bëjmë më shumë investime në mësimdhënien e gjuhës kineze dhe do të ofrojmë shërbimet më cilësore dhe më efikase për mësimdhënien e gjuhës kineze të huajve. (Pina)