Krizë cilësie

Shumë nga skandalet e fundit lidhur me cilësinë e mallrave të huaja shpërthyen jashtë Kinës dhe kishin të bënin me cilësinë e ushqimeve. Vitin e kaluar, u tha se enët e kuzhinës të firmës "DuPont" prodhonin substanca të dëmshme në temperaturë të lartë dhe firma e njohur ndërkombëtare u akuzua se e kishte fshehur këtë rrezik. Këtë vit, "Sudan Red I", një lëndë e dyshuar si kancerogjene, u zbulua në prodhimet ushqimore të gjigantëve industrialë KFZ dhe "Heinz". Ndërsa çaji "Lipton", një pije shumë e përhapur ndër kinezët dhe konsumatorët jashtë, u përfol se përmban fluor me tepricë, që mund të pengojë rritjen e eshtrave. Seria e prodhimeve për lëkurën "Johnson baby care" përmbante vaj mineral të dëmshëm, e pati gjithashtu pretendime se pasta e dhëmbëve "Colgate" përmban kancerogjene. Teksa shkenca dhe teknologjia përparojnë e pengesat tregtare bien, kërkohet që artikujt e konsumit të gjerë t'u nënshtohen testeve edhe më të rrepta e të plotësojnë standarde më të larta, që mund të nxjerrin rreziqe të pavëna re më parë.

Në këtë epokë informacioni, konsumatorët kinezë janë shumë të vetëdijshëm për atë që ndodh në tregjet e huaja. Nëse një kompani nuk arrin të marrë masa të menjëhershme në tregun kinez për të ndrequr problemin që është shfaqur në vende të tjera, ajo vihet menjëherë nën zjarrin e medies kineze. Departamentet përkatëse të qeverisë kineze reagojnë në mënyrë të efektshme për të ruajtur paqen me homologet e tyre të huaja kur shfaqet ndonjë problem në sigurinë e prodhimeve. Rritja e aftësisë së menaxhimit të këtyre rasteve e ka lehtësuar sistemin e sigurimit të cilësisë të Kinës. Por konsumatorëve vendas u duket se firmat e huaja nuk kujdesen shumë për ta, dhe dyshojnë në besueshmërinë e këtyre firmave.

Standarde të dyfishta

Në mars 2005, pikërisht përpara Ditës së të Drejtave të Konsumatorëve, "Greenpeace" i tha medias së Pekinit se dy nga prodhuesit kryesorë të ushqimeve në botë po përdornin përbërës të modifikuar gjenetikisht në prodhimet për tregun kinez. Këto prodhime ishin biskotat e "Kraft Food's Ritz"-it dhe supa e misrit e "Campbell"-it. "Campbell" i siguroi vendet e Bashkimit Evropian se nuk kishte përbërës të modifikuar gjenetikisht në prodhimet e tij. Por statistikat tregojnë se nuk ndodh e njëjta gjë për Kinën. "Ipsos", një kompani ndërkombëtare studimesh, kreu një vëzhgim në Pekin, Shangai dhe Guançu, gjatë të cilit 60 % e të pyeturve u përgjigjën se nuk do të hanin ushqime që përmbanin përbërës të modifikuar gjenetikisht. Konsumatorët kinezë kërkuan me të drejtë që prodhimet që përmbanin këta përbërës të tërhiqeshin nga raftet e tregjeve në Kinë.

Reputacioni i njollosur

Zbehja e besimit te markat e huaja është më e dukshme në paraqitjen e tyre në treg. Në 1999, kompania elektronike "Toshiba" u padit në ShBA për të meta në lap-topët e saj, dhe u detyrua të paguante një shifër prej 1.05 miliardë dollarësh. Por ajo nuk pranoi t'u paguante ndonjë kompensim klientëve të saj në vende të tjera, përfshirë edhe Kinën, përveçse në formën e montimit të softuerëve. Klientët e zemëruar kinezë i kthyen mallrat e tyre me defekt dhe shitjet e kompanisë ranë me vërtik në mbarë vendin. Vitin e ardhshëm, "Toshiba" humbi vendin e parë të saj në Kinë në tregun e lap-topëve dhe u kalua nga "Lenovo" dhe IBM.

Ndërsa në 2002, pronari i zemëruar i një "Mercedes Benz"-i goditi me vare makinën e tij në publik sepse, pasi kishte pasur probleme të shumta pa kaluar as edhe një vit që e kishte blerë, kërkesa për ta ndërruar iu hodh poshtë nga prodhuesi.

Gjoba joparandaluese

Qu Honglin, drejtori i përgjithshëm i "Shangai Junce Local Strategy Company", e hedh poshtë pohimin se kompanitë e huaja janë furnizuese të mallrave më të mira, modele të administrimit të përparuar dhe simbole të një jete më të mirë. "Ky është një mendim i gabuar", shprehet ai. "Qëllimi i tyre në Kinë është të shfrytëzojnë tregun e gjerë dhe të fitojnë sa më shumë të jetë e mundur ".

Kur shumëkombëshet kuptojnë se mund të arrijnë fitime të mëdha duke i ulur standardet e tyre në nivelin e tregjeve lokale, ato e bëjnë një gjë të tillë sa hap e mbyll sytë. Këto standarde të dyfishta janë pjesë e strategjisë së tyre të lokalizimit dhe lidhen me mekanizmat e kontrollit, standardet, gjendjen ligjore dhe kulturën e konsumit vendore.

Sipas Xian Guoming-it, drejtor i Qendrës Mbarëkombëtare për Studime Korporative në Universitetin e Nankait, një arsye përse shumëkombëshet përdorin standarde të dyfishta është ligji ende i ri kinez për mbrojtjen e konsumatorëve. Thuajse është e pamundur që një individ të dalë fitues në një gjyq lidhur me të drejtat e konsumatorëve, por edhe kur del, shuma e kompensimit është një pikë uji në detin e fitimeve të kompanisë së akuzuar.

Konsumatorët kinezë bëhen më racionalë

"Këto incidente tregojnë se konsumatorët kinezë nuk u besojnë më verbërisht markave të huaja", pohon Chang Jinjie, një studiues në Institutin e Studimeve Ekonomike e Politike Botërore të Akademisë së Shkencave Shoqërore të Kinës. Konsumatorët kinezë tani i shohin me më shumë vëmendje markat e huaja dhe sa më e famshme të jetë një markë, aq më shumë ka të ngjarë të shkaktojnë zemërimin e konsumatorit kinez të metat e saj.

Konsumatorët kinezë e kanë treguar forcën e tyre në këtë varg skandalesh të prodhimeve të huaja. Kompanitë e huaja e ndihmuan tregun kinez që të lulëzojë dhe klientët e tij të bëhen më të pjekur e racionalë. Po tani këta konsumatorë kërkojnë të njëjtin respekt e të drejta si edhe konsumatorët në vende të tjera, ashtu si edhe të njëjtin nivel kompensimi.

Ndërkaq, konsumatorët kinezë po gjejnë më shumë mundësi brenda tregut, sepse kompanitë vendëse sigurojnë prodhime e shërbime të njëjta në cilësi me ato të markave të huaja. Sipas një studimi nga Dhoma e Tregtisë e Përgjithshme e Kinës dhe nga Zyra Shtetërore e Statistikave, markat vendase të pajisjeve elektrike, të veshjeve e të prodhimeve ushqimore po përmirësohen vazhdimisht, siç tregohet edhe nga të ardhurat e tyre në treg. Prandaj shumëkombëshet po fillojnë të shqetësohen dhe po marrin masa për të fituar sërish konsumatorët kinezë. Megjithatë, siç thotë profesori Guo Shoukan, një ekspert në ligjin e mbrojtjes së pronësisë intelektuale, nuk u duhet hedhur faji të gjitha kompanive të huaj për shkak të disave. Sidoqoftë, tani që konsumatorët kinezë janë bërë të vetëdijshëm për mangësitë e prodhimeve të huaja, shumëkombëshet duhet të punojnë shumë për të rifituar peshën që kishin në tregun kinez. ?Artani??